திங்கள், 24 நவம்பர், 2014

சாத்தான்கள் வேதம் ஓதுகின்றன!

Leave a Comment
தமிழகத்தில் உள்ள ஆளும் இயக்கத்திற்கு எதிரான மத்திய மற்றும் மாநில இயக்கங்கள் தமிழகத்தில் முழுமையான மதுவிலக்குக் கோரி அடிக்கடி அறிக்கைகள், போராட்டங்கள், விழிப்புணர்வுக் கூட்டங்கள், விழிப்புணர்வு நடைப்பயணங்கள் போன்றவற்றை மேற்கொண்டிருக்கின்றன! தேசத்தந்தையின் பெயர் தாங்கிய இயக்கமும் இவற்றில் அடக்கம்!

இந்த இயக்கங்கள் எல்லாம் ஏதோ தற்பொழுதுதாம் தமிழகத்தில் துவங்கியவை போலவும், தமிழக மக்களை தற்பொழுதுள்ள ஆளும் இயக்கம் மது போதையில் வீழ்த்தியிருப்பதை இந்த இயக்கங்கள் இப்பொழுதுதாம் கண்ணுற்றது போலவும் பரப்புரைகள் மேற்கொண்டு வருகின்றன!

பொதுவாக போதை ஏறிய ஒரு நபருக்கு சுயநினைவு தப்பிவிடுவது இயற்கை! போதை ஏறிய நிலையில் அவரிடம் எந்தவித அறிவுரைகளும் ஏறாதென்பதும் அனைவரும் அறிந்ததே! 

மதுவால் வரும் வருமானத்தில் திலைக்கும் தமிழகத்தை ஆளும் இயக்கமும் ஏறக்குறைய இதே போதை நிலையில்தான் உள்ளதென்பதும் மதுவால் விளையும் கேடுகள் பற்றிய அறிவுரைகள் இவர்களிடம் எடுபடாதென்பதும் இந்த இயக்கங்களுக்கு விளங்காததல்ல!

மதுவிற்கு எதிராகப் பரப்புரை நிகழ்த்தும் மத்திய மாநில இயங்கங்கள் அனைத்துமே தமிழகத்தில் மதுவை அறிமுகப்படுத்திய மற்றும் தொடர்ந்து அமல்படுத்தும் இரு பெரும் திராவிட இயக்கங்களின் தயவால்தாம் தங்களின் அரசியல் வாழ்வை இதுவரை வளர்த்து வந்து தக்க வைத்துக் கொண்டுள்ளன!

இன்னும் ஒரு படி மேலே சொல்வதென்றால் இந்த இயக்கங்கள் தேர்தலுக்குத் தேர்தல் இந்த இரு பெரும் சாராய சாம்ராஜ்ஜிய இயக்கங்களுடன் இணைந்து சியர்ஸ் சொல்லித்தாம் தங்களின் தொகுதிப் பிரதிநிதிகளை அடைந்து வந்துள்ளன!

இதே போன்று தமிழகத்திலுள்ள அனைத்து இயக்கங்களும் ஒருவர் மீது ஒருவர் ஊழல் குற்றச்சாட்டுக்களை பரிமாறிக்கொள்கின்றன! அதே சமயம் இது போன்ற இயக்கங்கள் அனைத்துமே ஊழலில் ஈடுபட்ட பெரிய இயக்கங்களின் தேர்தல் கூட்டணிகளில்தாம் மாறி மாறிப் பங்கேற்று ஊழல் பணத்தை வாரி இறைத்து தேர்தல் வெற்றிகளைச் சுவைத்து வந்துள்ளன!

இப்படிப்பட்ட நிலையில் இந்த இயக்கங்கள் மதுவிற்கு எதிராகப் போராடுவதாகப் பசப்புவதும் ஊழலுக்கு எதிராகப் பேசுவதும் தலைப்பிற்கேற்றவாறு சாத்தான்கள் வேதம் ஓதுவதாகத்தாம் எம் போன்ற பாமரர்கள் மனதில் படுகிறது!

Read More...

வெள்ளி, 14 நவம்பர், 2014

இனிய குழந்தைகள் தின நல்வாழ்த்துக்கள்!

Leave a Comment
நவபாரதச் சிற்பி என்றழைக்கப்பட்ட பண்டித ஜவகர்லால் நேரு அவர்கள் பிறந்த இந்த நன்னாள் பாரதத்தில் குழந்தைகள் தினமாகக் கொண்டாடப்படுகிறது!

தமிழகத்திலுள்ள அனைத்து பெற்றோர்களுக்கும் ஐந்தாம் தமிழ்ச்சங்கத்தின் சார்பாக கீழ்க்ண்ட வேண்டுகோள்களை விடுக்கிறோம்!

தமிழகத்தில் பிறப்பெடுத்துள்ள பிறப்பெடுக்கும் ஒவ்வொரு குழந்தைகளும் அளவற்ற அறிவுடன் திகழக்கூடியவை!

எனவே தங்களின் குழந்தைகளின் கேள்விகளைப் புறக்கணிக்காதீர்கள்! கேள்விகள் கேட்கக்கேட்கத்தான் அந்தக் குழந்தைகளின் அறிவுத் திறன் வளரும்

அவர்களின் கேள்விகளுக்கு உங்களால் பதிலளிக்க இயலாவிட்டால் முடிந்தவரை அடுத்தவரிடம் கேட்டாவது அவர்களி;ன் அறிவுத்திறன் மேம்பட உதவுங்கள்!

எந்தக் காரணம் கொண்டும் குழந்தைகளை அடித்து வளர்க்காதீர்கள்! உங்களின் தனிப்பட்ட கோபங்களுக்கு வடிகாலாகக் குழந்தைகளை அடிப்பதை தயவு செய்து நிறுத்துங்கள்!

அடிபட்டு வளரும் குழந்தைகள்தாம் எதிர்காலத்தில் எவர் பேச்சையும் கேளாமல் முரட்டுத்தனமாக வளர்ந்து தீவிரவாதிகளாக மாறும் வாய்ப்புகளுக்குக் காரணமாகலாம்!

குழந்தைகளை அவர்கள் விரும்பும் வரை படிக்க வைப்பதில் எந்தத் தயக்கமும் காட்டாதீர்கள்! அவர்கள் படிப்பதில் ஆர்வமற்றிருந்தாலும் முடிந்தவரை படிக்க வைத்து அவர்களுக்குள்ள தனித்திறமைகளைக் கண்டறிந்து படிப்புடன் அவற்றை வளர்க்க முயலுங்கள்!

உங்களின் குழந்தை எதிர்காலத்தில் ஒரு சிறந்த பாடகராக விளையாட்டு வீரராக பொது வாழ்க்கைத் தொண்டராக ஓவியராக எப்படி வேண்டுமானாலும் வரலாம்

உங்களின் தனிப்பட்ட விருப்பத்தை அவர்களின் மீது நீங்கள் திணிக்க முயன்றால் இத்தகையவர்களை உங்களால் ஒருவேளை நாடு இழக்க நேரிடும்!

குழந்தைகளை வேலைக்கு அனுப்பி அவர்களின் வருமானத்தில் குடும்பம் நடத்துவது அவமானம் எனக் கருதுங்கள்!

குழந்தைகள்தாம் இந்த நாட்டின் எதிர்காலம்! அவர்கள் நேரு அவர்கள் விரும்பிய ரோஜா மலர்களைப் போன்று மலர்ந்து மணம் வீசுபவர்கள்!

எனவே யாராக இருந்தாலும் குழந்தைகளை ஒரு ரோஜா மலராகவே கருதுங்கள்! அவ்வாறே அவர்களை வளர்த்துங்கள்! மலர் போன்ற கண்ணோட்டத்திலேயே குழந்தைகளைப் பாவியுங்கள்!

நாளைய பாரதத்தை வழி நடத்தப் போவது இன்றைய ரோஜா மலர்களாகக்காட்சியளிக்கும் நேரு அவர்கள் மிகவும் விரும்பிய நம் குழந்தைகள்தாம்!

பாரதத்திலுள்ள அனைத்து ரோஜா மலர்களுக்கும் ஐந்தாம் தமிழ்ச்சங்கத்தின் சார்பாக இனிய குழந்தைகள் தின நல்வாழ்த்துக்கள் உரித்தாகட்டும்!



Read More...

வியாழன், 6 நவம்பர், 2014

தமிழக இளைய சமுதாயமே உங்களின் வருங்கால நிலைப்பாடு என்ன?

Leave a Comment
தமிழகத்தில் புதிதாகத் துவக்கியுள்ள பிரபலமான நாளிதழின் தiலைப்புச் செய்தியினைப் படிக்க நேர்ந்தது! 2016 ஆம் ஆண்டு நடைபெற உள்ள சட்டமன்றத் தேர்தலுக்கு தமிழகத்தில் உள்ள அரசியல் இயக்கங்கள் தயாராகி வருவதாகவும் குறிப்பாகக் கூட்டணிகள் எவ்வாறு அமையுமென்பது குறித்தும் அந்த நாளிதழ் இன்றைய அரசியல் இயக்கங்களின் மன நிலையைக் கணித்துச் செய்தி வெளியிட்டுள்ளது!

இந்தத் தேர்தலைச் சந்திக்க உள்ள தமிழகத்தின் இரு பிரதான இயக்கங்களின் நிலைப்பாடு அந்த இயக்கங்களின் தலைவர்கள் செய்துள்ளதாகக் கூறப்படும் ஊழல் குற்றச்சாட்டின் காரணமாக வெளிவர இருக்கும் வாய்மை மன்றத் தீர்ப்புகளின் அடிப்படையில்தாம் அவற்றின் எதிர்காலத்தைத் தமிழக மக்கள் தீர்மானிப்பார்கள் என அந்தச் செய்தி கூறுகிறது!

இந்த இரு அணிகளில் மட்டுமே தேர்தலுக்குத் தேர்தல் பச்சோந்தி குண நி;றம் காட்டி அணி மாறித் தங்களின் வாக்கு வங்கிச் சதவிகிதத்தை இங்குள்ள ஏராளமான உதிரி இயக்கங்கள் (குறிப்பாக சாதியம் சார்ந்த அரசியல் இயக்கங்கள்) தக்க வைத்துக் கொண்டு தங்கள் இயக்கம் சாதிய அடிப்படையில் செல்வாக்கு வகிக்கும் குறிப்பிட்ட சில இடங்களை மட்டுமே கைப்பற்றித் தொடர்ந்து தங்களின் அரசியல் வாழ்க்கையைத் தொடர்வதற்கு முயல்கின்றன!

இது போன்ற உதிரி இயக்கங்கள் தங்களின் மேடைகளில் ஏதோ தாங்கள்தாம் வரும் 2016 ஆண்டில் தமிழக மக்களின் முழு ஆதரவுடன் ஆட்சி அமைக்கப் போவதாக முதல்வர் கனவுகளுடன் பேசுவதும் தமிழக மக்களின் நகைப்புக்குரிய ஒரு வழக்கமான செயல்கள்தாம்!

இந்த இரு இயக்கங்களின் ஊழல் குணத்தை வெளிப்படுத்தியவண்ணம் தமிழகத்தில் இருந்த இது போன்ற உதிரி சாதிக்கட்சிகளின் துணையோடு கடந்த நாடாளுமன்றத் தேர்தலைத் சந்தித்தது பாஜக! 

இந்த மதவாத இயக்கத்தின் வருகையை விரும்பாத தமிழக மக்கள் வேண்டா வெறுப்பாக இருக்கின்ற இரு ஊழல் இயக்கங்களில் ஒன்றின் வாக்கு வங்கிச் சதவிகிதத்தை அதிகரித்துவிட இது புரியாத ஆளும் இயக்கம் தலைகால் புரியாமல் தங்களின் இயக்கம் ஊழல் வழக்கினைச் சந்தித்தபோது நடத்திய அராஜக தர்பார் உலகறிந்தது! பஜக இயக்கம் அகில பாரத அளவில் மதவாத வன்முறையும் கிரிமினல் குற்றவாளிகளை நாடாளுமன்ற சட்டமன்ற உருப்பினர்களாகக் கொண்டது என்பதும் நாடறிந்த உண்மை! இத்தகைய குணம் உடையவர்களைக்  கொண்ட ஒரு இயக்கம் நிச்சயம் ஊழல் நிறைந்த இயக்கமாக இருக்காது என்பது என்ன நிச்சயம்?

இத்தகைய சூழலில் அகில பாரத அளவில் இந்த இயக்கம் பெற்ற வெற்றியைத் தமிழகத்திலும் எப்படியாவது அடைவது என்ற நோக்கில் தமிழகத்தில் பிரபலமான மாற்றுக் கட்சி அரசியல்வாதிகளையும், நாடாளத் துடிக்கும் நடிகர்களையும் எப்படியேனும் வளைத்து தங்களின் செல்வாக்கினைத் தமிழகத்தில் நிலை நிறுத்த வேண்டுமெனப் பகீரதப் பிரயத்தனம் செய்து வருகின்றது!

பெருந்தலைவரின் மறைவிற்குப் பிறகு பணக்காரர்கள் மட்டுமே ஆதிக்கம் செழுத்தும் காங்கிரசு இயக்கம் தங்களைத் தேர்தலுக்குத் தேர்தல் சுமந்து வளர்த்த இரு ஊழல் திராவிட இயக்கங்கள் தங்களின் தோள் வலி தாங்காமல் இறக்கி விட்டு அம்போ என விட்டுவிட்ட நிலையிலும், வழக்கமாகக் காணப்படும் உட்கட்சிக் கோஷ்டிச் சண்டையின் உச்சகட்டமாக மீண்டும் பிளவுபட்டு படு மோசமான நிலையில் தனது வாக்கு வங்கி பலவீனப்பட்ட நிலையில் காணச் சகியாமல் பரிதவித்துத் தவிக்கிறது!

பொதுவாக நாம் ஒரு விவாதத்தில் பங்கேற்றால் அந்த விவாதத்தில் பங்கு கொள்ளும் அனைவருமே ஊழல்வாதிகளை வெறுத்தேதாம் தங்களின் விவாதத்தை வெளிப்படுத்துகின்றனர்!

ஆனாலும் தமிழகத்தின் போதாத காலம் இவர்கள் அனைவரும் தேர்தல் காலங்களில் ஏதேனும் ஓர் ஊழல் இயக்கத்திற்குத்தாம் தவறாமல் அந்த நேரத்து நிலைக்கு ஏற்ப இருப்பதில் இது மேலென்ற மன நிலையுடன் வாக்களிக்கின்றனர்! 

ஊழலை வெறுப்பவர்கள் ஏன் தங்களின் சனநாயகக் கடமையின்போது ஊழல் பேர்வழிகளையே சகித்துக்கொண்டு மீண்டும் மீண்டும் வாக்களித்து வெற்றியடையச் செய்து மீண்டும் மீண்டும் ஊழல் சகதியில் சிக்கி அவதியுறுகின்றனர் என்பதுதாம் இங்குள்ள கேள்வியே!

தமிழகத்தின் போதாத காலத்திற்கு இங்குள்ள அனைத்து இயக்கங்களுமே தமிழகத்தில் பெரும்பான்மையாக உள்ள இளைய சமுதாயத்தைத்தான் புரட்சி செய்யுங்கள்! தமிழகத்தின் வரலாற்றை மாற்றி எழுதுங்கள் என வேண்டுகோள் விடுக்கின்றனர்!

அப்படியானால் ஊழலுக்கு ஆதரவாகத்தான் இந்த ஊழல் இயக்கங்கள் புரட்சி செய்ய இளைய சமுதாயத்தை அழைக்கின்றனவா?

இந்த நிலையில் தமிழக இளைய சமுதாயமே உங்களின் வருங்கால நிலைப்பாடு என்ன? வரும் 2016 சட்டமன்றத் தேர்தலில் உங்களின் பங்களிப்பு எவ்வாறாக இருக்கும்? இந்தக் கேள்விக்கு உங்கள் பதில் என்ன? 

தங்களின் மேலான பதில்களை ஐந்தாம் தமிழ்ச்சங்கத்தில் பதிவு செய்ய அழைக்கிறோம்!

Read More...