சனி, 27 செப்டம்பர், 2014

நல்ல தீர்ப்பை உலகம் சொல்லும் நாள் வரும்போது

Leave a Comment
தமிழக முதல்வர் மீது இன்று வாய்மை மன்றத்தில் வரலாற்றுத் தீர்ப்பு வழங்கப்பட்டுள்ளது!

இந்த நாட்டில் இன்னும் ஏராளமான மனு வாய்மைச் சோழர்கள் துணிச்சலாகத் தம் கடமையைச் செய்து வருகின்றனர் என்பதற்கு பெங்களுரு வாய்மை மன்ற நடுவரின் வாய்மை தவறாத தீர்ப்பு உறுதி செய்துள்ளது!

கண்கட்டப்பட்ட வாய்மை தேவதையின் கண்களில் வடிவது ஆனந்தக் கண்ணீர்!

இந்த வரலாற்றுத் தீர்ப்புக்கு எதிராக இன்று ஆளும் கட்சியினர் ஆங்காங்கே பொதுச் சொத்துக்களையும் தனியார் சொத்துக்களையும் நாசப்படுத்தி தமிழக மக்களைக் கண்ணீர்க்கடலில் மூழ்கடித்துள்ளனர்!

மக்கள் தீர்ப்பே மகேசன் தீர்ப்பு என முழங்கியவர்கள் தங்களின் அராஜகத்தால் வரும் தேர்தலில் அடுத்த தீர்ப்புக்குத் தங்களைத் தயார்ப்படுத்திக் கொண்டிருக்கின்றனர்!

நல்ல தீர்ப்பை உலகம் சொல்லும் நாள் வரும்போது இங்கு சிரிப்பவர் யார்? அழுபவர் யார்? தெரியும் அப்போது என மக்கள் திலகம பாடிய ஒரு பாடல் வரிகள்தாம் இப்பொழுது எமக்குள் ஏனோ வந்து விழுகிறது!

Read More...

வியாழன், 25 செப்டம்பர், 2014

நாணல் போல வளைவதுவும் சட்டமாகலாம்!

Leave a Comment

பதருன்னிசா அந்த செய்தியை கேட்டவுடன் அவளெதிரே உலகமே சுழலுவது போல தோன்ற சட்டென மயங்கி விழுந்தாள். மயக்கம் தெளிந்து எழுந்த அவளுக்குள் இயல்பாகவே அமைந்திருந்த மன உறுதி அவளது பதட்டத்தை விலக்க தனது மூன்று குழந்தைகளையும் அழைத்துக்கொண்டு தன் கணவர் அனுமதிக்கப்பட்டிருந்த மருத்துவ மனைக்கு விரைந்தாள்! 

பலத்த அடிபட்ட நிலையில் ஏராள செலவு பிடிக்கும் என்ற என்ற செய்தியுடன் அவசர வார்டில் அனுமதிக்கப்பட்டு சிகிச்சை பெற்ற தனது கணவரை காண்கையில் மீண்டும் அவளது மன உறுதி குலைந்தாலும் சுதாரித்துக்கொண்டு எப்படியேனும் தனது கணவரது உயிரை காத்து அவரை பழைய நிலையில் நடமாடச் செய்வதென உறுதி கொண்டாள்!

உறவுகள் உதவவே என்ற தர்மம் தொலைந்த பூமியில் பிறந்து தொலைந்த அவளால் தனது கணவரை பழைய நிலைக்கு மீட்க இந்த பூமியில் தனது நடுத்தர குடும்பம் தனது கணவரது விபத்திற்கு முன்னர் வாங்கியிருந்த வீட்டையும் நகைகளையும் விற்றே ஏராள மருத்துவ செலவுகளை ஈடுசெய்ய முடிந்தது!

கணவரின் வருமானமும் இழந்த நிலையில் தனது மூன்று குழந்தைகளை படிக்க வைக்கவும் தனது கணவரை ஓரளவிற்கு நடமாட செய்யவும் அவள் பட்ட பாடுகள் ஏடுகளில் எழுத வேண்டுமெனில் ஏராள பக்கங்கள் தேவைப்படும்!

அவளது கணவருக்கு விபத்து ஏற்படுத்திய போக்குவரத்து கழகத்தின் மீது நட்ட ஈடு வேண்டி வழக்கு தொடர திறமையான வழக்கறிஞர் அமைய, கீழ் வாய்மை மன்றமும் வழக்கை தீர ஆராய்ந்து உரிய நட்ட ஈடு வழங்க வேண்டுமென விபத்து ஏற்படுத்திய பேருந்துக்குரிய அரசு போக்குவரத்து கழகத்திற்கு உத்தரவிட்டது!

போக்குவரத்து கழகமோ தனது வழக்கறிஞர் மூலம் சட்டத்திலுள்ள ஓட்டைகளை பயன்படுத்தி உயர் வாய்மை மன்றத்திற்கு இந்த வழக்கை எடுத்துச்சென்று அவளது கணவருக்கு சேரவேண்டிய நட்ட ஈட்டினை தர முன் வராமல் தப்பிக்க முயன்றது! 

வழக்கு எந்தவித முடிவிற்கும் வராமலே கிட்டத்தட்ட ஏழாண்டுகள் கடந்தன! தனது குழந்தைகளை படிக்க வைக்கவே சிரமப்பட்ட அவளால் வயதுக்கு வந்த தனது மூத்த மகளை திருமணச் சந்தையில் நல்ல விலை கொடுத்து அனுப்பவே ஏராளமான துன்பங்களை அனுபவிக்க நேர்ந்தது!

நல்ல வேளையாக அவளுக்கு வாய்த்த மூத்த மருமகன் நல்லவனாக அமையவே தனது மகளுக்கு போட வேண்டிய நகைகள் பற்றிய எந்தவிதமான தொல்லைகளும் இல்லாததால் தனது அடுத்த மகளுக்குத் திருமணம் செய்விக்க எதிர் வரும் நாட்களுடன் போராடியவாறு தனது வாழ்க்கை பயணத்தை தொடர்ந்தாள்!

இந்த நிலையில் அவளது கணவரின் வழக்கு நடைபெறும் உயர் உயர்வாய்மை மன்றத்தில் கடந்த ஏழாண்டுகளாக அடுத்தடுத்து நடுவர்கள் மாறியவாறு விசாரித்து வந்த நிலையில் புதிதாக பதவியேற்று நிலுவையிலுள்ள வழக்குகளை விசாரிக்கத் துவங்கினார் நடுவர் தமிழ்ச்செல்வன்!

வழக்கமான நடுவர்கள் போலல்லாமல் சற்று வித்தியாசமான முறையில் தீர்ப்புகள் வழங்குவதில் மக்களிடையே நல்ல பெயரெடுத்தவர் அவர்! தனது பார்வையில் பதருன்னிசாவின் கணவரது வழக்கு வந்த போது அவர் வழக்கம் போலவே தனது பாணியில் வழக்கினை முடிவிற்கு கொண்டு வர எண்ணினார்!

முதற்கட்டமாக வழக்கு தொடுத்த பதருன்னிசாவின் குடும்பத்தை வாய்மை மன்ற வளாகத்திற்கு வரவழைத்து அவர்களின் தற்போதைய வாழ்வியல் சூழல்களை விசாரித்தறிந்தார்! அதன் பிறகு தனது தீர்ப்பினை தாமதமின்றி விரைவில் அறிவித்தார்.

வழக்கின் தீர்ப்பு நாள் என்பதால் அன்றைய தினம் தீர்ப்பைக் கேட்க பதருன்னிசா தனது குடும்பத்துடன் வாய்மை மன்றப் பார்வையாளர்கள் வரிசையில் அமர்ந்திருந்தாள்!

நடுவர் தமிழழகன் தனது ஆசனத்தில் வந்தமர்ந்ததும் வழக்கமான மன்ற நடவடிக்கைகள் முடிந்ததும் தனது இறுதித் தீர்ப்பினை பின்வருமாறு வழங்கினார்!

இந்த மன்றம் வாதி பிரதிவாதி இருவரது வாதங்களையும் கவனமுடன் ஆராய்ந்தது! சட்டம் என்பது பாதகமின்றி அனைவருக்கும் சமமாக இருக்க வேண்டுமென்பதற்கெனவே இயற்றப்பட்டது! 

இந்த வழக்கில் வாதியின் வழக்கின்படி அவருக்குச் சேரவேண்டிய இழப்பீட்டு தொகையை வழங்க இயலாது என பிரதிவாதியான போக்குவரத்து கழகம் மறுக்கின்றது! இந்த நிலையில் பல்வேறு விபத்து சம்பவங்களில் நம் அரசுகள் எடுத்துள்ள நடவடிக்கைகளையும் இங்கு நாம் கவனத்தில்  கொள்ளவேண்டும்!

உதாரணத்திற்கு பல வருடங்களுக்கு முன்னர் கருவூர் பேருந்து நிலையத்தில் ஏற்பட்ட தகராறினை மனதில் நினைத்தவாறு அதி வேகமாக பேருந்தை ஓட்டிச்சென்றார் ஒரு ஓட்டுனர்! 

அந்த பேருந்து அதிகாலையில் ஒரு இரயில்வே கிராசிங்கை கடக்க முயன்றது! அதே சமயம் தனது கடமையில் தவறிய ஒரு பணியாளர் தமது தாமதமான செயலால் இரயில் வரும் சமயத்தில் கிராசிங்கின் கேட்டை மூடத்துவங்க அதையறியாமல் வேகமாக தனது வாகனத்தை செலுத்திய ஓட்டுனரால் அவரும் அவர் தவிர ஏராளமானவர்களும் விபத்தில் சிக்கி தம் இன்னுயிர் ஈந்தனர்!

அவர்கள் தவிர பேருந்தில் பயணித்த ஏராளம் பயணிகள் கடுமையாக அடிபட்டு உடல் பாதிப்புகளை அடைந்தனர்! இந்த சம்பவத்தில் நம் தமிழக அரசு விபத்திற்கான காரணங்களை ஆராய்ந்து கொண்டிராமல் உடனடியாக இறந்தவர்களுக்கும் பாதிக்கப்பட்டவர்களுக்கும் உரிய நிவாரண தொகையை அறிவித்தது!

சட்டப்படி பார்த்தால் இந்த விபத்தில் இன்னுயிர் ஈந்தவர்களின் குடும்பத்தவர்களின் முக்கிய எதிரிகளாக அதிவேகமாகப் பேருந்தை ஓட்டிய ஓட்டுனரும் உரிய நேரத்தில் தனது கடமையைச் செய்யாத கேட் கீப்பரும்தான்! 

எனவே விபத்தில் இறந்தவர்களுக்கும் அடிபட்டவர்களுக்கும் அவர்கள்தான் உரிய இழப்பீட்டினை தர வேண்டும் என, அரசு சட்டத்திலுள்ள குறைகளை பயன்படுத்தி தப்பித்துக்கொண்டிருக்கலாம்! அந்த விபத்தில் தவறு செய்த இருவரில் ஓட்டுனர் விபத்தில் பலியாகிவிட்டார்! மற்றவர் வழக்கைச் சந்தித்து தனது வேலையை இழந்திருக்கக்கூடும்!

சட்டப்படி இவர்களின் தவறுகளுக்கு உரிய நிவாரண தொகையை வழங்க முடிகின்ற அளவிற்கு இயலாத சாதாரண நடுத்தர குடும்பத்தவர்கள் இவர்கள் என்பதுவும் இங்கு நாம் கவனத்தில் கொள்ளவேண்டும்! எனவே விபத்திற்குக் காரணமானவற்றை ஆராயாமல் மனிதாபிமானம் ஒன்றையே குறிக்கோளாக கொண்டதால்தான் நம் தமிழக அரசு அந்த விபத்தில் பாதிக்கப்பட்டவர்களுக்கு நிவாரணத் தொகையை தானாக முன்வந்து வழங்கியது! 

வகுத்தலும் காத்தலும் வல்லதரசு என்ற வள்ளுவரின் உயர் குறளுக்கு ஏற்ப அமைந்தவைதாம் மனு வாய்மைச் சோழன், நெடுஞ்செழியன், கரிகாலன் போன்ற வாய்மையாளர்கள் நடுவர்களாக ஆட்சி புரிந்த வாய்மை மன்றங்கள் பல படைத்த பண்டையத் தமிழக அரசியல் வரலாறு!

இந்த வழக்கும் கன்றின் மேல் தேர் ஏற்றிய குற்றத்திற்காக வாய்மையை நிலை நாட்டிய வழக்கின்  கோணத்தில்தான் எடுத்துக்கொள்ளப்பட வேண்டும்! பிரதிவாதி தரப்பு குறிப்பிட்டது போல தனது ஓட்;டுனர் மீது தவறில்லை, வாதிதான் குறுக்கே வந்து விழுந்தார், சரியான மருத்துவ சான்றிதழ்கள் இல்லை, வாதி வந்த வாகனத்திற்கு ஆயுள்காப்பீடு இல்லை போன்ற காரணங்களை இந்த வழக்கில் பிரதிவாதிக்குச் சாதகமாக நாம் எடுத்துக்கொள்ள வேண்டியதில்லை!

விபத்தினால் பாதிக்கப்பட்ட குடும்பத்தின் வாழ்வியல் சூழல்கள் முதலில் கருத்தில் கொள்ளப்பட வேண்டும்! வாதியின் துணைவியார் தனது கணவர் விபத்தினால் பாதிக்கப்பட்டவுடன் எவ்வாறெல்லாம் பாதிக்கப்பட்டார் என்பதையும் தனது குழந்தைகளை படிக்க வைக்கவும் குடும்ப பாரத்தை சுமக்கவும்  தனியொருவராக எந்தளவு பாடுபட்டுள்ளார் என்பதையும் மனிதாபிமானத்துடன் நாம் இங்கு கவனத்தில் கொள்ளவேண்டும்!

ஒரு பேருந்து செயல்படுவதற்கு முன்பு அதற்கு காப்பீட்டு கட்டணம் கட்டணம் கட்டப்பட்டுள்ளது! அந்த பேருந்து விபத்தால் சேதப்பட்டால் மட்டுமே அதற்குரிய காப்பீடு பெற வேண்டுமென்ற நிபந்தனையில்லை! அந்த பேருந்தால் ஏற்படும் விபத்தினால் பாதிக்கப்படும் மக்களுக்கும் உரிய காப்பீட்டு நிவாரணம் வழங்கப்படுவதற்கு உரியதாகவும் அந்த கட்டணம் கருதப்பட வேண்டும்!

மேலும் போக்குவரத்து கழகமும் காப்பீட்டு நிறுவனமும் அரசின் கட்டுப்பாட்டில் வருபவைதான்! மக்களின் நலனுக்காக செயல்படும் இவைகள் தங்களின் பொறுப்பற்ற செயலால் தங்களின் கடமையிலிருந்து தவறுவதை அனுமதிக்ககூடாது!

எனவே வாதிக்கு அந்த பேருந்து ஏற்படுத்திய விபத்தால் ஏற்பட்ட பாதிப்புகளையும் அந்த குடும்பம் அனுபவித்த இன்னல்களையும் கருத்தில் கொண்டு கீழ் மன்றம் அறிவித்த தொகையை உரிய வட்டியுடனும் தகுந்த வழக்கு செலவுடனும்; வாகனத்தை காப்பீடு செய்த நிறுவனத்திடமிருந்து ஒரு மாத காலத்தில் வசூலித்து இந்த மன்றத்தில் செழுத்த வேண்டுமென பிரதிவாதிக்கு இந்த மன்றம் உத்தரவிடுகிறது! 

இந்த விபத்து குறித்த தகவல்களை முழுமையாக ஏற்று மேலும் காலம் தாழ்த்தாமல் இந்த வாய்மை மன்றத் தீர்ப்பிற்கு கட்டுப்பட்டு சம்பந்தப்பட்ட காப்பீட்டு நிறுவனமும் உரிய இழப்பீட்டினை வழங்க வேண்டுமென இந்த மன்றம் உத்தரவிடுகிறது!

தீர்ப்பை வாசித்து முடித்துவிட்டு கம்பீரமாக எழுந்து சென்ற நடுவருக்கும், அவரைத் தம் கண்களில் வழிந்த ஆனந்தக் கண்ணீரோடு கரம் குவித்து வணங்கிய பதருன்னிசாவின் மன உறுதிக்கும், தலை வணங்கியவாறு பார்வையாளர்கள் வெளியேறிய காட்சியைக் கண்டு, வாய்மை தேவதை கண் கட்டப்பட்ட நிலையிலும் ஆனந்தப் புன்னகை புரிந்தாள்!

நாணல் போல வளைவதுவும் சட்டமாகலாம்! இது நாளைய தலைமுறைக்கு தேவையாகலாம்!

Read More...

புதன், 24 செப்டம்பர், 2014

அரசு மற்றும் தனியார் துறைகளில் ஒழுக்கம் மேன்மையுற!

Leave a Comment
1.அரசு மற்றும் தனியார் என எந்தத் துறையில் வேலை செய்தாலும் ஒவ்வொரு மணி நேரத்திற்கும் தம்முடைய வேலைக்கு அரசாங்கமெனில் மக்களின் வரிப்பணத்திலும், தனியார் எனில் தம் போன்ற ஊழியர்களின் உழைப்பிலும்தாம் ஊதியம் கிடைக்கிறது என்பதை மனதில் கொண்டு அதற்கேற்ற உழைப்புடன் பணி நேரத்தை முழுமையாக நிறைவு செய்தல்!

2.தங்களுக்கு ஒதுக்கப்பட்ட வாகனங்களை தம்முடைய பணிக்கென மட்டுமே பயன்படுத்துதல், மற்றும் அந்த வாகனத்திற்கு ஆகும் எரிபொருள், பராமரிப்பு போன்ற செலவுகளுக்கு ஆகும் உண்மையான கணக்கு வழக்குகளை நேர்மையாகப் பராமரித்தல்! எக்காரணம் கொண்டும் குடும்பத்தினருக்காகப் பயன்படுத்தாதிருத்தல்!

3.அரசுத் துறை என்றால் நாம் மக்களின் பணி செய்வதற்காக இந்தப் பணியில் அமர்ந்திருக்கிறோம் என்ற உணர்வுடனும், தனியார் துறை என்றால் நாம் பணியாற்றும் நிறுவனத்தின் மேன்மைக்காகப் பாடுபட்டு நம் கடின உழைப்பிற்கேற்ற ஊதியமும், பணி உயர்வும் கிடைக்க வேண்டுமென்று மிகுந்த ஒழுக்கத்துடன் வேலை செய்தல்!

4.அரசு மற்றும் எந்தத் தனியார் துறையாக இருந்தாலும் நிர்வாகம் மற்றும் பொதுமக்கள், வாடிக்கையாளர்கள் போன்றவர்கள் நம்மை நம்பி ஒப்படைக்கும், பணம், மற்றும் கணக்கு வழக்குகளை மிகுந்த நேர்மையுடன், பணமென்றால் இது நம்முடையதல்ல என்ற மன நிலையுடன் நேர்மையாகக் கையாளுதல்!

5.சக ஊழியர்களின் ஒத்துழைப்பின்றி நம்முடைய பணி சிறக்காது என்பதால் அவர்களின் குண நலன்களுக்கேற்ப நம்மை நியாயமானவற்றிலும், நேர்மையானவற்றிலும் மட்டுமே மாற்றிக்கொண்டு அவர்களின் ஒத்துழைப்புடன் நிர்வாகம் சிறக்குமாறு ஒற்றுமையுடன் பணி செய்தல்!

6.எந்தத் துறையாயினும் தம் பங்கிற்கு நிர்வாகத்திற்கு அதிக வருமானம் கிடைக்கும் வகையிலும், தம் பொறுப்பிலுள்ள செலவினங்களை எவ்வளவு சிக்கனமாகச் செய்ய முடியுமோ அவ்வளவு சிக்கனமாக்கித் தனி மனித சிக்கனம் ஒரு நிறுவனத்தின் மாபெரும் சேமிப்பு என்பதை உணர்ந்து செயல்படுதல்! (உதாரணததிற்கு ஒரு பேருந்து ஓட்டுனரின் சிறப்பான செயலபாட்டால் எரிபொருள் சிக்கனம் தினசரி கிடைத்தல்)

7.தமக்குக் கொடுக்கப்பட்டுள்ள பணியில் கவனமாக இருத்தல் ஒன்றே பல்வேறுவிதமான நன்மைகளை நிர்வாகத்திற்கு ஏற்படுத்தும் என்பதில் தெளிவாக இருத்தல்!

8.நம் கடன் பணி செய்து கிடைப்பதே என உண்மையாக உழைக்கும் தொழிலாளர்கள் நிறைந்த உன்னதமான நிர்வாக அமைப்பு நிச்சயமாக இலாபத்தில்தான் நடைபெறும் என்பதைக் கவனத்தில் கொண்டு தம் பங்கினை முழுமையாக அர்ப்பணித்து உழைத்தல்!

9.எந்த ஒரு நிர்வாகமாக இருந்தாலும் அது பலதரப்பட்ட தொழிலாளர்களின் உழைப்பால்தாம் இலாபம் பெற முடியும்! இந்த இலாபத்தை குளிர்சாதன வசதியில் அமர்ந்து நிர்வகிக்கும் நிர்வாகிகள் இலஞ்சம், ஊழல், கமிசன், எனப் பலவகைகளில் தமதாக்கிக் கொள்ள முயலுவது பாவத்தின் சம்பளம் என்பதை உணர்ந்து தங்களின் உயர்ந்த பதவிக்கேற்ற ஊதியமும் அடிமட்டத் தொழிலாளிகளின் உழைப்பால் வருவதுதாம் என உணர்ந்து நேர்மையுடன் கண்ணியமாகத் தம் கடமையைச் செய்தல்!

10.அரசு மற்றும் தனியார் என இரு நிர்வாகங்களின் வருமானமும் அதனை நிர்வகிக்கும் அரசியல்வாதிகளின் பொறுப்பில் வருவதால் ஐந்தாண்டுகளுக்கு ஒரு முறையோ, அல்லது பலமுறையோ மக்களின் ஆதரவுடன் பதவிக்கு வருபவர்கள் வரலாற்றில் தங்களின் பெயர் களங்கப்படாமல் நிலைத்து நிற்க ஒரு துறவியின் விருப்பு வெறுப்பற்ற மன நிலையுடன் செயல்படுமாறு ஒரு சிறந்த அரசியல் தன்மை ஒரு நாட்டில் அமைந்து விட்டால் 

அந்த நாட்டில் வறுமை, தரித்திரம், பிணிகள், வேலையின்மை, வேலை நிறுத்தங்கள், கொலை, கொள்ளை, வஞ்சகம், போன்ற பல்வேறு சமூக ஒழுக்கக் கேடுகள் தொலைந்து அந்த நாடு உலகினுக்கே ஒரு முன்னோடியான நாடாகத் திகழும் எனபதில் சந்தேகம் ஏதுமில்லை!

மேற்கண்டவற்றில் நீங்கள் எத்தனை நல்லவற்றைக் கடைப்பிடிக்கிறீர்கள் என உங்கள் மனச்சாட்சியை அடகு வைக்காமல் உங்களின் ஆழ் மனதிற்குள் கேட்டுப் பாருங்கள்! பாதிக்கு மேல் கடைப்பிடித்தால் மீதமுள்ளவற்றை முழுமையாகக் கடை பிடியுங்கள்! 

ஒன்றுமே செய்யவில்லையென்றால் இனியாவது முதலில் இருந்து நேர்மையாகத் துவங்குங்கள்! ஏமாற்றுபவர்கள் மற்றவர்களை ஏமாற்றுவதில்லை! அவர்கள் தங்களைத் தாங்களே ஏமாற்றிக் கொள்கிறார்கள் என்பதுதாம் உண்மை எனத் தெளியுங்கள்! ஒரு ஒழுக்கம் நிறைந்த நேர்மையான அமைப்பு உருவாக உங்களின் பங்கினை இப்பொழுதிலிருந்தே வழங்கிட உறுதி கொள்ளுங்கள்!

தனி மனித ஒழுக்கமே ஒரு நாட்டை மேம்படுத்தும் உயரிய உன்னத சக்தியாகும்! அதில் உங்களின் பங்கு முதன்மையானதாகவும் உயரியதாகவும் இருக்கட்டுமே!
Read More...

செவ்வாய், 23 செப்டம்பர், 2014

படித்ததில் பிடித்த கதை!

Leave a Comment
புகழ் பெற்ற ரஷ்ய எழுத்தாளர் லியோ டால்ஸ்ட்டாய் அவர்களின் சிறுகதை ஒன்றைப் படிக்க நேர்ந்தது!  தனி மனித வாழ்வின் மேன்மையை மிக அழகாக அவர் கையாண்ட நேர்த்தி மிகவும் பிடித்ததால் அதனைச சுருக்கமாக இங்கு பகிர்ந்து கொள்ள ஆசைப்படுகிறேன்!

ரஷ்யாவின் ஒரு கிராமத்துத் தலைவராக ஒழுக்கமுடன் வாழ்ந்த வசதியான ஒரு பெரியவரும், அதே கிராமத்தில் அளவாகக் குடிப்பது, மற்றும் பொடிபோடுதல் போன்ற பழக்க வழக்கங்களுடன் நெஞ்சில் ஈர உணர்வுள்ள அவரது நண்பருமான இன்னொரு பெரியவரும் இயேசுவின் எருசலேம் நகருக்குப் புனித யாத்திரைக்குப் புறப்பட்டனர்!

போதிய பணம் மற்றும் உணவுகளுடன் புறப்பட்ட இருவரில் முதலாமவர் தாம் கிராமத்தில் விட்டு வந்த பணிகளைத் தங்களின் வாரிசுகள் சரியாகக் கவனிப்பார்களோ, தவறு ஏதேனும் நிகழ்ந்துவிடுமோ, இந்தப் புனித யாத்திரையைத் தள்ளிப் போட்டிருக்கலாமோ என்ற பல்வேறான எண்ணங்களைத் தம் கிராமத்தைச் சுற்றியவாறு பயணிக்க இரண்டாமவரோ எவ்விதக் கவலைகளுமின்றித் தம்முள் இறை சிந்தனையோடு மட்டுமே பயணப்பட்டார்!

ஆங்காங்கே இது போன்ற பயணிகளுக்கு மக்களிடயே கிடைக்கும் பணிவிடைகளுடன் நீண்ட தொலைவு கடந்த நிலையில் ஒரு பஞ்சம் தாண்டவமாடிய பிரதேசத்தில் அவர்களின் பயணம் உணவிற்கும் குடிநீருக்கும் தட்டுப்பாடான நிலையில் தொடர்ந்தது!

ஓரிடத்தில் இரண்டாமவர் தாகமெடுத்த நிலையில் பின்தங்க முதலாமவர் இவர் தன்னுடன் வந்து சேர்ந்துவிடுவார் என்ற நம்பிக்கையில் பயணம் தொடர்ந்தார்! இரண்டாமவர் கடும் தாகமுற்றதால் வழியில் இருந்த ஒரு குடிசையில் நுழைந்து தண்ணீர் கேட்க முட்பட உயிருக்குப் போராடிய நிலையில் அங்கிருந்தவர்களின் பஞ்ச கோலமும் தனது தண்ணீர்த் தேவை நிறைவேறாத நிலையில் அவருக்குள் ஈர உணர்வினை வெளிப்படுத்த அவரது புனிதப் பயண நோக்கம் அக்கணமே மாறிவிட்டது!

உயிரிழக்கும் நிலையிலிருந்த அந்தக் குடும்பத்தின் உணவுத் தேவையை முதலில் தம்மிடமிருந்த உணவைக் கொண்டு ஈடு செய்த அவர், அடுத்த சில நாட்கள் அந்த வீட்டிலேயே தங்கி அவர்களின் தற்போதைய நிலையறிந்து, அவர்கள் தங்களின் பஞ்சத்தின் காரணமாக அடகு வைத்த நிலங்கள், விற்றுவிட்ட குதிரை மற்றும் வண்டி, கறவை மாடு, மற்றும் வீட்டுப் பாத்திரங்கள் முழுவதும் தாம் பயணத்திற்கெனப் கொண்டு சென்றிருந்த பணத்தில் செலவிட்டு மீட்டு அவர்களிடம் அளித்துவிட்டு ஒரு இரவில் அவர்கள் தனக்கு நன்றி எதுவும் பாராட்ட வாய்ப்பற்ற நிலையில் தம்முடைய கிராமத்திற்கே திரும்பி விடுகிறார்!

கிராமம் திரும்பிய அவர் தம்முடைய பணம் தொலைந்துவிட்டதாகத் தம் வீட்டினரிடம் சொல்ல அவர்களோ நீங்கள் பத்திரமாகத் திரும்பி வந்ததே போதும் என இயல்பாக எடுத்துக் கொண்டனர்! 

முன்னவர் நடை பயணம் மற்றும் கப்பல் பயணம் எனத் தொடர்ந்து எருசலேம் நகரை அடையும் வரை தம் நண்பரை மீண்டும் சந்திக்க இயலாதது, தம் வழக்கமான கிராமத்தில் தாம் விட்டு வந்த பணிகள் பற்றிய, தாம் கொண்டு வந்த பணம் தொலைந்து விடுமோ என்பன போன்ற மன நிலையில் எருசலேம் நகரில் இயேசுவின் தலைமைக் கோயிலில் தரிசனத்திற்குப் பெருங் கூட்டத்தில் நிற்கும்போது, கர்த்தருக்கு எதிரில் முதலாவதாகத் தம் நண்பர் தரிசித்துக் கொண்டிருப்பதைக் காண நேர்கிறது!

கூட்டத்தில் முண்டியடித்து அவரை நெருங்க முயற்சித்தும் அன்றும், அதன் பிறகு அங்கிருந்த மூன்று நாட்களும் இதோ போன்று தம் நண்பரின் முன் வரிசைக் காட்சியைக் கண்டும் அவரைக் காண இயலாத நிலையில் தம் கிராமம் திரும்புகிறார்!

நடைப் பயணமாகக் கிளம்பித் திரும்பும் இது போன்ற புனித யாத்திரைகள் அந்நாட்களில் மாதக்கணக்கில் நீள்வதால் வரும் வழியில் தம் நண்பர் குடிநீருக்கெனப் பஞ்சமுற்ற பிரதேசத்தில் இருந்த குடிசை வீட்டை அணுகி அவரைப் பற்றி விசாரிக்கலாம் எனச் செல்ல அவர்களும் பஞ்சம் நீங்கி வளமுற்ற நிலையில் அவரைப் பலவிதமாக உபசரித்துப் பின்னர் தமக்கு உதவிய அவரது நண்பரின் பெயர்கூடத் தெரியாத நிலையில் அவர்தம் கருணையைப் பலவாறாக எடுத்தியம்பி அவர்தாம் எங்களுக்கு உயிர் கொடுத்த கடவுளாவார் என்றெல்லாம் போற்றினர்!

அவர்களிடமிருந்து விடைபெற்றுத் தம் கிராமம் திரும்பிய அவர் தாம் கவலைப் பட்டவாறு தம் குடும்பம் இந்த நாட்களில் பலவிதமாகக் கீழிறங்கிய நிலையில் இருப்பதைக் கண்ணுற்றார்! 

அடுத்து தம் நண்பரைக் காண அவரது இல்லம் சென்று அவரது குடும்பம் எப்பொழுதும் போல வழக்கமான நிலையில் இருப்பதையும் தம் நண்பரோ தம்முடைய பயணத்தில் எதுவும் நடைபெறாதது போலத் தம்மிடம் நடந்து கொண்டதுடன் தமது வழக்கமான தேனீ வளர்ப்புத் தொழிலில் மிகுந்த உற்சாகத்துடன் அக்கம் பக்கத்தவர்களுக்கு உதவும் பாங்குடனும் திகழ்வதைக் கண்டார்!

இந்தக் கதையிலிருந்து டால்ஸ்டாய் அவர்கள் தெரிவிக்கும் செய்தி என்னவென்றால், நெஞ்சில் இரக்கமுற்றவர்கள் இறை சக்திகளின் இருப்பிடத்திற்குத் தொலைவில் இருந்தாலும் அவர்களின் உண்மையான இரக்க குணமே அவர்களை இறை சக்கிகளுக்கு மிக அண்மையில் இருக்குமாறு வைத்துக் கொள்ளும் என்பதும், அத்தகையவர்கள் தங்களின் இருப்பிடத்தில் இருந்தாலும் இல்லாவிட்டாலும் அங்கு வழக்கமாக நடைபெறும் எந்தச் செயலும் தவறாமல் ஒழுங்குடன் முறையாக நடைபெறும் என்பதுதாம்!

Read More...

வியாழன், 18 செப்டம்பர், 2014

சாலை ஒழுக்கம் உயிரினும் ஓம்பப்படும்!

Leave a Comment
1.சாலையில் ஒரு வாகனத்தை முந்திச் செல்ல முயலும்போது எதிரே ஒரு வாகனம் வந்தால் எதிரில் வருபவரின் இடத்தைத் தாங்கள் ஆக்கிரமிப்பதால் குற்றம் தங்களுடையதே என உணர்ந்து பின் வாங்குதல்!

2.குண்டும் குழியுமான சாலை என்பதற்காக இடது புறம் செல்வதற்குப் பதிலாக வலது புறம் சாலை நன்றாக இருக்கிறது என்பதற்காகச் செல்லும்போது எதிரே வருபவர்களைக் கண்டால் இடது புறம் ஒதுங்கி வழி விடுதல் நம் கடமை என உணர்தல்!

3.வாகனங்களை வலது மற்றும் இடது புறமாகத் திருப்பும்போது சிக்னல் விளக்குப் போடுதல் அல்லது உரிய சைகையினைத் தங்கள் இடது வலது கைகளால் காட்டித் திரும்புதல்!

4. நெருக்கத்தில்  மஞ்சள் சிக்னல் விழுவதைக் கண்டவுடன் வாகனத்தை உடனடியாக நிறுத்தத் தேவையில்லை! அப்படி நிறுத்தினால் நம்மைப் பின்தொடர்ந்துவரும் அவசரக் குடுக்கைகள் நமது வாகனத்தின் பின்பக்கத்தில் வந்து மோதக்கூடும்! அதே சமயம் தொலைவிலேயே மஞ்சள் சிக்னலைப் பார்த்துவிட்டால் கட்டாயம் தங்களின் வாகனத்தை நிறுத்த வேண்டும் என்ற உணர்வுடன் நிறுத்துதல்!

5.சிகப்பு சிக்னல் இருக்கும்போது சாலையில் எந்தப் போக்குவரத்து இல்லையென்றாலும் அவசரப்படாமல் பச்சை விளக்கு போடும்வரை அமைதியாகக் காத்திருத்தல்!

6.சிக்னலில் நிற்கும்போது வாகனத்தை நிறுத்தி நம் எரிபொருளைச் சேமிப்பதுடன் நல்ல சுவாசக் காற்று நகர மக்களுக்குக் கிடைக்க நம்மாலான பங்களிப்பை நிறைவேற்றல்!  பச்சை விளக்கு விழுந்தவுடன் நம் வாகனம் தொல்லை தராமல் உடனே கிளம்புமாறு  நல்ல நிலையில் வைத்திருத்தல்!

7.போக்குவரத்து நெரிசலில் எவரேனும் தவறாக நம் பாதையில் வந்து குறுக்கிட்டாலோ அல்லது இலேசாக மோதிவிட்டாலோ உணர்ச்சி வசப்படாமல் ஒரு புன்னகை செய்து அவரது தவறை மன்னித்தால் அவரும் தம் குற்றம் அறிந்த உணர்வுடன் விலக  இது அநாவசிய சண்டைகளைத் தவிர்க்க உதவுதல்!

8.வாகனத்தில் செல்லும்போது தவிர்க்க இயலாமல் எச்சில் துப்ப வேண்டி வந்தால் இடதுபுறம் ஒதுங்கிச் சென்று அருகில் கட்டாயம் கழிவுக் கால்வாய் இருக்கும் அங்கு துப்பிவிட்டுச் செல்லுதல்!

9.பேருந்து ஓட்டுநரென்றால் உரிய நிறுத்தங்களில் நிறுத்திப் பயணிகளைப் பத்திரமாக இறக்கிவிட்டுச் செல்லுதல்!

10.பேருந்துகளை நகர்ப்புறங்களில் ஓட்டும்போது போக்குவரத்து நெரிசலைத் தவிர்ப்பதற்காகக் குறிப்பிட்ட தெருக்களில்தான் செல்ல வேண்டுமென்ற காவல் துறையின் விதிகள் அமுலில் இருக்கும் என்றால் அந்த வழியிலேயே எப்பொழுதும் சென்று குறிப்பிட்ட நிறுத்தங்களில் ஏறி இறங்கும் பயணிகளுக்கு அலைச்சல் இல்லாமல் சேவை செய்தல்!

11.நகரங்களில் மணிக்கு 30 கல் வேகத்தில்தான் செல்ல வேண்டும் என்ற விதியைத் தவறாமல் நெரிசல் மிக்க இடங்களில் (குறிப்பாகப் பெரிய வாகனங்கள்) கடைப்பிடித்தல்!

12.நகரங்களில் இடது பக்கமாகச் செல்லாமல் வலது பக்கம் தாறுமாறான வேகத்துடன் எதிரே வரும் வாகனங்கள் ஒதுங்க இடமின்றித் தவிக்கும் நிலையை உருவாக்காமல் நிதானமாக இடது புறமாகச் செல்லுதல்!

13.இரவில் நெடுஞ்சாலைகளில் இருசக்கர வாகனம் எதிரில் வந்தாலும் அதிகப் பிரகாசமுள்ள விளக்கை அணைத்து அவருடைய கண் பார்வைச் சிரமத்தைக் குறைத்தல்!

14.இரவில் பின்புறமாக வாகனத்தை எடுக்கும்பொழுது கட்டாயம் பின்புற விளக்குகள் எரியுமாறு தங்களின் வாகனத்தை வைத்திருத்தல்!

15.சாலை ஓரங்களில் வாகனங்களை நிறுத்த நேர்ந்தால் இடது பக்கம் நன்கு ஒதுக்கி பின்னால் வரும் வாகனங்களுக்கு இடையூறு இன்றி நேராக  நிறுத்துதல்!

16.ஒரு வழிச் சாலையென்றாலும் முன்னே செல்லும் வாகனத்தை முந்த நேரும்போது வாகனத்தின் விளக்குகளை மாற்றி மாற்றி சிக்னல் செய்து வழி கிடைத்த பின்னரே முந்துதல்!

17.இருவழிப் பாதையெனில் இடது பக்கம் நமக்கு எவ்வளவு உரிமையுள்ளதோ அது போல வலது பக்கம் எதிரே வருபவர்களுக்கு முழு உரிமை உள்ளதென நினைந்து அவர்களின் வழியில் குறுக்கிடாது கண்ணியம் காத்தலே போக்குவரத்து விபத்துகளைத் தவிர்ப்பதில் நம்முடைய பங்கு தலையாயதானதெனக் கருதுதல்!

இதோ மேற்கண்ட போக்குவரத்தில் நாம் மேற்கொள்ள வேண்டிய ஒழுங்கினை உங்களுக்குள் சற்று உள்வாங்கிப் படியுங்கள்!

பத்திற்கும் மேற்பட்டவைகளை அல்லது எல்லாவற்றையும் நான் சரியாகக் கடைப்பிடிக்கிறேன் என உங்கள் மனதிற்குள் பட்டால் உங்களால் போக்குவரத்திற்கு எந்தவித இடையூறுகளோ, அதன் காரணமாக விபத்துகளோ ஏற்பட வாய்ப்பில்லை!

இந்த விதிமுறைகளை இதுவரை நான் கண்டுகொண்டதில்லை! ஆனால் இனிமேல் நான் கண்டிப்பாக இவற்றைக் கடைபிடிப்பேன் என உங்கள் மனதிற்குள் உறுதி கொண்டால் ஒரு பொறுப்புள்ள சாலை ஆளுநராக நீங்கள் தகுதி உடையவராவீர்கள் என்பது நிச்சயம்!

Read More...

புதன், 17 செப்டம்பர், 2014

தமிழர் தந்தை பெரியார்!

Leave a Comment
இன்று தமிழர் தந்தை பெரியார் அவர்களின் பிறந்த நாள்!

தென்னாட்டு சாக்ரடீசு எனப் போற்றப்பட்ட ஒரு ஒப்பற்ற உலகத் தலைவர் பிறந்த நூற்றாண்டில் தமிழராகப் பிறப்பெடுத்த ஒவ்வொருவரும் பெருமைப்பட வேண்டும்!

பகுத்தறிவு ஒளியினைத் தம் எழுத்தாற்றலாலும், பேச்சாற்றலாலும், தள்ளாத வயதிலும் தம் ஓய்வறியாத உழைப்புடன் தமிழகமெங்கும் பயணப்பட்டுப் பரப்பிய அந்த மாபெரும் தலைவர் மறைந்த பின்னர் அவரது இடத்தைப் பகுத்தறிவுத் தலைவர்கள் எவருமே நிரப்பவில்லையெனலாம்!

தந்தை பெரியாரால் வளர்ந்த திராவிட இயங்கங்கள், அவர் தீவிரமாக எதிர்த்த சாதி அமைப்புகளையும், மூடப் பழக்க வழக்கங்களையும் தந்தையின் மறைவிற்குப் பிறகு அதிகளவில் வளர்த்து வந்துள்ளமைதாம் வேதனையிலும் வேதனை!

அவரது மறைவிற்குப் பின்னர்தாம் சாதி அமைப்புகள் வாக்கு வங்கிக்கென ஏராளமாகத் தமிழகத்தில் பெருகி விட்டன! இந்தச் சாதி அமைப்புகளைத் தங்களின் வாக்கு வங்கிக்கென வளர்த்து விட்ட இரு பெரும் திராவிட இயக்கங்கள் இன்று இவர்கள் தயவின்றி ஆட்சி சுகம் அனுபவிக்க இயலாது யானை தன் தலையின் மீதே மண்ணள்ளிப் போட்டுக் கொள்வது போலத் தேர்தலுக்குத் தேர்தல் அணி மாறும் பச்சோந்தி குணச் சாதி அமைப்புகளைத் தங்களின் தேவைக்கு அவ்வப்போது ஊறுகாயெனப் பயன்படுத்தி வருகின்றன!

தந்தை பெரியார் அவர்கள் வணிகம் செய்த அவரது வணிக வளாகம் இன்று பல கோடி ரூபாய்கள் மதிப்பில் இருப்பதால் இந்த இடத்தை யார் கைப்பற்றுவது என்ற சொத்துச் சண்டை காரணமாக வழக்கு மன்றத்தில் வழக்கு நடைபெறும் நிலையில் கவனிப்பார் இன்றிப் பரிதாபமான நிலையில் பாழடைந்து நிற்பதை அந்த வழியே செல்ல நேரிடும் எவரும் மனம் கலங்கித் தவிக்கத் தவறுவதிலலை! 

உலகளாவிய புகழ் படைத்த அந்த ஒப்பற்ற தலைவருக்கு அந்த இடத்தில் ஒரு நினைவு மண்டபமோ அல்லது ஒரு நவீனமான நூலகமோ அமைந்தால் தந்தை பெரியார் அவர்களின் உழைப்பிற்குத் தமிழினம் உரிய மரியாதை செழுத்திடும் நன்றிக்கடனுக்கு ஒப்பாகும்! ஏனோ இந்த விசயத்தில் இரு திராவிட இயக்கங்களும் தங்களின் வாக்கு வங்கிக்கென மவுனம் காக்கின்றன! 

தமிழின மேன்மைக்கெனத் தந்தை பெரியார் கண்ட கனவுகள்! ஏராளம் ஏராளம்! அந்தக் கனவுகளை முழுமையாக நிறைவேற்ற ஐந்தாம் தமிழ்ச்சங்கம் அவர்தம் பிறந்த நாளில் உறுதியேற்கிறது! 

தந்தை பெரியாரின் மறைவிற்குப் பின்னர் தமிழகத்தில் புற்றீசலாகப் புறப்பட்டு தமிழக மக்களைத் தங்களின் செல்வாக்கால் பிரித்தாளும் சாதிய இயக்கங்களின் ஆதிக்க மனப்பான்மையை நடுநிலையான தமிழர்கள் உணர்ந்து அவர்களை முற்றிலும் நிராகரித்து பிரிந்து நிற்கும் சாதிகள் ஒன்றுபடத் தேவையான வழிமுறைகளை இளைய சமுதாயத்தின் முன் கொண்டு செல்ல முன்வர வேண்டும்! இந்த நிலை உருவாக ஐந்தாம் தமிழ்ச்சங்கம் பாடுபடும்!

மேலும் தமிழகத்தை அமைதிப் பூங்காவாகத் திகழவிடாமல் மதவாத வன்முறை பரப்ப முயலும் மதவாதச் சக்திகளை மக்கள் அடையாளம் கண்டு நடந்து முடிந்த பாராளுமன்றத் தேர்தலில் வாக்களித்தது போல மதவாத மற்றும் சாதியவாத சக்திகளை மற்றுமன்றி ஊழலில் திலைக்கும் இயங்கங்களையும், 

சந்தர்ப்பவாத பச்சோந்தி குண அரசியல் இயக்கங்களையும், முற்றிலும் நிராகரிக்கும் நிலையினை வருகின்ற 2016 ஆண்டு நடைபெற உள்ள சட்ட மன்றத் தேர்தலில்  வாக்களித்து மீண்டும் மகத்தான ஒரு வரலாற்றுச் சாதனையைத் தமிழ் மக்கள் நிகழ்த்தத் தயாராக 

ஐந்தாம் தமிழ்ச்சங்கம் தன்னாலான முயற்சியை வெளிப்படுத்தும் எனத் தந்தை அவர்களின் இந்த மகத்தான பிறந்தநாளில் உறுதியேற்கிறது!

குறிப்பு!
பகுத்தறிவும் நானும் என்ற ஒரு கட்டுரையில் என்னுள் பகுத்தறிவு எண்ணங்கள் தோன்றுவதற்கு எனது பிறப்பும் ஒரு காரணமாகும் என்பதை நான் இங்கு கட்டாயம் குறிப்பிட்டாக வேண்டும்! எனது முப்பாட்டனார் ஒரு மிகச் சிறந்த பகுத்தறிவாளராகத் திகழ்ந்திருக்க வேண்டும்! 

அவர் தமிழக மதவாத அமைப்புகள் தொன்று தொட்டு கட்டிவரும் பொய்யான இதிகாசப் புராணக் கதைகளை ஏற்காத மன நிலைக்குச் சொந்தக்காரராக விளங்கியிருக்க வேண்டும்! அதனால்தான் என்னவோ தனது மகனான எனது தந்தை வழிப் பாட்டனாருக்கு இரண்யன் எனப் பெயரிட்டுள்ளார்! 

இரண்ய கதையைத் தமிழகத்தில் பக்திமார்கள் ஒருவிதமாகவும் பகுத்தறிவுவாதிகள் ஒருவிதக் கண்ணோட்டத்திலும் இன்றுவரை கண்டுவந்துள்ளதே இதற்குச் சாட்சியமாகும்! 

தமிழர்களை அரக்கர்கள் என இராமாயணம் போன்ற கதைகளில் இழிவு படுத்தியிருப்பதை ஏற்றுக் கொள்ள இயலாத எனது முப்பாட்டனார் அதனால்தான் என்னவோ இரண்யன் ஒரு அரக்கனல்ல எனக் கருதித் தனது மகனுக்கு இரண்யன் எனப் பெயரிட்டிருப்பதாலேயே அவர் வம்சத்தில் பிறந்த எனக்குள்ளும் இயல்பாகவே பகுத்தறிவு சார்ந்த எண்ணங்கள் தோன்றியிருப்பதாக என்னால் உணர முடிகிறது! 

தந்தை பெரியார் அவர்கள் தாம் வாழ்ந்த காலத்தில் தம் சுயம் அறியாமல் வாழ்ந்திருந்தாலும் என்னைப் பொறுத்தவரை அவரும் ஒவ்வொரு நூற்றாண்டிலும் அறியாமையிலும், மூடப் பழக்க வழக்கங்களிலும் சிக்கித் தவிக்கும் மக்களின் வாழ்க்கை முறையை மாற்றியமைக்கப் பிறப்பெடுத்த ஒரு ஞானத் தவச் சித்தர்தாம்!

தந்தை பெரியார் அவர்களின் சீரிய பகுத்தறிவுப் பணிகள் தொடரத் தமிழ்ச்சித்தர்களின் எண்ணங்கள் தாங்கிய வண்ணம் ஐந்தாம் தமிழ்ச்சங்கத்தின் எழுத்துப் பணியும் என்றென்றும் தொடர்வதற்கெனத் தன் எண்ணங்களைப் பேரண்டப் பெருவெளியிலிருந்து பரவச் செய்யும் தந்தை அவர்களின் புகழ் ஓங்குக!

Read More...

செவ்வாய், 16 செப்டம்பர், 2014

செய்க தவம்!

Leave a Comment
செய்க தவம்! செய்க தவம்! நெஞ்சே தவம் செய்தால்
எய்த விரும்பியதை யெய்தலாம்! வையகத்தில்
அன்பிற் சிறந்த தவமில்லை! அன்புடையார் 
இன்புற்று வாழ்தலியல்பு! இது மகாகவி பாரதி வாக்கு!

தமிழகத்தில் பெரும்பாலான மக்கள் உயிரினங்களைப் பலிகொடுத்துத் தத்தம் குலதெய்வங்களைத்  தவம் செய்கிறோம் என்ற பெயரில் வணங்கி வருகின்றனர்!

அன்பே சிவம் எனும் உயரிய சொல்லுக்கேற்ப உயிர்களின் மீது அன்பு செழுத்துவதே உண்மையான தவமாகும்! வண்டியில் பிணைக்கப்பட்டுத் தன்னைச் சுமந்து வந்த எருதினைத் தடவிக்கொடுத்துக்  கண்ணீர் சொரிந்து என்னைச் சுமந்ததால் உனக்கு வலி ஏற்பட்டதோ எனக் கண்ணீர் பெருக்கிய வள்ளலாரின் செய்கையே உண்மையான உயரிய தவமாகும்!

பாரதப் போரில் இதோ என் எதிரே நிற்கும் அனைவரும் என் உடன் பிறந்தவர்கள், என் உறவினர்கள் எனப் போர் செய்ய மறுத்துத் தம் ஆயுதங்களைத் துறந்து தவம் செய்யக் கானகம் சென்ற அருச்சுனன் செய்த தவமே உண்மையான தவம்!

ஒரு முறை சேலம் மாவட்டம் தாரமங்கலம் பகுதியில் ஒரு சிற்றுந்தில் அமர்ந்திருந்தேன்! அந்தச் சிற்றுந்தில் அமர்ந்திருந்த கிராமத்துப் பெண்கள் சுவாரசியமாக ஒரு பேச்சுவார்த்தையில் ஈடுபட்டிருந்தனர்! அவர்கள் என்ன பேசிக்கொள்கின்றனர் என்பதைக் கேட்க நானும் ஆவலுற்றேன்!

அவர்கள் பேச்சில் எனக்குத் கிடைத்த தகவல் இதுதாம்! 

அன்றைய தினம் அந்தப் பகுதியில் உள்ள ஒரு கோவிலில் ஒரு கொழுத்த பன்றியினைப் பலி கொடுக்கப்போகிறார்களாம்! அதற்கென ஒரு பன்றியினைக் குட்டியாக இருக்கும்போதே தங்கள் பிள்ளையைப் போலச் செல்லமாக வளர்த்து வருவார்களாம்! 

விழா நாளுக்குள் அந்தப் பன்றி நன்கு வளர்ந்து கொழுகொழுவெனக் காட்சியளிக்குமாம்! விழா நாளன்று அதற்கு மாலை மரியாதை செய்து அலங்கரித்து ஊர்வலமாக அழைத்து வருவார்களாம்! இதைத்தான் அவர்கள் சுவாரசியமாகப் பேசிக்கொண்டிருந்தனர்!

இதன் பின்னர் அவர்கள் தெரிவித்ததுதான் என்னை மனம் பதற வைத்தது! 

இவ்வாறு அழைத்து வரும் அந்தப் பன்றியினைத் தங்கள் கோயிலில் ஆண்கள் பலர் கூர்மையான ஈட்டிகள் கொண்டு கதறக் கதறக் குத்திக் கொன்று பலி கொடுப்பார்களாம்! இதையும் அவர்கள் உற்சாகத்துடன் தங்களுக்குள் மகிழ்ச்சி பொங்கப் பேசிக் கொண்டனர்!

இந்த உரையாடல் முடியும்போது அந்த வழியாக அந்தப் பலி ஊர்வலம் கடந்து சென்றது! நான் அவர்களில் சற்று வயதான ஒரு அம்மாவிடம், அம்மா ஒரு பிள்ளையைப் போல பாசம் காட்டி வளர்த்த அந்தப் பன்றியைத் தெய்வத்திற்கென அதுவும் குரூரமாகப் பலி கொடுக்கின்றீர்களே இதுவே அந்தத் தெய்வம் பலி கேட்கிறது என்பதற்காக நீங்கள் பெற்றெடுத்த ஒரு குழந்தையைப் பலி கொடுப்பீர்களா என்று வினவினேன்! 

என் பேச்சில் தெரிந்த நியாயத்தை ஏற்ற அந்தத் தாய்மார்களும் நீங்கள் சொல்வது நியாயம்தான்! பிள்ளையைப் போல வளர்த்த ஒரு உயிரை இப்படி அநியாயமாக வதைப்பது தவறுதான் என ஒப்புக்கொண்டனர்!

இது போன்ற ஏராளமான கொடிய உயிர்ப்பலிகள் தமிழகமெங்கும் பக்தி என்ற பெயரில் இன்றும் தொடர்ந்து கொண்டுதான் உள்ளன! எனது பங்காளி முறை உறவினர்கள்கூட வருடாவருடம் இது போன்ற பலி கொடுக்கும் நிகழ்வுகளைத் தொடர்கின்றனர்! இதனைத்தாம் அவர்க்ள குலதெய்வ வழிபாடு என்றும் அழைக்கின்றனர்!

அறியாமையில் திலைக்கும் இவர்களிடம் நம்முடைய அறிவுரைகள் ஏறாது என்பதால் நான் அவர்களின் அழைப்பினை இதுபோன்ற தவங்களில் கலந்து கொள்ளச் சொல்லும்போதெல்லாம் நிராகரித்துவிடுகிறேன்! வீட்டு வரி என்ற பெயரில் இவர்கள் கேட்கும் ஒரு தொகையையும் நான் கொடுப்பதில்லை!

உயிரினங்களை நம் மனமறிந்து துன்புறுத்துவது கூடாது, உயினங்களைக் கொன்று தின்னல் பாவம் என்ற சித்தர்களின் வழியில் வாழ முடிவு செய்து விட்ட என் போன்றவர்கள் பாம்பு தின்னும் ஊரில் நடுக்கண்டம் எனக்கென வாதிடவா முடியும்?

இந்த உலகில்  இன்றும் வன்முறை எண்ணங்கள் தலை தூக்குவதற்கு இதுபோன்ற உயிர்பலி விழாக்கள் நடத்தப்படுவதுதாம் தலையாய காரணம்!

அன்பை மட்டுமே கொள்கையாகக் கொண்ட தெய்வங்கள் நம் கண்ணுக்குப் புலப்படாமல் உலகில் மறைவாக வாழ்ந்தால் உயிர்களைக் கொன்று தரும் இரத்தப் பலி, அலகு குத்துதல், தீ மிதித்தல், அங்கம் வருத்திப் பிரார்த்தனைகள் நிறைவேற்றல் போன்ற செயல்களை அந்தத் தெய்வங்கள் நிச்சயம் விரும்ப மாட்டார்கள்!

உலகை இரத்தக் களரியில் அச்சுறுத்தும் சாத்தான்கள் எனும் கொடிய குண தெய்வங்களே இதுபோன்ற இரத்தம் சிந்தும் உயிர்ப்பலிகளை விரும்புகின்றன! 

அறியாமையில் திலைக்கும் நம் மக்கள் தங்களின் வாழ்விற்கு உதவும் தெய்வங்கள் என்ற அறியாமையில் இதுபோன்ற இரத்தவெறித் தெய்வங்களைத்தான் உண்மையில் சாந்தப்படுத்துவதாகக் கருதித் தவறாக அவைகளின் இரத்தவெறியை அதிகரித்து வந்துள்ளனர்!

இனியாவது தங்களின் அறியாமையிலிருந்து மக்கள் வெளியேறி அன்பைப் போதிக்கும் உண்மையான தெய்வங்களை அடையாளம் கண்டுகொண்டால் அவர்களைத் தேடி காடு மேடு மலை குகை என எங்கும் அலைய வேண்டியதே இல்லை!

உயிர்கள் மீது மிக்க அன்போடு உள்ளத்தில் எழும் அன்பு உணர்வோடு இந்தப் பேரண்டப் பெருவெளியில் தங்கள் எண்ணங்களைத் தூய்மையாக வெளிப்படுத்தினால் உங்களைச் சுற்றி நல்ல தெய்வங்கள் எப்பொழும் கண்ணுக்குப் புலப்படாமல் நன்மை செய்து நிற்கும்!

அன்புடன் உங்கள் உள்ளே கடந்து பாருங்கள்!  உள்ஒளி பரவும்! உயரிய வாழ்க்கை அமையும்! கடவுள் தன்மை உங்களுக்குள்ளேயே நிலைபெற்று நிறைந்து நிற்கும்!

Read More...

திங்கள், 15 செப்டம்பர், 2014

பேரறிஞர் அண்ணா!

Leave a Comment
அண்ணா! இந்த மூன்றெழுத்துச் சொல் பெருந்தலைவர் காமசராசரின் பொற்கால ஆட்சிச் காலத்தை முடிவுக்குக் கொண்டுவந்த வரலாற்றுக்குச் சொந்தமானது!

காமராசர் ஆட்சிக்காலத்தில் நிலவிய கடும் பஞ்சத்தின் காரணமாகத் தமிழக ஏழை எளிய மக்கள் குறிப்பாகப் படிப்பறிவற்ற இளைஞர்கள் உட்பட பாமர மக்கள் தன்னிலை மறந்திருந்த நேரம் அது! 

ஈவேரா என்ற மூன்றெழுத்து வெண்தாடி வேந்தரின் தம்பியாகத் தமிழக அரசியலில் களமிறங்கிய அறிஞர் அண்ணா அவர்களின் ஒரு ரூபாய்க்கு ஒரு படி அரிசி என்ற திட்டத்தால் அகமகிழ்ந்த அன்றைய தமிழக மக்கள் வெல்லவே முடியாத வாய்மைத் தலைவரான காமராசரை ஆட்சி பீடத்திலிருந்து அகற்றி பேரறிஞர் என அந்நாளில் போற்றப்பட்ட அண்ணா அவர்களைத் தமிழகத்தின் முதலமைச்சர் பதவியில் அமர்த்தி அழகு பார்த்தனர்!

தன்னுடைய பேரைச் சொல்லிப் பிற்காலத்தில் ஆட்சி செழுத்தப்போகும் தம் தம்பிகள் இன்றைக்குத் தமிழகத்தை வெகுவாகச் செல்லரித்துக் கொண்டிருக்கும் இலஞ்சத்தையும் ஊழலையும் வளர்த்துச் சீரழிப்பதை உடல் ரீதியாக அறிந்தாரோ என்னவோ அந்தத் தலைவர் தாம் பதவி ஏற்ற ஈராண்டுக்குள்ளாகவே தம் உடலில் புற்று நோய் தாக்கி இயற்கை எய்தினார்!

இன்று உலகளவில் புற்று நோய்க்குப் பலியாகும் பெரும்பாலானவர்கள் புகையிலைப் பழக்கத்திற்கு அடிமையானவர்கள் என்ற வகையில் அறிஞர் அண்ணா அவர்களுக்குப் புகையிலையில் தயாராகும் மூக்குப் பொடி போடும் பழக்கமிருந்ததே அவரது உடலில் புற்று நோய் தாக்குவதற்கு மற்றொரு காரணியாயிற்று!

ஈராண்டுக்குள் அண்ணா அவர்களைக் காலன் அழைத்துக் கொண்டாலும், தமிழ்நாடு என்ற பெயரினை இந்த மண் பெறுவதற்குச் சட்டமியற்றிப் பெயர் மாற்றம் செய்த பெருமைக்குச் சொந்தக்காரர்!

மாற்றுக் கட்சியினரையும் மதிக்க வேண்டும் என்ற பண்பாளர் வகுத்த கடமை கண்ணியம் கட்டுப்பாடு போன்ற கோட்பாடுகள் அண்ணாவால் வளர்ந்த திராவிட இயக்கங்களால் காற்றில் பறக்க விடப்பட்டதுதாம் வேதனையிலும் வேதனை!

அண்ணா அவர்கள் குறிப்பிட்டது போலப் பதவி என்பது ஒருவர் தம் மீது அணியும் துண்டு போன்றது என்பதை இன்றைய திராவிட ஆட்சியாளர்கள் அது கர்ணனின் கவச குண்டலம் போலத் தம்முடன் பிறக்கும் போதே இருப்பதாகப் பேராசைப்பட்டு நிரந்தரமாக அணிந்திருப்பதை எதையும் தாங்கும் இதயம் படைத்த அண்ணா அவர்களின் ஆருயிர் இன்றைக்கிருந்தால் தாங்குமா என்பதை எம்மால் அறிய இயலவில்லை!

அண்ணா என்ற ஆலம் விதை பகுத்தறிவுத் தந்தை பெரியார் அவர்கள் இல்லத்தில் எளிமையாகத் தமிழக அரசியல் நிலத்தில் விதைக்கப்படுவதற்கு முன் அவர் விடுதலை இதழ் ஆசிரியராகப் பணியாற்றிய அந்த எளிய இல்லத்தைப் பார்வையிடும்போது எம் கண்கள் குளமாகின்றன!

அந்த ஆலம் விதை அடையாறு ஆல மரமாகப் பல்வேறு இயக்கங்களாகப் பிரிந்து விழுதுகள் விட்ட நிலையில் அடிமரம் காணாமல் போனது போன்று பேரறிஞர் அண்ணா அவர்களின் எளிமையும், தமிழக மக்களின் முன்னேற்றத்திற்காக அவர் கண்ட கனவுகளும் இன்றுவரை கனவாகவே காணாமல் போனதுதாம் வேதனையிலும் வேதனை!

நடுத்தர மக்கள் வாங்கும் ஒரு கிலோ பொன்னி அரிசி இன்று 55 ரூபாய்க்கு விற்கும் நிலையில் இன்றைய ஆட்சியாளர்கள் இருபத்தைந்து கிலோ அரிசி இலவசமாகக் கொடுக்கிறோம் என்ற மலிவு விலை விளம்பரத்தில் தங்களின் ஆட்சி சுகத்தைத் தக்க வைத்திருக்கும் நிலையினைப் பாராட்டுபவர்கள், ஒன்றை மட்டும் மறந்தே விட்டனர்!

படியரிசி ஒரு ரூபாய்க்கு அண்ணா அவர்கள் கொண்டு வந்த திட்டத்தை விட இது ஒன்றும் மேலானதல்ல! உண்மையைச் சொல்லப்போனால் ஏராளமான இலவசத் திட்டங்கள் என்ற போதையில் தமிழக மக்களை அமிழ்த்து வைத்து ஆட்சி சுகம் காணும் ஆட்சியாளர்கள் மக்களை வாக்கு வங்கிக்கெனவே பிச்சைக்காரர்கள் நிலையில்தான் வைத்துள்ளனர் என்பதுதாம் மறுக்க இயலாத உண்மை!

தமிழர்களின் திருமண அமைப்பில் தங்களின் பழக்க வழக்கங்களை நுழைத்துவிட்ட மதவாத அமைப்பின் திருமண முறைப்படி ஒரு பெண்ணுக்கு அவளது கணவன் தனது உழைப்பில் உருவான பணத்தில் அரைப் பவுன் தாலியை இதுவரை அணிவித்து வந்துள்ளான்! 

அவனையும் முழுச்சோம்பேறியாக்கி அவன் தன் உழைப்பில் அணிவிக்க வேண்டிய தாலியினை இன்றைக்குப் பேரறிஞர் அண்ணா அவர்களின் பெயர் தாங்கிய இயக்கம் டெண்டர் விட்டுக் கொள்முதல் செய்து இலவசச் சீர்வரிசைகளுடன் திருமணமும் முடித்து வைப்பதைப் பகுத்தறிவாளரான அண்ணா அவர்கள் இன்றிருந்தால் ஏற்றுக் கொள்வாரா என்பதை அவரது தம்பிகளின் மனச்சாட்சிக்கே விட்டுவிடலாம்!

பேரறிஞர் அண்ணா அவர்களின் இந்தப் பிறந்தநாள் துவங்கியாவது மக்களிடம் உண்மையான அரசியல் குறித்த விழிப்புணர்வும், மதவாதம் குறித்த பகுத்தறிவும், வள்ளுவமும், வள்ளலாரும், மகாகவி பாரதியும், பாவேந்தரும் கனவு கண்ட உன்னதத் தமிழகம் உருவாக ஏற்பட வேண்டுமென்பதே எம்முடைய ஏக்கமுள்ள தமிழ்க்னவாகும்!

Read More...

மனைவி அமைவதெல்லாம்!

Leave a Comment
எனக்குத் திருமண வயது வந்தவுடன் எனது தந்தை எனக்குப் பெண் தேடத் துவங்க முடிவு செய்து முதலாவதாகத் தனது அத்தை மகளைச் சந்தித்து எனக்கேற்ற பெண் ஏதேனும் இந்த நகரில் உள்ளதா என வினவியுள்ளார்! 

அதற்கு அவர் உடனே எனது பேத்தி ஒருத்தி உள்ளார்! அவளைப் பார்த்துவிட்டு வேறு இடம் பார்க்கலாம் எனச் சொல்லவே இருவரும் உடனே எனது வருங்காலத் துணையைப் பார்க்கச் சென்றுள்ளனர்!

அன்றைய தினம் சூலை 1. எனக்கெனப் பார்க்கச் சென்ற தனது வருங்கால மருமகளின் பிறந்த நாள் அதுவாகும்! தனது அத்தை மகளின் மகளாகத் தனக்கு ஏற்கனவே நன்கு பரிச்சயமான எனது வருங்கால மாமியாரையும், அவரது மகளையும் பார்த்தவுடன் இந்தப் பெண்தான் தனது மருமகள் என முடிவு செய்துவிட்டே ஊர் திரும்பினார் எனது தந்தை!

வீட்டிலுள்ள அனைவரிடமும் தீர்க்கமாகத் தான் பார்த்து வந்த பெண்தான் தனது வருங்கால மருமகள் என்று எடுத்தியம்பி, எனது சித்தப்பா அமரர் பழனியப்பன் அவர்கள் தலைமையில் உடனே என்னையும் ஒரு மகிழுந்தில் அங்கு எனது உறவுகள் புடை சூழப் பெண் பார்க்க அனுப்பினார்!

முதல் முறையாகக் பெண் பார்க்கும் படலம்! எனக்குள் இயல்பாகவே இருந்த கூச்ச உணர்வு காரணமாக எனது வருங்காலத் துணைவியை அன்று நான் ஏறெடுத்தும் பார்க்கவில்லை!

எனினும் தாயைப் போலப் பிள்ளை நூலைப் போலச் சேலை என எனது தற்போதைய வளர்ப்பு யசோதை அன்னையாக என் மீது பாசம் செழுத்தும் எனது வருங்கால மாமியாரின் உபசரிப்பும் அவர்தம் குணநலன்களையும் கண்டவுடன் தாயைப் படிக்கட்டுத்துறையில் கண்டால் பெண்ணை வீட்டில் சென்று பார்க்க வேண்டியதில்லை என்ற பழமொழிக்கேற்ப எனது வருங்காலத் துணைவியும் தன் தாயாரின் குணநலன்களைத்தான் கொண்டிருப்பார் என்ற முடிவுடன் திருமணத்திற்குச் சம்மதித்தேன்!

அதன் பின்னர் சில நாட்களில் நடைபெற்ற நிச்சயதார்த்த விழாவில்தான்  எனது வருங்காலத் துணைவியின் முகம் பார்த்துத் தெளிந்தேன்! திருமணம் நிச்சயமான பிறகு பலமுறை இந்த நகருக்குச் செல்ல நேர்ந்தாலும் இன்றுள்ளது போலப் பெண் வீட்டிற்குச் சர்வ சாதாரணமாகத் தன் வருங்காலத் துணைவியைச் சந்திக்கும் சாக்கில் அவர்கள் இல்லத்திற்கு நான் செல்ல முயற்சித்ததில்லை!

செப்டம்பர் 14 நான் எனது மனைவியை வாழ்க்கைத்துணையாகக் கரம் பிடித்த நாள்! நேற்றுடன் இருபத்தெட்டு ஆண்டுகள் முடிவடைந்துவிட்டன! மனைவி அமைவதெல்லாம் இறைவன் கொடுத்த வரம் எனத் தமிழ்க்கவி பாடியதற்கேற்ப வந்தமைந்தவர் எனது மனைவி!

மணமான புதிதில் தன் வருங்கால மருமகள் இவள்தான் எனத் தன் முதல் தேர்விலேயே முடிவு செய்த எனது தந்தையைக் கண்டாலே எனது மனைவி நடுங்குவார்! காரணம் எனது தந்தையின் கண்கள் சற்று பெரியதாக இருந்ததால் அவரது பார்வையே சற்று அச்சமூட்டுவதாக இருக்கும்!

நான் என் தந்தைக்குள் இருக்கும் மென்மைத்தன்மையை எனது மனைவியிடம் எடுத்தியம்பி அவருக்குள் இருந்த அச்சத்தைப் போக்கினேன்! நாட்கள் செல்லச் செல்ல அவரைச் சரியாகப் புரிந்து கொண்ட எனது மனைவியுடன்தான் எனது தந்தை தான் இறக்கும் வரை குடும்ப விவகாரங்கள் எதனையும் என்னிடம்கூடத் தெரிவிக்காமல் ஆலோசித்து முடிவெடுப்பார்!

என்னுடன் பிறந்த மூன்று சகோதர சகோதரிகளிடமும், அவர்கள் குடும்பம் சார்ந்த உறவுகளிடமும் எனது மனைவி இன்றுவரை உரிமையுடன் பழகி வருகிரார்! 

மணமான சில ஆண்டுகள் கழிந்த நிலையில் எனக்கும் எனது தந்தைக்கும் இடையே வணிகம் சார்ந்த கருத்து வேறுபாடுகள் தோன்றும்போதெல்லாம் எனது மனைவி என்றைக்குமே என் பக்க நியாயத்தைச் சார்ந்து நின்றதில்லை! என் பக்கமே உண்மை இருந்தாலும் எனது மனைவி எனது குடும்பத்தவர் பக்கமே இருந்து என்னிடம் வாங்கிக் கட்டிக் கொண்டதும் அதிகம்! இந்தத் தன்மையே எங்கள் கூட்டுக்குடும்ப உறவில் விரிசல் விழாமல் பாதுகாத்து வந்துள்ளதற்குக் காரணமெனலாம்!

எனது துணைவிக்கு எனது உறவினர்கள் மேல் இருந்த அளவற்ற பாசமும், எனது உறவுகளின் நல்லது கெட்டதுக்கெல்லாம் தம்மால் ஆன உதவிகள் செய்ய வேண்டும் என்ற உண்மையான அக்கறையுமே இது வரை எங்கள் உறவுகளிடம் நல்ல தொடர்பில் இருக்க உதவுகின்றது!

ஒருமித்த எண்ணம் என்பார்களே அது போல எனது உறவுகளில் எவருக்கேனும் ஏதேனும் செய்ய வேண்டும் என நான் எண்ணும்போதே அவரும் அதே எண்ணத்தை உடனடியாக வெளிப்படுத்துவார்! இது எனது மனைவி சார்ந்த உறவினர்களிடமும் எங்கள் இருவராலும் ஒருமித்த உணர்வாகப் பெரும்பாலும் வெளிப்பட்டுள்ளது! நான் பேச நினைப்பதெல்லாம் நீ பேச வேண்டும் என்ற நம் தமிழ்க்கவியின் வைர வரிகளுக்கேற்ப எங்களின் ஒருமித்த எண்ணங்கள் இதோ இன்றுவரை தொடர்கின்றன! இனியும் தொடரும்! 

எல்லாம் சரி உங்களுக்குள் கருத்து வேறுபாடுகளே தோன்றியதில்லையா என்ற கேள்விக்கும் என்னிடம் பதில் உண்டு! எங்களுக்குள் பல சந்தர்ப்பங்களில் கருத்து வேற்றுமை ஏற்படுவதுண்டு! அதன் பொருட்டு இருவரும் பேசிக்கொள்ளாத நிலையும் ஏற்படும்! 

ஆனால் இந்த நிலையினை நாங்கள் இருவரும் மூன்று நாட்களுக்கு மேல் நீட்டிக்க அனுமதித்ததிலலை!  எவர் பக்கம் தவறிருந்தாலும் அவரவர் தவறுகளை உணர்ந்து ஒருவருக்கொருவர் விட்டுக் கொடுத்து தங்களிடமுள்ள வீணான பிடிவாதங்களைத் தவிர்த்துக் கொண்டதாலேயே இதுவும் சாத்தியமாயிற்று! 

ஒரே ஒரு முறை நான் பணியாற்றிய இடத்தில் தொடர விருப்பமற்ற மன நிலையில் இருந்தபோது எனது மனைவி அந்த இடத்திலேயே பணி தொடரும்படி என்னை வற்புறுத்திட அதனால் ஏற்பட்ட பிரிவால் சுமார் மூன்று மாதங்கள் எனது குடும்பத்தை விட்டு நான் பிரிந்திருக்க நேர்ந்ததே (இந்தப் பிரிவில் ஏற்பட்ட வெற்றிடத்தையும் வாரத்திற்கொருமுறை நான் இல்லம் வந்து சரிசெய்துவிட்டேன்) எனக்கு நானே எனது தவறுகளுக்கெல்லாம் கொடுத்துக் கொண்ட தண்டனை எனலாம்!

நாங்கள் வசிக்க நேர்ந்த பல்வேறு ஊர்களில் குடியிருந்த வீடுகளுக்கு அருகிலுள்ளவர்களிடம் உறவினர்கள் போலப் பழகி இன்றுவரை எங்களுடன் அந்தக் குடும்பங்கள் தொடர்பில் இருப்பதற்கும் என்னிடம் பழகும் மக்களிடம் சாதிமத பேதம் பாராமல் அவர்களிடம் உறவு பாராட்டி அவர்களுடனான எனது நட்பு தொடர்வதற்கும் எனது மனைவியின் நற்குணமே காரணமெனலாம்! 

எனது வணிகம் சார்ந்த துன்பங்களால் எனது கரம் பிடித்த நாள் முதற்கொண்டு இன்றுவரை இன்பங்களை விடத் துன்பங்களையே பலமுறை அனுபவித்து வந்திருந்தாலும் என் வாழ்க்கைப் பாதை சரிவர அமையக் கவியரசின் பாடல் வரிகளுக்கேற்ப எனது குடும்ப வண்டியின் சரிசமமான சக்கரமாகத் திகழ்வதாலேயே எனது மனைவியின் தயவால் எனது வாழ்க்கை வண்டி ஓடிக்கொண்டிருக்கிறதெனலாம்! 

எங்களுக்குப் பிறந்த முதல் மகள் பிறவியிலேயே உடலில் ஒருவித குறையுடன் பிறந்து எங்களுடன் வாழ்ந்த இருபது மாதங்களும் எனது துணைவி எனது வீட்டு இலக்குமியாகத் திகழ்ந்த அந்த மழலைக்கு ஒரு கைதேர்ந்த செவிலியாகப் பணியாற்றி அனுபவித்த துன்பங்கள் அனைத்தும், எனது இரண்டாவது மகளின் பிறப்பிற்குப் பின்னர் சற்று மறைந்தாலும் இன்றுவரை அந்தச் செல்வத்தை இழந்துவிட்டதற்காக மனதுக்குள் நாங்கள் இருவரும் தவிப்பதை எங்களைத்தவிர யாரும் அறிய இயலாது! 

உலகில் பிறப்பெடுப்பவர்க்கெல்லாம் இது போன்ற வாழ்க்கை அமைவது சாத்தியமா என எனக்குள் நான் எண்ணும்போதெல்லாம், நல்ல மனைவி! நல்ல பிள்ளை! நல்ல குடும்பம்! தெய்வீகம்! என நானும் எனது மனைவியும் பிறந்த இடங்களும் சிறப்பாக அமைந்ததால்தான் எங்கள் துன்பங்களுக்கிடையிலும் நாங்கள் சிறப்பாக வாழ முடிகிறதெனலாம்! 

எழுதுவதற்கு இன்னும் ஏராளம் இருந்தாலும் ஒரு பானைச் சோற்றுக்கு ஒரு சோறு பதம் என்பது போல எனது இன்ப துன்பங்களில் சிவசக்தியாக விளங்கி இன்றுவரை எனது வாழ்வின் ஏற்றத்திற்குத் தோள் கொடுத்துவரும் எனது மனைவியின் சிறப்பியல்புகளைப் பட்டியலிடுவதற்குத் தவறி விடக்கூடாது என்பதாலேயே இதனை எழுத நான் இங்கு கடமைப்பட்டுள்ளேன்!

Read More...

சனி, 13 செப்டம்பர், 2014

கொழுத்த புறா!

Leave a Comment
தங்கசாமியும் ரங்கனும் இளம் பிராயம் முதல் நண்பர்களாக ஒரே தெருவில் எதிரெதிர் வீட்டில் வசிப்பது மட்டுமன்றி இருவரும் இன்றுவரை தங்கள் நட்பினை வணிகத்திலும் வளர்த்து வந்துள்ளனர்!

இளமையில் இருவரும் கொண்டிருந்த இலட்சியங்கள் தங்களின் பிறந்த மண்ணிற்காகத் தங்களது உழைப்பை நல்குவது என! ஆனால் நடந்ததோ வேறு! வளர்ந்து ஆளாகியதும் தங்களின் வாழ்க்கை வசதிகளை மேம்படுத்திக் கொள்வதற்காக அரசியலைத் தங்களின் இருப்பிடமாக்கிக்கொண்டு இளம் வயது இலட்சியங்களை அதன் அடியில் புதைத்து விட்டனர்!

அரசியல் தந்த சலுகைகளால் இவர்களின் ரியல் எஸ்டேட் தொழில் கட்டைப் பஞ்சாயத்துகளால் அமோகமாக வளர்ந்து ஆடம்பர வாழ்விற்கும் வழி வகுத்தது! 

தன் வீட்டு மாடியில் அமர்ந்து கொண்டு பழைய நினைவுகளில் தனது வளர்ச்சியை அசை போட்டவாறு தன் எதிரே நிறைந்திருந்த புறாக்களுக்கு இரை போட்டுக்கொண்டிருந்தார் தங்கசாமி! 

இந்தப் புறாக்கள் அனைத்துமே ரங்கன் வளர்ப்பவை! இரண்டு மாதங்களாகத்தான் ரங்கனுக்குப் புதிதாக புறாக்கள் வளர்க்கும் ஆசை! எதிரெதிர் வீடென்பதால் தங்கசாமியின் வீட்டு மாடியிலும் அவை பறந்து வந்து அமர்ந்து கொண்டு பயமின்றி இரை தேடும்!

தங்கசாமிக்கு அவற்றில் ஒரு குறிப்பிட்ட புறாவைத்தான் மிகவும் பிடிக்கும்! கொழுகொழுவென்றிருக்கும் தாதா என அவரால் செல்லமாக அழைக்கப்படும் அந்தப் புறா தன் முன்னால் இரைந்து கிடக்கும் தீவனங்களை மற்ற புறாக்களையும் காகங்களையும் உண்ணவிடாமல் தலையைச்  சிலுப்பியவாறு விரட்டிவிட்டுத் தானே  உண்ணும் அழகினை அவர் கண் கொட்டாமல் பார்த்து இரசிப்பது வழக்கம்!

மற்ற புறாக்கள் பாவம் பரிதாபமாக அதை எதிர்க்க இயலாமல் அது கொத்திச்  சிதறுகின்ற இரையை மட்டும் பொறுக்கிவிட்டுத் தங்களின் கூட்டிற்குத் திரும்பிவிடும்! 

தாதாவோ தங்கசாமியின் தோளில் அமர்ந்து கொண்டு அவர் கையிலுள்ள இரையை உண்ணும்! தங்கசாமி தன்னை கூட்டிற்குப் போவென வானில் பறக்கவிடும்போதுதான் அங்கிருந்து பறந்து ரங்கனின் வீட்டிற்குச்  செல்லும்!

அன்றைய தினம் ஞாயிறு! மதிய விருந்துக்கு தன் வீட்டிற்கு வந்து கலந்து கொண்டபின்னர் இருவருமாகச்  சேர்ந்து தங்களது வழக்கமான கட்டைப்  பஞ்சாயத்திற்குச் செல்லலாமென ரங்கன் தொலைபேசியில் அழைத்திருந்ததால் அன்று தனக்கு வரவுள்ள வருமானம் எவ்வளவு இலட்சங்கள் தேறுமெனக் கணக்கிட்டவாறு நண்பரின் இல்லத்தில் நுழைந்தார் தங்கசாமி!

ஆடம்பரமான சாப்பாட்டு மேசையில் விதவிதமாகச் சமைத்து வைக்கப்பட்டிருந்த அசைவ உணவு வகைகளை இரசித்து ருசித்துச் சாப்பிட்டுவிட்டு ரங்கன் வீட்டின் மாடியில் அமைந்திருந்த புறாக்களின் கூட்டினை நெருங்கி அவற்றில் தனக்குப் பிடித்தமான தாதாவைத் தேடினார் தங்கசாமி!

அவரைப்  பின் தொடர்ந்து வந்த அவரது நண்பர் ரங்கன் என்ன நண்பா என்ன பார்க்கிறீர்கள் என வினவினார்! நான் வேறு யாரைத் தேடுவேன் எனக்குப் பிடித்த அந்த வெள்ளை நிற தாதாப்  புறாவைத்தான் எங்கே காணவில்லையே எனப்  பார்க்கிறேன் என்று  பதிலளித்தார் தங்கசாமி!

அதையா தேடுகிறீர்கள் எனக் கேட்டுவிட்டு சற்று பலமாக நகைத்த ரங்கன் அதுதான் உங்கள் வயிற்றில் இப்பொழுது உள்ளதே! இருப்பதில் கொழுத்த புறா அதுதானே! அதனால்தான் இன்றைய சமயலுக்குச்  சரியாக இருக்குமென்று அதை அறுத்து விட்டேன் எனப் பதிலளித்துவிட்டு மீண்டும் குலுங்கிக் குலுங்கிச்  சிரித்தார்! 

இதைக் கேட்டவுடன் தங்கசாமிக்கு குமட்டிக்கொண்டு வந்தது! தான் சுவைத்து இரசித்துத் தின்ற அந்த தாதாவின் நிலை போல மற்றவர்களை ஏய்த்து சுகமான வாழ்வு வாழும் தனக்கும் ஒரு நாள் தன் தவறுகளுக்கென கத்தியைத் தீட்டிக்கொண்டு தீர்ப்பு வருமென்பதை அக்கணமே அவர் உணர்ந்தார்! 

அடுத்த நிமிடமே தம் நண்பரின் வீட்டிலிருந்து வெளியேறிய அவர் அன்றிலிருந்து தன்னால் பாதிக்கப்பட்ட நபர்களைத் தேடிப்பிடித்து மன்னிப்பு கோரியதோடு மட்டுமன்றி தன் வசமிருந்த பிறரை ஏமாற்றி சேர்த்த சொத்துகளை விற்று பாதிக்கப்பட்டவர்களுக்கு திரும்ப வழங்கினார்!

இப்பொழுதெல்லாம் தங்கசாமி தனது பழைய வணிகமான நெல் அரவை ஆலையில் சாதாரணக் கூலித்  தொழிலாளர்களுடன் சரிசமமாகப் பழகியவாறு அரிசி மூட்டைகளைக்கூட சுமக்கத் தயங்காமல் தனது வாழ்க்கை தேவைகளை நிறைவு செய்து கொள்கிறார்! மேலும் தனது உழைப்பில் உருவாகும் செல்வத்தின் ஒரு பகுதியை தனது ஊரிலுள்ள கல்விக்கூடங்களுக்கு செலவிட்டு வருகிறார்!

Read More...

வெள்ளி, 12 செப்டம்பர், 2014

மதுரைக்கு வழி வாயிலே!

Leave a Comment
தமிழில் இப்படி ஒரு பழமொழி வழங்கி வருவது நாம் எல்லோரும் அறிந்ததே! 

நான் வணிகம் செய்த காலத்தில் சிறுவர்களை வேலைக்கு அமர்த்துவதற்கு சட்டம் கடுமையாக இருந்ததில்லை. என்னுடைய வணிகம் மிகவும் சுமாராக இருந்ததால் வேறு வழியின்றி நண்பர்களின் ஆலோசனையின் பேரில் ஒரு பனிரெண்டு வயதுச் சிறுவனை வேலைக்கு அமர்த்திக் கொண்டேன்!

அந்தச் சிறுவனின் குடும்பம் நான் வசித்த இடத்திற்கு அருகில்தான் இருந்தது! மேலும் அந்தச் சிறுவனின் தந்தை குடிப்பழக்கத்திற்கு அடிமையாக இருந்ததால் அவனது தாயார் மற்றும் சகோதரர்களின் உழைப்பில் குடும்பம் நடந்து கொண்டிருந்தது. இந்தக் காரணத்தினாலேயே அவனும் படிப்பதற்கு வழியின்றி என்னிடம் வேலைக்குச் சேர்ந்தான்!

ஏழாம் வகுப்புதான் பயின்றிருந்தாலும் சுட்டியாக இருந்ததால் அவனை வங்கிகளுக்குச் சென்று பணம் செழுத்தி வரப் பழக்கினேன்! நண்பர்கள் பலமுறை எச்சரித்தாலும் என்னுடைய நம்பிக்கையும் அவனது துணிச்சலும் ஒரு முறைகூட பணத்தைத் தொலைக்காமல் என்னிடம் அவன் வேலையில் இருந்தவரை வங்கிகளுக்கு ஆயிரக்கணக்கில் பணத்தினை எடுத்துச்சென்று பத்திரமாகக் கையாண்டான்!

ஒரு முறை அவனை கொள்முதலுக்கென அவனுக்கு முற்றிலும் பழக்கமில்லாத எங்கள் வணிக நிறுவனம் அமைந்திருந்த நகரிலிருந்து முதல் நகர் 80 கல் தொலைவிலும், அங்கிருந்து; 65 கல் தொலைவிலும் இருந்த மற்றொரு நகருக்கு சென்று பணம் செழுத்தி வருவாயா எனக் கேட்டேன்! 

அந்தந்த நகர்களுக்குச் சென்று பேருந்து நிலையம் விட்டிறங்கி பணம் செழுத்த வேண்டிய நிறுவனங்கள் அமைந்திருந்த சாலை விபரத்தைத் துல்லியமாகப் படமாக வரைந்து காட்டி விளக்கி அங்கு சென்று பணம் கட்டிவிட்டுப் பத்திரமாகத் திரும்பி வரவேண்டும்!

எவரிடமும் ஏமாந்து பணம் போனாலும் பரவாயில்லை! நீ பேருந்துக்கெனப் கொண்டு செல்லும் பணத்துடன் பத்திரமாக மீண்டு வந்தால் போதும் என அவனுக்கு நம்பிக்கையளித்து மதிய உணவிற்குப் பின்னர் முதல் நகருக்குப் பேருந்தில் ஏற்றி அனுப்பிவிட்டேன்!

அவனும் எவ்விதப் பயமுமின்றி அவனுக்கு முற்றிலும் புதிய நகராயிருந்த முதல் நகர் சென்றடைந்து அங்கு பணம் செழுத்த வேண்டிய நிறுவனம் சென்றடைந்து பணம் செழுத்தி பொருட்களுக்கு ஆர்டர் தந்துவிட்டு, பின்னர் பேருந்து நிலையம் திரும்பி அடுத்த நகருக்குப் பேருந்து ஏறிச் சென்று அங்கிருந்த நிறுவனத்திலும் பணம் செழுத்தி ஆர்டர் கொடுத்துவிட்டுப் பத்திரமாக இரவு எட்டு மணிக்குள் எனது நிறுவனம் திரும்பிவிட்டான்!

இன்றைக்குள்ளது போன்று கைபேசி வசதிகள் இல்லாத காலம் அது! அந்தச் சிறுவனுக்கு இருந்த துணிச்சலை நம்பித்தான் நான் அவனை இது போன்று அனுப்பி அவனுக்குள் இளம் வயதிலேயே ஒரு தன்னம்பிக்கையாளனாக உருவாக்கினேன்!

இங்கு இதை நான் ஏன் குறிப்பிடுகிறேன் என்றால் இன்றுள்ள படித்துவிட்டுப் புதிதாக வேலைக்கு வரும் இளைஞர்களை நகரிலுள்ள ஏதேனும் ஒரு நிறுவனத்திற்குச் சென்று வருமாறு அனுப்பினால் அந்த நிறுவனத்தின் அருகிலேயே சென்றுவிட்டு அங்கே அந்த நிறுவனம் இல்லை, சரியான இடம் சொல்லுங்கள் என உடனே கைபேசியிலிருந்து வழி கேட்கின்றனர்! 

அருகிலுள்ள ஏதேனும் ஒருவரிடமோ அல்லது ஒரு நிறுவனத்திலோ தாங்கள் தேடி வந்த நிறுவனத்தின் பெயர் அல்லது தெரு சொல்லிக் கேட்பதற்கு அவர்கள் முயலுவதில்லை! 

இன்றைய இளைய சமுதாயத்தை பெரும்பாலான பெற்றோர்கள் பள்ளி விட்டால் வீடு, வீடு விட்டால் பள்ளி என்று எவ்விதச் சுதந்திரமும் இன்றி வளர்ப்பதின் விளைவுதான் இது! வங்கிகளுக்குச் சென்று பணம் கையாள்வது, அல்லது புதிதாக வங்கிக் கணக்குத் துவங்குவதற்குக் கூட இன்றைய இளைஞர்கள் மற்றவர்களின் உதவியை எதிர்பார்த்து நிற்பதை நான் எனது சொந்த அனுபவததிலேயே பலமுறை கண்டுள்ளேன்!

இப்படிப்பட்டவர்களை மனதில் கொண்டுதான் மதுரைக்கு வழி வாயிலே என்ற பழமொழியே தமிழில் உருவாகி இருக்குமென்று கருதத் தோன்றுகிறது! 

கொசுறுக் குறிப்பு!

என்னிடம் வேலைக்கு வந்த இன்னொரு சிறுவனைத் தொலைபேசிக் கட்டணத்தைச் செழுத்தி வருமாறு பேருந்து நிலையம் மேல் தளத்தில் அமைந்திருந்த அஞ்சல் அலுவலகத்திற்கு அனுப்பினேன்! வெகு நேரமாகியும் அவன் திரும்பி வரவில்லை! 

எனக்கு உதவியாக அவ்வப்போது எனது நிறுவனத்திற்கு வரும் எனது துணைவியார் உட்பட நண்பர்கள் அனைவரும் சிறுவனை எனது செயலைக் கண்டித்தனர்! நானோ அவன் கண்டிப்பாக பத்திரமாக வருவான் என நம்பிக்கையுடன் இருந்தேன்! நேரம் ஆக ஆக இவர்களின் பதட்டம் என்னிடமும் வேறு வழியின்றித் தொற்றிக்கொள்ளவே நான் உடனே எனது வாகனத்தில் ஏறி அவனைத் தேடத் துவங்கினேன்! முன்னதாக வேறு ஒருவரை அனுப்பி அவன் சென்ற அஞ்சல் நிலையத்தில் சென்று பார்த்து வர அனுப்பினால் அவன் அங்கில்லை என்றும் எனக்கு பதில் வந்தது!  

எனக்கும் பதட்டமேற்பட்டு நகரத் தெருக்களில் அவனைத் தேடிய சிறிது நேரம் கழிந்து எனது துணைவியாரிடமிருந்து அழைப்பு எனக்கு கைபேசியில் வந்தது சிறுவன் பத்திரமாக வந்து விட்டான் என!

நிறுவனம் திரும்பி அவனை விசாரித்தால் பேருந்து நிலைய அஞ்சல் அலுவலகத்தில் கூட்டம் அதிகமாக இருந்ததாலும் தொலைபேசிக் கட்டணம் செழுத்தக் கடைசி நாளாக இருந்ததாலும் இருக்கும் கூட்டத்தில்  வரிசையில் நின்று பணத்தைக் கட்ட முடியாமல் போகுமோ எனக் கருதி அங்கு இருந்த பணியாளரிடம் விசாரித்து நேராகத் தொலைபேசி நிலையமே சென்று பணத்தைக் கட்டிவிட்டு வந்ததாக வெற்றிக் களிப்புடன் தெரிவித்தான்! 

எனக்கு அப்பொழுதும்கூட நண்பர்களிடமிருந்து எச்சரிக்கையான அறிவுரைகள்தாம் வந்தது! அதனை நானும் புதிதாக வந்த அந்தச் சிறுவனும்கூட ஒரு பொருட்டாக எடுத்துக் கொள்ளவில்லை! அவனும் என்னிடம் இருந்தவரை பத்திரமாகப் பணத்தைத் தொலைக்காமல், எவரிடமும் ஏமாறாமல் வங்கிகளுக்குக் கொண்டு சேர்த்து வந்திருந்தான்!

Read More...

வியாழன், 11 செப்டம்பர், 2014

பாரதி நினைவு நாள்!

Leave a Comment
காலனே என் எதிரே வாடா உன்னைக் காலால் மிதித்தே கொல்வேன் எனத் தான் இறக்கும் தருவாயில்கூடச் சிறிதும் மரண பய அச்சமின்றிக் காலனை வீறு கொண்டழைத்த முண்டாசு மீசைக் கவி பாரதியின் நினைவு நாள் இன்று!

வாழ்ந்த போது பாரதியைப் புரிந்து கொள்ளாத இந்தத் தமிழ்நாட்டு மக்கள் பாரதி மறைந்து பல ஆண்டுகள் கழிந்த நிலையில் அவரைக் கொண்டாடிக் கொண்டிருக்கிறோம்!

பாரதியைக் கொண்டாடுகிறோமே தவிர பாரதி பாடிய வரிகளைப் பின்பற்றுகிறோமா என்றால் இல்லை என்றுதாம் தலை குனிந்து ஏற்றாக வேண்டும்!

ஒவ்வொரு கவிக்குள்ளும் ஏராளக் கனவுகள் உண்டு! படைப்பாளிகளுக்கே உரித்தான கனவுகள் அவை! பாரதிக்குள் இருந்த கனவுகளோ இந்தப் பேரண்டமளவிற்கு விரிந்து பரந்த கனவுகள்!

பெண்ணடிமை, சாதி மத பேதம், அஞ்சி வாழும் வாழ்க்கை முறை, மூடப்பழக்க வழக்கங்கள், பொய்மை வாழ்க்கை, அடிமை வாழ்க்கை, ஏய்த்துப் பிழைத்தல், பகுத்தறிவின்மை, போன்ற எண்ணற்ற கொடுமைகள் இந்த நாட்டை விட்டு அகல வேண்டும் எனக் கனவு கண்டவர் பாரதி!

கனவு மெய்ப்பட வேண்டும் எனத் தம் கவிதையில் ஏங்கிய அந்த மகாகவியின் இன்னொரு கவிதையோ 

போனதெல்லாம் கனவினைப்போற் புதைந்தழிந்தே போனதனால்
நானும் ஓர் கனவோ? இந்த ஞாலமும் பொய்தானோ?

என்று மயங்குவது போல் இன்றும் இந்த ஞாலம் முழுவதும் மக்கள் ஒரு பொய்யான வாழ்க்கை முறையைத்தாம் வாழ்ந்து வருகின்றனர்!

பாரதிக்கிருந்த துணிவும் ஆற்றலும் நமக்கில்லையெனினும், இந்த விஞ்ஞானம் ஆட்சி செய்யும் காலத்திலும் பாரதி கனவு கண்ட அந்த உன்னதமான தமிழகத்தையும் பாரதத்தையும் நம்மால் மீட்டெடுக்க இயலவில்லை என்பதே நிச்சய உண்மை! 

தின்னவரும் புலி தன்னையும் அன்பொடு சிந்தையிற் போற்றிடுவாய் என்ற அந்த மகாகவியின் அன்பு வரிகளை மனதில் ஏற்றி 

தமிழ்த்திரு நாடு தன்னைப் பெற்ற தாயென்று கும்பிட்டும்,
சொல்லில் உயர்வு தமிழ்ச்சொல்லே எனப் போற்றியும்,
சாதிகள் இல்லை! குலத்தாழ்ச்சி உயர்ச்சி சொல்லல் பாவம், 
நீதி உயர்ந்த மதி கல்வி, அன்பு நிறைய உடையவர்கள் மேலோர்,

என்ற பாரதியின் பாப்பா பாட்டில் வரும் அற்புதமான வாழ்க்கை முறைதனை நம் இளைய சமுதாயத்தின் முன் என்றென்றும் கொண்டு சேர்க்க அனைவரும் பாடுபட வேண்டும் என்ற வேண்டுதல்களுடன்

மகாகவி மறையவில்லை! இதோ இந்தத் தமிழகத்தின் ஒவ்வொரு அணுத்துகளிலும் ஏராளமான பாரதிகள் வாழ்ந்து கொண்டிருக்கின்றனர் என்ற நம்பிக்கையுடன் தேமதுரத் தமிழோசை உலகமெலாம் பரவச் செய்வோம்! தெருக்களெல்லாம் தமிழ் முழக்கம் செய்வோம்! 

பாரதி பாடியவாறே இன்றைய பொய்மையான தமிழின நிலைகள் 
போகட்டும்! போகட்டும் என வழியனுப்பிவிட்டு

வாய்மையான வலிய தமிழினம் வரட்டும் வரட்டும் என்ற வரவேற்போடு
மகாகவியின்  கனவுகள் மெய்ப்பட உழைப்போம் என உறுதியேற்போம்!

Read More...

செவ்வாய், 9 செப்டம்பர், 2014

வாய்மை உணர்வுக்குக் கிடைத்த உண்மையான உயரிய அனுபவம்!

Leave a Comment
வெளியில் சொல்ல முடியாத பல்வேறு நெருக்கடிகளாலும் எனது வணிகத்திற்கு எதிராகப் பரவிய வதந்திகளாலும், ஒரு கட்டத்தில் வணிகத்திற்கெனப் பொருட்களைக் கடனாகக் கொடுத்து வணிகம் செய்து வந்த மொத்த வணிகர்கள் எனக்குக் கடன் கொடுப்பதை ஒரே நேரத்தில் நிறுத்திவிட்டனர்! 

தரமான பொருட்களை மலிவாக என்னிடம் கடன் பெற்றுப் பயனடைந்த எனது வாடிக்கையாளர்களோ எனது நிலை அறியாமல் என்னிடம் தங்கள் கடனைத் திரும்பக் கொடுப்பதில்லை என்ற உறுதியான நிலைப்பாட்டுடன் மனச்சாட்சியின்றி நடந்து கொண்டனர்!

இந்த நிலையில் வணிகத்திற்குத் தேவைப்படும் பணத்தினைப் புரட்ட வேண்டிய ஒரு கட்டத்தில் விழுந்த வணிகத்தை எப்படியேனும் தூக்கி நிறுத்திக் காப்பாற்றிவிடலாம் என்ற நம்பிக்கையுடன் என்னுடைய உள்ளுணர்வு நீ இப்பொழுது இருக்கும் நிலையில் மேலும் மேலும் பொய் சொல்லிக் கடன் வாங்காதே என எச்சரிப்பதை உணர்ந்த நிலையிலும் வேறு வழியின்றி என்னை நம்பிக் கேட்கும்போதெல்லாம் கடன் கொடுத்த நண்பர்களிடம் வெகு விரைவில் திருப்பித் தந்துவிடுவேன் என்று உறுதியளித்துக் கடன் வாங்கி என்னுடைய வணிகத்தைக் காப்பாற்ற முயன்றேன்!

இது மேலும் கடனாளியாகத்தான் வழி செய்ததே தவிர வணிகத்தைக் காப்பாற்றுவதற்குத் துணை செய்யவே இல்லை! தினசரி நடக்கும் வணிகத்தில் கிடைக்கும் வருமானத்தை விட வாங்கிய கடன் தொகைக்கு அதிகளவு வட்டியாக வெளியேறத் துவங்கவே சரக்கு இருப்பு நிலை வெகுவாகக் குறைந்துவிட்ட ஒரு கால கட்டத்தில் வாங்கிய அசலைத் திருப்பித் தருமாறு நெருக்கிய நண்பர்களின் ஒட்டு மொத்த நெருக்கடி தொடர்ந்த நிலையில் அசலையும் திருப்பித்தர  முடியவில்லை!

விற்பதற்கு வழக்கமாக இருப்பில் இருக்க வேண்டிய பொருட்கள் வெகுவேகமாக வட்டிக்கே சென்று குறைந்துவிட்டதால் மெதுவாக விற்கக்கூடிய பொருட்கள் மட்டுமே கடையில் தேங்கி நின்றது! அவற்றையும் வந்த விலைக்கு இலாபமின்றி விற்று கடனுக்குரிய வட்டியாகக் கட்டக் கட்ட ஒரு கட்டத்தில் வருகின்ற வாடிக்கையார்கள் கேட்கும் பொருட்கள் விற்பதற்கு இன்றி தினசரி வணிகம் ஒரேயடியாகக் குறைந்து விட்ட நிலை உருவானது!

சமாளிக்கவே இயலாத நிலையில் வேறு வழியின்றி வணிகத்தை முடித்துக்கொண்டு வழக்கு மன்றத்தில் அறிவிப்புக் கொடுத்துவிட்டு நண்பர்களின் அறிவுரைப்படி வேறு ஊருக்கு மாறுதலானேன்!

கடன் கொடுத்த பெரும்பாலான  நண்பர்கள் என் நிலை அறிந்து வழக்கிலிருந்து விலகிக் கொள்ள ஒரு நண்பர் மட்டும் தன் பங்குதாரர்களின் நெருக்கடி காரணமாக வழக்கில் ஈடுபட்டு பல ஆண்டுகள் வாய்தா வாங்கிய நிலையில் வழக்கு மன்றத்தில் வழக்கு நடந்து கொண்டிருந்தது. பின்னர் ஒரு வழியாக வழக்கு விசாரணைக்கு வந்த நிலையில் நேரில் சென்று பதில் அளிக்க வருமாறு வழக்கு மன்றத்திலிருந்து அழைப்பு வந்தது!  

வழக்கின் நிலை அறிய முதன் முறையாக எனது வழக்குறைஞரிடம் சென்றபோது அவர் என்னிடம் இப்பொழுது என்ன செய்து கொண்டிருக்கிறீர்கள் என வினவினார்! நான் அப்பொழுது எனது குடும்பத்தைக் காப்பாற்றியாக வேண்டிய கட்டாயத்தால் ஒரு நிறுவனத்தில் குறைந்த சம்பளத்தில் வேலையில் இருந்தேன்! எனவே நான் ஒரு வேலையில் இருப்பதாக அவரிடம் சொன்னேன்!

அதற்கு அவர் நீங்கள் இப்படி உண்மையைச் சொன்னால் வழக்கு தோற்றுவிடும்! எனவே எந்த வேலையுமின்றி எனது தாயாரின் தயவில் கிராமத்தில் வாழ்ந்து கொண்டிருப்பதாகக்கூறச் சொன்னார்! 

வணிகம் முடிவுக்கு வந்த அந்தக் கணம் முதல் இனி எக்காரணம் கொண்டும் எவரிடத்தும் பொய் சொல்வதில்லை என்ற தீர்மானமான முடிவில் இருந்த எனக்கு வழக்குறைஞரின் அறிவுரைப்படி நடப்பதற்கு எனது ஆழ்மனது ஒப்புக்கொள்ளவே இல்லை!

எனினும் வழக்கு விசாரணைக்கு நேரில் வருமாறு வழக்கு மன்றத்திலிருந்து அழைப்பு வரும்போதெல்லாம் வழக்கு மன்றம் சென்றுவிடுவேன்! எனக்குக் கடன் கொடுத்த நண்பர்கள் எவரும் என்னைக் காண அங்கு ஒரு நாளும் வராதது எனக்குள் வியப்பளித்தது! மேலும் என்னை வழக்கு மன்றக்கூண்டில் ஏற்றி விசாரிக்கும் நாள் தள்ளிக் கொண்டே போனது! இடையில் ஒரு நாள் கூண்டில் ஏறிய அடுத்த நிமிடமே வேறு வழக்கிற்காக என்னை இறக்கி விட்டுவிட்டனர்!

இறுதியாக ஒரு நாள் நான் விசாரணைக்கூண்டில் ஏறி நின்றேன்! பொய் சொல்வதற்கு மனம் ஒப்பாத நிலையில் எதிர் தரப்பு வழக்கறிஞர் எத்தகைய கேள்விகளை எழுப்புவாரோ என்ற அச்சத்துடன் இருந்தேன்! 

எதிர் தரப்பு வழக்கறிஞரோ நான் எனது வணிகத்தில் பட்ட கசப்பான அனுபவங்களுக்கேற்ப  உண்மையைச் சொல்வதற்கேற்ற கேள்விகளையே என்னிடம் எழுப்பினார்! நானும் அவையெல்லாம் உண்மையாக இருந்ததால் மறுக்காமல் ஒப்புக்கொண்டேன்!

வழக்கு மன்ற நடுவர் நீங்கள் இவருக்கு ஆதரவான கேள்விகளையே கேட்கிறீர்களே எனச் சிரித்தவாறே வினவ எதிர் தரப்பு வழக்குறைஞர் உட்பட சுற்றி நின்ற அனைத்து வழக்குறைஞர்களும் பலத்துச் சிரித்தனர்! வாய்மை உணர்வு பொங்கிய மன நிறைவுடன் நான் அமைதியாக நின்றேன்!

அன்றைய தினமே வழக்கு கிட்டத்தட்ட முடிவிற்கு வந்துவிட்டது! பொய் சொல்லக்கூடாது என்ற உறுதியான மன நிலையில் இருந்த எனக்கு உண்மையே பேசுமாறு வாய்ப்பு அமைந்ததற்காக என்னை வழி நடத்தும் உயரிய சக்திகளுக்கு நன்றி தெரிவித்தவாறு வழக்கு மன்றத்திலிருந்து வெளியேறினேன்!

வாய்மை உணர்வுடனே வாழ்வது என்ற உறுதியான மன நிலையில் இனி வரும் காலத்திலும் வாழ்வது என்ற எனது நிலைப்பாட்டிற்கு ஏற்ப வாய்மை உணர்வு மனதில் உறுதியாகத் தழைத்தோங்கும் போது பொய்மைக்கு அங்கு வேலையில்லை என்பதை எனது உணர்வு ரீதியாக உண்மையாக உணர்ந்த அந்த மகத்தான தருணத்தை இப்பபொழுதும் நினைவு கூறும்போதுகூட வாய்மையே வெல்லும் என்ற உன்னதமான வாசகம்தான் எனது ஆழ் மனதில் ஓடிக்கொண்டிருக்கிறது!  

Read More...

வெள்ளி, 5 செப்டம்பர், 2014

ஆசிரியர் தின நல் வாழ்த்துக்கள்!

Leave a Comment
இன்று ஆசிரியர் தினம்! தாய் தந்தைக்கு அடுத்து ஆசிரியரை வைத்த பின்னரே தெய்வத்தை அந்நாளைய தமிழர்கள் மதித்தனர்!

என்னை மனிதனாக்கிய ஆசிரியப் பெருமக்களை இந்த நேரத்தில் நான் நினை கூறாவிட்டால் நன்றி மறந்தவனாவேன்!

எனக்குத் தமிழ் கற்றுத்தந்து பகுத்தறிவு தந்த தமிழய்யா உயர்திரு ஆ.பெரியசாமி அவர்களை மானசீகமாக வணங்கி இந்த நன்னாளில் தமிழ் கூறும் நல்லுலகில் வாழும் தமிழாசிரியர்கள் உள்ளிட்ட அனைத்து ஆசிரியப் பெருமக்களுக்கும் எனது இதயம் நிறைந்த ஆசிரியர் தின நல்வாழ்த்துக்களை உரித்தாக்குகிறேன்!

எனக்கு பிறவியிலேயே இடது கைப் பழக்கம் உண்டு! நான் ஒன்றாம் வகுப்பில் நுழைந்து எனது பாடப்பலகையில் எழுதத் துவங்கியபோது எனது கரங்களில் பலத்த அடி விழுந்தது! அப்பொழுது எனக்கு ஆசிரியையாக இருந்த திருமதி புஸ்பா அவர்கள்தான் என்னை அடித்தவர்!

அந்த நாட்களில் விபரம் தெரியாமல் இருந்துவிட்ட ஆசிரியை அவர்! அவரது எச்சரிக்கையால் எனது எழுதும் பழக்கம் வலது கையில் துவங்கியது! 

எனது கையெழுத்தை மட்டும் அன்று அவர் மாற்றவில்லை! தலையெழுத்தையே மாற்றிவிட்டார் எனத்தான் கருத வேண்டியுள்ளது!

ஆயிரத்தில் ஒருவர்தாம் இடது கைப் பழக்கத்துடன் பிறப்பர்! மாபாரத அருச்சுனன் ஒரு இடது கைப்பழக்க வீரன்தான்! 

பொதுவாக இந்தப் பழக்கம் உள்ளவர்களுக்கு அவர்களின் வலது கையை 
இயக்கும் மூளையின் அமைப்பின் வித்தியாசமான சமிக்கை இது!

இதை அறியாமல் அந்நாளில் என் முதல் ஆசிரியை செய்த தவறால் எனது வலது கைப் பழக்க எழுத்துக்கள் சற்று கிறுக்கலாகத்தான் வெளிப்படும்!

மேலும் எனக்குள் ஓவியம் தீட்டுவதில் அதீத ஆர்வம் உண்டு! இந்த ஆர்வமும் வலது கைப்பழக்கத்தால் சரிவர நிறைவேறாமலே போனது!

என்னுடைய இந்த அனுபவத்தை மனதில் கொண்டே இடது கைப் பழக்கம் உள்ளவர்கள் இடது கையில் எழுதுவது கண்டால் நான் உற்சாகமாகி அவர்களை அவ்வாறே எழுதுமாறு ஊக்குவிப்பேன்!

அடுத்து எனது ஏழாம் வகுப்பு ஆசிரியர்! அவர் பெயர் இங்கு வேண்டாமே! ஆறாம் வகுப்பிலிருந்து ஏழாம் வகுப்பிற்கு நான் மாறியபோது அவரது வகுப்பில் என்னைத் தள்ளிவிட்டனர்! அவரோ கடுமையாக அடிப்பவர் என்ற அவப்பெயர் பள்ளி முழுக்க உண்டு!

ஆறாம் வகுப்பில் சராசரியாக எழுபது மதிப்பெண் பெற்ற நான் ஏழாம் வகுப்பில் படித்த முழு வருடமும் எனது அனைத்து தேர்வுகளிலும் சிகப்புக் கோடுதான்!
எனவே நான் சந்திக்கும் ஆசிரியர்கள் அனைவரையும் மாணவச் செல்வங்களை அடித்துப் பாடம் சொல்லித் தராதீர்கள் என்றுதான் வேண்டுவேன்!

எனக்கு எட்டாம் வகுப்பு நடத்திய ஆசிரியை சற்று கண்டிப்பானவர்! மேலும் அவர் நகரத்திலிருந்து வந்ததால் சற்று மிகைப்படுத்திய அலங்காரத்துடன் வருவார்! ஒரு முறை நான் பாடத்தில் செய்த ஏதோ ஒரு தவறுக்காக என்னை அவர் கண்டித்தார்!

இதனை என் தாயாரிடம் நான் எடுத்துக் கூறும்போது அவரது நாகரீக கோலத்தை சற்று ஏளனமாகச் சொல்லி இதற்கு எனது தாயாரிடமிருந்து எனக்கு ஆதரவான குரல் கேட்குமென்ற நம்பிக்கையுடன் விளக்கினேன்! 

நடந்த கதையோ வேறு! எனது தாயாருக்கு உடனடியாக என்மேல் கோபம் மேலிட்டது! கிட்டத்தட்ட என்னை அடிக்காத குறைதான்! நீ எப்படி உனது ஆசிரியையை மரியாதைக் குறைவாகப் பேசலாம் என்று திட்டி இனி இப்படிப் பேசக்கூடாது என எனக்கு அறிவுரை வழங்கினார்!

அந்தக் கணம் முதல் நான் ஆசிரியப் பெருமக்களை எந்த நேரத்திலும் அவர்கள் என்னை நல்வழிப்படுத்துவதற்காக கடுமை காட்டியபோதெல்லாம் அவர்கள் செயல் நியாயமென உணர்ந்து எனது தவறுகளைத் தவிர்த்துக் கொள்வேன்!

பத்தாம் வகுப்பு மாணவர்களை முதல் வருடமும், பதினொன்றாம் வகுப்பு மாணவர்களை இரண்டாம் வருடமும் வழி நடத்தும் வழக்கத்திற்கு மாறாக தேசிய மாணவர் படையில் ஒன்பதாம் வகுப்பு படிக்கும்போதே வற்புறுத்தி என்னை இணையச் செய்து, எனக்கு அற்புதமான பயிற்சி தந்து எனது உடல்நலம் சிறக்க உதவி செய்த எனது தந்தையின் மிகச்சிறந்த நண்பராக விளங்கி ஓய்வு பெற்ற நிலையில் சமீபத்தில் அகால மரணமுற்ற ஐயா முத்துசாமி அவர்களை என் வாழ்நாளெல்லாம் மறக்க இயலாதுதான்!

என் கையெழுத்தை மாற்றிய திருமதி புஸ்பா அவர்கள் எனது தலையெழுத்தையும் மாற்றி அமைத்து இதோ ஒரு படைப்பாளியாக என்னை  மாற்றியுள்ளார் என்பதால் அவரும் என் வாழ் நாளெல்லாம் மறக்க இயலாத மிகச் சிறந்த ஆசிரியைதாம்! 

ஒன்றாம் வகுப்பு துவங்கி புகுமுக வகுப்பு வரை எனக்கு பாடம் நடத்திய அனைத்து ஆசிரியர், ஆசிரியை பெருமக்கள் அனைவருக்கும் எனது வளர்ச்சியில் மலையளவு பங்குண்டு!

எனது மகளைத் தன் வளர்ப்பு மகளாகக் கருதி எட்டாம் வகுப்பு முதல் பனிரெண்டாம் வகுப்பு வரை உயரிய பயிற்சி கொடுத்து இன்றும் எங்கள் குடும்பத்துடன் நல் உறவு பாராட்டும் மதிப்பிற்குரிய தமிழாசிரியர் திரு கவுஸ் அவர்களும் எனது மரியாதைக்குரிய நல்லாசிரியர்தாம்!

Read More...

நாய் வால் போல வாழ்வோம்!

Leave a Comment
மனிதர்களில் தங்களின் பிடிவாத குணத்தை விடாது வாழ்பவர்கள், தீய பழக்க வழக்கங்களை பழகி அவற்றிலிருந்து விலக மறுப்பவர்கள், மற்றவர்கள் மனம் புண்படுமாறு நடந்து கொள்பவர்கள், போன்ற  விரும்பத்தகாத பல்வேறு குணங்களைப் பொதுவாக நாய் வாலுக்கு ஒப்பிட்டு நாய் வாலை நிமிர்த்த முடியுமா? என்ற வினாவுடன் ஒரு பழமொழியே நம் தாய்த் தமிழ்மொழியில் உள்ளது! 

நாய் குட்டியாக இருக்கும்போது அதன் வால் எப்படி இருக்குமென்பதை ஓரளவிற்கு ஊகிக்க முடிகிறது! குட்டியாக இருக்கும் பொழுது சற்றுத் தளர்வாக இருக்கும்! நாய் வளர வளர அதனுடைய வால்  சற்று மேல் நோக்கி நிமிரத் துவங்கி இறுதியாக பின்னோக்கி நிமிரவே முடியாமல் வளைந்துவிடும்!

அதன் பிறகு அந்த வாலை நாம் எத்துணை முறை பிடித்து நேராக்க முயன்றாலும் அது நிமிரவே நிமிராமல் பிடிவாதமாகத் தன் பழைய வளைந்த நிலைக்கே திரும்பிவிடும்!

இதைப் பார்த்துத்தான் மேற்கண்ட குணம் உடையவர்களை இந்தப் பழமொழியில் நாய் வாலுடன் ஒப்பிட்டு உவமை சொல்வர்!

மாறாத குணம் உடையவர்கள் பிறவியிலிருந்தே தங்களிடம் இது போன்ற குணங்களைக் கொண்டவர்களாகப் பிறப்பதில்லை! இவர்தம் பெற்றோர்தம் குண நலன்கள், வளர்க்கும் விதம், வாழும் சூழல், வளரும் விதம், பழகும் உறவு மற்றும் நட்பு அவர்களிடமிருந்து இவர்கள் பெற்ற குண நலன்களே பின்னர் இவர்களின் தனிப்பட்ட குண நலன்களாக மாறுகின்றன!

நற்குடிப் பிறப்பு, நல்ல உறவுகள், நல்ல நட்பினைத் தேர்ந்தெடுத்தல், நல்ல ஆசிரியரின் அறிவுரைப்படி நடத்தல், உள்ளத்தில் நேர்மையாக வாழ்வதென உறுதி கொள்ளல் போன்றவைதாம் ஒரு மனிதரை நற்குணங்கள் படைத்தவராக மாற்றுகின்றன!

என் அனுபவத்தில் இது போன்ற இருவகையான மனிதர்களையும் சந்தித்து வந்துள்ளேன்! திருத்தவே முடியாத குணமுடையவர்களையும், தவறு செய்தால் தம் தவறை உணர்ந்து சரி செய்து கொண்டு திருந்தி வாழ முயற்சிக்கும் மனிதர்களையும் நாம் புரிந்து கொண்டுதான் நம்முடைய வாழ்நாளைக் கழித்தாக வேண்டும்!

எங்கள் குடும்பம் நன்றாக வசதியாக வாழ்ந்த காலத்தில் எங்களை மதிப்புடன் நடத்திய உறவுகளில் சிலர் எங்களின் வாழ்க்கை வசதி குறைவடைந்த ஒரு கட்டத்தில் எங்களைச் சரிவர மதிப்பதில்லை என்ற வருத்தம் எங்கள் குடும்பத்தவருக்கு உண்டு!

குறிப்பாக எனது மனைவிக்குத் தன்னை முன்பெல்லாம் உரிமையாக மரியாதையாக அமைத்தவர்கள் தற்பொழுது ஒருமையில் பெயர் சொல்லி அழைப்பதாக என்னிடம் வருத்தப்படுவார்! நான் அவரை பின் வருமாறுதான் எடுத்தியம்பிச் சமாதானப்படுத்துவேன்!

மனிதர்களில் குணம் மாறாதவர்களைத் திருத்த முடியாதவர்கள் என்று கருதியே அவர்கள் குணத்தினை நாய் வாலைத் திருத்த முடியுமா எனப் பழமொழி கூறி அவர்களைத் தள்ளி வைப்பர்! இந்தப் பழமொழிக்கேற்ப வாழ முயற்சிப்பவர்களைக் கண்டு நாம் ஏன் வருந்த வேண்டும்? அவர்களை விட்டு விலக முயற்சிக்க வேண்டும்?

மாறாக நாமும் அவர்களைப் போல அதே வித நாய்வால் குணத்துடன்தான் வாழ்ந்தாக வேண்டும்! இதில் அவர்களுக்கும் நமக்கும் உள்ள ஒரே வேறுபாடு என்னவென்றால் அவர்களின் குணம் நிமிர்த்த முடியாத வால் குணம்! நம்முடையதோ இதோ பின்வருமாறு இப்படித்தான் இருந்தாக வேண்டும்!

ஒரு தெரு நாய்கூட ஒரு நபர் தனக்கு ஒரு ரொட்டித் துண்டை உணவாகப் போட்டால் நன்றியுடன் வாலை ஆட்டிக் கொண்டு சாப்பிடும்! தனக்கு உணவிட்ட அந்த ஒரு நன்றிக்காகவே அந்த நாய் அதே நபர் தன்னை அடிக்க முற்பட்டாலும் நன்றியுடன் வாலாட்டிக்கொண்டுதான் அவரை அண்டி நிற்கும்!

நாமும் இந்தத் தெரு நாயைப் போன்றவர்கள்தாம்! தெரிந்தோ தெரியாமலோ நாம் ஒரு உறவுக்கூட்டத்தில் வந்து பிறப்பெடுத்துவிட்டோம்! இதே உறவினர்கள்தாம் நாம் நன்றாக வாழ்ந்த காலகட்டத்தில் நம் மீது அன்பு செழுத்திவிட்டு, இப்பொழுது நம்மைத் தாழ்வாக மதிக்கின்றனர்! 

நாம் அவர்களது மாறிவிட்ட நிமிர்த்த முடியாத குணத்தை ஒதுக்கித் தள்ளிவிட்டு, முன்பு நம் மீது அவர்கள் காட்டிய பழைய அன்பினை நினைந்து நன்றிக்கு இலக்கணமாகத் திகழும் நாய்க்கு உரிய அதே அன்பு காட்டுவதற்கு அடையாளமான வாலாட்டும் குணத்துடன் வாழ்ந்துவிட்டுப்போவோம்! 

அவர்களின் குணம் நிமிர்த்த முடியாத குணம் என்றால், நம்முடைய குணம் நன்றியுடன் வாலாட்டும் குணமாகவே இருந்து விட்டுப்போகட்டுமே!
இதுதான் நான் எனது துணைவியாருக்கு அவ்வப்போது கூறும் சமாதானம்!



Read More...

திங்கள், 1 செப்டம்பர், 2014

நான்குபேர் நான்கு விதமாகப் பேசுவர்!

Leave a Comment
தானியங்கி வர்த்தகத் துறையில் எனககு ஒரு ஆண்டுகள் மட்டுமே பணி புரிந்த அனுபவம்! 

எனது சிறிய தந்தையாருடன் இணைந்து இந்த வர்த்தகத்தைத் தொடர முற்பட்ட ஒரு ஆண்டிலேயே எங்களுக்குள் கருத்து வேறுபாடு ஏற்பட வேறு வழியின்றி எங்களுக்கு முற்றிலும் அறிமுகமே இல்லாத ஒரு ஊரில் அமைந்திருந்த மற்றொரு கிளையினை எங்கள் முதலீட்டிற்கு ஏற்ப பிரித்துக்கொண்டு அங்கு சென்று வணிகம் செய்வதென முடிவு செய்தேன்! அப்பொழுது வனக்கு வயது பத்தொன்பதுதான்!

எனக்கிருந்த குறைவான வணிக அனுவத்தைக் கருத்தில் கொண்டு எனது சித்தப்பாவும் அவரது நண்பர்களும் தனித்து ஒரு நிறுவனத்தை துவக்காதே என அறிவுறுத்தினர்! ஏன் தந்தையும் அவர்கள் அறிவுரையை ஏற்றுத் தனியே தொழில் துவங்க அச்சப்பட்டார்!

எனினும் எனது முடிவு இறுதியாக இருந்ததால் எனது தந்தையும் வேறு வழியின்றி தனித்து வணிகம் செய்ய ஒப்புக்கொண்டார்! நாங்கள் வணிகம் செய்ய முடிவு செய்த ஊர் எங்களுக்கு முற்றிலும் புதியது! ஓரிரு பழுது பார்ப்பவர்களின் அறிமுகம மட்டுமே எங்களுக்கு அப்போது இருந்தது! குறிப்பாக அந்த ஊரில் ஒருவர் மட்டுமே தனித்து பெரிய பணிமனையைக் கொண்டிருந்தார்!

எங்கள் வணிகமோ கடன் கொடுத்தால் திரும்ப வராத ஒரு வழிப் பாதை போன்றது! பெரிய பணிமனையை உடையவரை மட்டுமே நம்பி நாங்கள் வணிகம் செய்தாக வேண்டிய கட்டாயம்! எனினும் கடன் கொடுத்து எங்கள் முதலை நாங்கள் இழக்க விரும்பவில்லை!

இந்த நிலையில் அவரைப் புறக்கணித்துவிட்டு அதே ஊரில் உள்ள சிறிய பழுது பார்க்கும் பணிமனை உரிமையாளர்களை வாடிக்கையாளர்களாகப் பெற்று வணிகம் செய்யத் துவங்கினோம்! எங்கள் முதலீட்டுக்கு ஏற்ற ஊரல்ல அது! வணிகமும் மிகக் குறைவாகவே துவங்கியது!

இந்த வணிகத்தில் நான் சந்தித்த கசப்பான அனுபவங்கள் ஏராளம்! ஏராளம்!
போலிகள் உலவும் வணிகம் எங்களுடையது! எனக்கோ இந்த வணிகத்தில் நேர்மையை மட்டுமே கடைப்பிடிப்பது எனத் தீர்மானமாகிவிட்டது! எனவே தரமான பாகங்களை வாங்கிப் பொருத்தும் பணிமனை உரிமையாளர்களை நாங்கள் தேடிப்பிடித்து வணிகம் செய்யத் துவங்கினோம்! 

எங்கள் வணிகத்தில் நாங்கள் காட்டிய நேர்மையும், அசலான பாகங்களை மிகக் குறைந்த விலைக்கு விற்றதாலும் அக்கம் பக்கத்திலுள்ள ஊர்களில் எங்களின் பெயர் பரவி அங்குள்ள அசலான உதிரி பாகங்கள் பொருத்தும் பணிமனை உரிமையாளர்கள் எங்களைத் தேடி வரத் துவங்கினர்! 

கிட்டத்தட்ட ஏழு ஆண்டுகள் எங்களுக்குப் போட்டியாளர்களே இல்லாத நிலையில் நாங்கள் அந்த ஊரில் தரமான உதிரிபாகங்களை மிக மலிவாக விற்பனை செய்து வளர்ந்திருந்தோம்! அதன் பிறகு அந்த ஊரில் இருந்த பெரிய பணிமனை உரிமையாளர் நான்கு நண்பர்களைச் சேர்த்துக்கொண்டு எங்களுக்கு எதிராக ஆரம்பித்த ஒரு நிறுவனமும் எங்களின் தரம் மற்றும் நேர்மை காரணமாக ஐந்தாண்டுகளில் மூடுவிழா கண்டது!

இலாப நோக்கமின்றிய நிலையில் நாங்கள் எங்கள் நிறுவனத்தை நடத்துவதற்காக வாங்கிய கடன் தொகைகள் காரணமாகவும் எனது குடும்பத்தில் ஏற்பட்ட சில விளைவுகள் காரணமாகவும் பத்தாம் ஆண்டில் எங்களுக்கு ஏற்பட்ட கடனை அடைப்பதற்காக நாங்கள் எங்களது வீடு மற்றும் நகைகளை விற்பனை செய்ய வேண்டியதாயிற்று!

இந்த நிலையில் நான் ஏற்கனவே எனக்குப் பழக்கமான வாடிக்கையாளர்களைப் பெற்றிருந்த அருகிலிருந்த நகரில் தனித்து வணிகம் செய்வதெனத் தீர்மானித்தேன்!

இது குறித்து எனது நண்பர்கள் உறவினர்கள் எனப் பலரிடம் விவாதித்தேன்! தலைப்பிற்கேற்றவாறு நான்கு பேர் நான்கு விதமாகச் சொன்னார்கள்! அவை எல்லாமே என்னை நம்பிக்கையிழக்கச் செய்வனவாகவே இருந்தன!

நான் வணிகம் செய்வதாகத் திட்டமிட்டிருந்த நகரில் கடும் போட்டிகள் நிலவுவதாகவும், அங்கு வணிகம் துவக்கினால் வணிகம் செய்வதே கடினம் எனவும், மேலும் நான் அங்கிருக்கும் பெரிய நிறுவனங்களுடன் போட்டியிட இயலாது எனவும், பலரும் பலவிதமாகச் சொல்லத்துவங்கினர்! இறுதியாக நான் அங்கு ஒரு நாளைக்கு ஐநூறு ரூபாய்க்கு கூடவா வணிகம் ஆகாது என வினவ அதுகூட முடியாதெனத்தான் பதில் வந்தது! எனவே நான் அத்துடன் எவரிடமும் இனி கருத்து கேட்பதில்லை என முடிவு செய்துவிட்டேன்!

அதன் பின்னர் நான் அந்த நகரில் ஒரு நாளைக்கு ஐநூறு ரூபாய்க்கு வணிகம் கிடைத்தால் போதும் என்ற இலக்குடன் எனது வணிகத்தைத் துவக்கினேன்! 
வணிகம் துவங்கிய பின்னர் உண்மையைச் சொல்லப்போனால் என்னுடைய விலைதான் அந்த நகரிலேயே மிகவும் குறைவாக இருந்தது! நான் எதிர்பார்த்த தினசரி ஐநூறு ரூபாய் என்ற வணிக இல்க்கும் எனக்கு முதல் மாதத்திலிருந்தே கிட்டியது!

வணிகம் துவங்கிய ஓராண்டிலிருந்து படிப்படியாக வளர்ந்து ஒரு கட்டத்தில் நான் சந்தித்த சில விழைவுகள் மற்றும் தவறுகள் காரணமாக எனது வணிக வாழ்வு அங்கும் முடிவுக்கு வந்த பத்தாவதாம் ஆண்டுக்கு முந்தைய ஒன்பதாம் ஆண்டில் அங்கு எனது தினசரி சாரசரி வணிகம் ரூபாய் எட்டாயிரமாகும்! அதாவது வணிக மொத்த விற்றுமுதல் அளவு அந்த ஆண்டு ரூபாய் இருபத்தைந்து இலட்சங்களாகும்!

இளமையில் எனக்கிருந்த துணிச்சலும், அதன் பின்னர் ஒரு ஊரில் வணிகம் செய்து பெற்ற அனுபவம் இரண்டும்தான் எனது நம்பிக்iயின் பெரிய முதலீடாக இந்தப் பெரிய நகரிலும் இருந்தது! அதுவே என் எதிர்பார்ப்பிற்கு இணங்க சீரான வணிக வளர்ச்சியையும் கொடுத்தது! 

இந்த இரண்டு இடங்களிலும் நான் செய்த பெரிய தவறே கடன் வாங்கிக் கடன் கொடுத்து வணிகம் செய்ய முற்பட்டதுதாம்! முதல் ஊரில் சொத்துக்களும் நகைகளும் இருந்ததால் என்னால் அந்தக் கடன்களை அடைக்க முடிந்தது! இரண்டாவது நகரிலோ எனக்கு வணிகத்தில் முதல் ஊரில் கிடைத்த அதே கசப்பான அனுபவங்களே கிடைக்க நான் பட்ட கடன்களை அடைக்க வழியின்றியே எனது வணிகத்தை முடிவிற்குக் கொண்டு வரவேண்டியதாயிற்று!

தலைப்பிற்கே வருவோம்! வணிகத்தைப் பொருத்தவரை நாம் விவாதிக்கும் நான்குபேரும் நான்கு விதமான கருத்துகளைத்தான் சொல்வார்கள்! நம்பிக்கையளிக்கும் விதமாகச் சொல்பவர்கள் குறைவுதான்! நாம் நம்முடைய வணிகத்தில் கொண்டுள்ள அனுபவம், வணிக நேர்மை, வாடிக்கையாளர்களை ஈர்க்கும் விதம், நம்முடைய வணிகம் அமைகின்ற இடம் என்பன போன்றவற்றை நாம் எவ்வாறு சரியாகக் கணித்து நடந்து நம் வணிகத்தைக் கையாள்கிறோமோ அந்த அளவிற்கு நம்முடைய வணிக எதிர்பார்ப்பு நிச்சயம் ஈடேறும் என்பதுதாம் என் இருபத்தைந்தாண்டு கால வாழ்வில் நான் கண்ட உண்மையான அனுபவமாகும்!

Read More...