வியாழன், 24 டிசம்பர், 2015

தமிழர் தந்தை பெரியார் மற்றும் எம்ஜியார் நினைவு தினம் இன்று!

Leave a Comment
தமிழர்களின் பெயர்களின் பின்னால் ஒட்டிக் கொண்டிருந்த சாதி எனும் வாலை ஒட்ட நறுக்கி எறிந்த தமிழர் தந்தை பெரியார் அவர்களின் நினைவு தினம் இன்று.

தமிழகத்தை இன்றும் ஆட்டிப் படைக்கும் சாதிய மதவாத சக்திகளுக்கு எதிராக தமிழ் மக்கள் ஒன்று திரள வேண்டிய கால கட்டம் இது.

தமிழினம் ஒன்றுபட்ட காட்சியினை கடந்த வெள்ளச் சேத நிகழ்வுகள் தெள்ளத் தெளிவாக நிரூபித்துள்ளன.

இதே நாளில் மறைந்த அமரர் எம்ஜியார் அவர்களின் கனவுப் பாடல்கள் நனவாவது இன்றைய திராவிட இயக்கங்களால் நிறைவேறவே இயலாத காரியம்.

அவர்தம் கனவுகளும் நனவாக திராவிட இயக்கங்களை விரும்பாத மக்கள் ஒன்றுபட வேண்டியதும் காலத்தின் கட்டாயம்.

தமிழினம் உள்ளவரை தந்தை பெரியார் அவர்களின் எழுத்துக்களும் எழுச்சி உரைகளும் தமிழர்தம் மனதில் நீங்காத இடம் பெற்றிருக்கும் என்ற நம்பிக்கைகளுடன்

மாற்று இயக்கமானாலும் தந்தை பெரியாரால் மதிக்கப்பட்ட கர்மவீரர் போன்ற ஒரு எளிமையான நல்லவரின் தலைமை தமிழகத்திற்கு இன்று மிக மிக அவசியம் என்ற எதிர்பார்ப்புடன் அந்த நல்லவருக்காகக் காத்திருக்கிறோம்.

வாழ்க தந்தை பெரியார் மற்றும் அமரர் எம்ஜியார் புகழ்!

Read More...

செவ்வாய், 24 நவம்பர், 2015

புகை உயிருக்குப் பகை!

Leave a Comment
எனக்கு விபரம் தெரிந்த நாள் முதல் எனது தந்தைக்குப் புகை பிடிக்கும் பழக்கம் உண்டு.
எனக்கு ஐந்து வயது இருக்கும்போது எங்கள் வீட்டில் எனது தமக்கைகள் இருவரும் ஒரு நாள் எங்கள் வீட்டில் இருந்த ஒரு மரத்தாலான பீரோவின் முன்னும் பின்னும் ஓடியபடி சண்டையிட்டுக் கொண்டிருந்தனர்.

எனது தந்தை அந்தப் பீரோவின் மேல் தனது பீடிக் கட்டினை வைத்திருப்பது வழக்கம். மேலும் சிறுவனாகிய என்னையும், நான் வளர்ந்து வாலிபனான பிறகும்கூட அவர் இதை கடைகளில் வாங்கி வரச் சொல்வதும் வழக்கம்.

அன்று எனது தமக்கைகளின் சண்டை அமளிக்கிடையே நான் எனது தந்தை வைத்திருந்த ஒரு பீடிக் கட்டிலிருந்த பீடி ஒன்றை எடுத்து விளையாட்டாக எனது வாயில் வைக்கப் போனேன்.

அப்பொழுது திடீரென அந்த மர பீரோ எனது தமக்கை எவரோ பின்னாலிருந்து தள்ளிவிட்டதால் குப்புற விழுந்தது. பயந்து நான் ஒதுங்கிய போது என் கையிலிருந்த அந்த பீடியும் நழுவியது.

என்னுள் ஏதோ நிகழ்ந்தது. இது தவறான பழக்கம் என்பதாக. என்னை இன்றுவரை காத்துவரும் நல்ல சக்தி செய்த எச்சரிக்கைதான் அது. தனது புகைப்பிடிக்கும் பழக்கம் பற்றி தேசத்தந்தை அண்ணல் அவர்கள் எழுதிய கட்டுரையைப் பின்னாலில் படித்தபோது என்னைக் காத்த சக்திக்ளுக்கு நான் நன்றியுள்ளவனானேன்.

அந்த மர பீரோ இன்றுவரை என்னை ஒரு தீய விளைவிலிருந்து காத்ததற்கு சாட்சியமாக எங்கள் வீட்டில் இன்றும் உள்ளது.

எனக்குத் தெரிந்து எனது முப்பத்தைந்த வயது வரை எனது தகப்பனாருக்கு புகைக்கும் பழக்கம் உண்டு.. எனது வாலிபப் பருவத்தில் அவரிடம் இந்தப் பழக்கத்தை விட்டுவிடும்படி நான் பலமுறை கேட்டும் அவர் அதைப் பொருட்படுத்தியதில்லை.

ஒரு முறை நான் பேருந்தில் சென்றபோது (அப்போது பேருந்தில் புகைப்பது தடை செய்யப்படாத காலம்) பின்புறமிருந்து எவரோ வீசிய சிகரெட் துண்டு காற்றில் பறந்து வந்து எனது விலை உயர்ந்த கால் சட்டையில் விழுந்து அது ஓட்டையானதுடன் எனது காலில் காயமும் ஏற்பட்டது.

அதை வீசியவர் எவர் எனத் தெரியாமல் ஏற்பட்ட கோபத்துடன் வீடு திரும்பியபோது எனது தந்தை வழக்கமாக எங்கள் வீட்டுத் திண்ணையில் அமர்ந்து புகைத்துக் கொண்டிருந்தார்.

இந்தக் கோபம் அப்படியே எனது தந்தை மீது திரும்ப நான் அவரிடம் நேரடியாகச் சண்டையிடாமல் எனது தாயிடம் எனது கோபத்தைக் கொட்ட எனது தாயாரும் யார் மீதோ உள்ள கோபத்தை இங்கு வந்து ஏன் காண்பிக்கிறாய் என என்னிடம்தான் கோபப்பட்டார்.

அதன் பிறகும் எனது தந்தையின் இந்தப் பழக்கம் விட்டபாடில்லை. ஒரு முறை அவருக்கு இருந்த வாய்வுத் தொல்லை காரணமாக ஏற்பட்ட உடல்நலக் குறைவினை அடுத்து அவர் ஒரு மருத்துவமனையில் சேர்க்கப்பட்டார்.

அங்கு அவருக்கு அளிக்கப்பட்ட உயர்தரச் சிகிச்சையின்போது செயல்பட்ட நவீன மருத்துவக் கருவிகளைக் கண்டு தனக்கு மாரடைப்பு வந்துவிட்டதாக அவர் கற்பனை செய்துகொண்டு பயந்துவிட்டார்.

மருத்துவமனையிலிருந்து வீடு திரும்பியவுடன் தனது புகைபிடிக்கும் பழக்கத்தை அன்று விட்டவர்தான் அதன் பிறகு தனது இறுதிக் காலம் வரை அவர் அந்தப் பழக்கத்தை மேற்கொள்ளவே இல்லை. அதன் பிறகு அவர் பதினைந்து ஆண்டுகளுக்கு மேல் சர்க்கரை நோயுடன் இருந்தபோதும் உரிய மருத்துவப் பரிசோதனைகளுடன் ஆரோக்கியமாகவே இருந்தார்.

எனினும் அவரது உள் உறுப்புகள் பல ஆண்டுகள் புகைத்த காரணத்தால் பாதிக்கப்பட்டிருக்க வேண்டும். ஒரு முறை கடுமையான காய்ச்சல் என மருத்துவமனை சென்று மூன்று நாட்கள் தொடர்ந்து சிகிச்சை பெற்றார்.

மூன்று நாட்களுக்குப் பிறகுதான் அவருக்குக் கடுமையான மஞ்சள் காமாலை நோய் தாக்கியுள்ளது தெரிய வந்தது. நோய் முற்றிய நிலையில் இருந்ததால் அவரை எங்களால் மருத்துவமனை சேர்த்து ஏராளம் செலவிட்டும் காப்பாற்ற இயலவில்லை.

புகை பிடிக்கும் பழக்கம் இல்லாதிருந்தால் அவர் இன்னும் பல ஆண்டுகள் வாழ்ந்து பேரன் பேத்திகளின் திருமணக் காட்சிகளைக் கண்டிருக்க முடியும்.

அவருடன் முப்பத்தைந்து வயது வரை வசித்த எனக்குப் புகை பிடிக்கும் பழக்கம் இல்லாதிருந்தும் சுவாசம் சம்பந்தப்பட்ட நோய்க்கு ஆட்பட்டேன். சித்த மருத்துவத்தின் துணையால் கடுமையான மூச்சிறைப்பு நோயிலிருந்து எனது 43வது வயதில் விடுபட்டு இன்று 53 வயதில் இந்தக் கட்டுரையை எழுதியுள்ளேன்.


எனக்குத் தெரிந்து புகை பிடிப்பவர்களை இந்தப் பழக்கத்தை விட்டுவிட்டு எனது தந்தை பல ஆண்டுகள் ஆரோக்கியமாக இருந்ததை சுட்டிக்காட்டி நான் திருத்த முயன்றுள்ளேன். இதைப் படிக்கும் வாசகர்களில் எவரேனும் ஒருவர் திருந்தினால்கூட அது எனது அனுபவத்திற்கும் இந்தக் கட்டுரைக்கும் கிடைத்த பயனாகத்தான் என்னால் மகிழ முடியும்.
Read More...

வியாழன், 19 நவம்பர், 2015

தமிழக ஊடகங்களுக்கு ஒரு தாழ்மையான வேண்டுகோள்!

Leave a Comment
தமிழக ஊடகங்கள் தற்போதுள்ள ஊழல் அரசியல்வாதிகள், பிரபலமானவர்கள் எனப் பணம் படைத்தவர்கள், திரைத்துறையினர் எனச் செல்வந்தர்களாகக் காட்சியளிப்பவர்கள் தருகின்ற அறிக்கைகளையும், அவர்கள் சம்பந்தப்பட்ட எதுவாகினும் உடனுக்குடன் வெளியிட்டுத் தங்கள் பத்திரிகை தர்மத்தைக் கட்டிக் காத்துக் கொள்கின்றனர்.

இவர்கள் தரும் அறிக்கைகள், மற்றும் இவர்கள் சம்பந்தப்பட்ட செய்திகளை வெளியிட்டால்தான் தங்களின் வருமான வாய்ப்பினைத் தக்க வைத்துக் கொள்ள முடியும் என்பது உண்மையாயினும், 

தயவு செய்து தமிழக மக்களின் நலன் கருதியாவது உண்மையிலேயே மக்களுக்காகப் பாடுபடும் நல்லவர்கள், எளிமையானவர்கள், தொண்டு மனப்பான்மை உடையவர்கள், தமிழ் அறிஞர்கள், விஞ்ஞானிகள், ஊழலுக்கும், சமூக அவலங்களுக்கும் எதிராகப் போராடும் குணம் உள்ளவர்கள் என 

சமூகப் போராளிகளை அடையாளம் கண்டு அவர்களின் அறிக்கைகளையும், கட்டுரைகளையும், விமர்சனங்களையும் தமிழகத்தின் வருங்கால நலன் கருதி இனியாவது துணிந்து வெளியிடுங்கள்!

முடங்கிக் கிடக்கும் இது போன்ற நல்லவர்களை ஊடகங்கள் வாயிலாக அறிய அறிய மெல்ல மெல்ல ஊழல் பேர்வழிகள், சுயநலமிக்க அரசியல்வாதிகள் மக்களின் மனதிலிருந்து அகன்று நல்லவர்கள் மட்டுமே நிறையத் துவங்குவர்.

ஊழல் பேர்வழிகளும், ஆதிக்கமிக்க அரசியல்வாதிகளும் ஓரம் கட்டப்பட்டால்தான் நாட்டில் ஒழுக்கமும் ஆரோக்கியமிக்க நாகரீகமும் மலரத் துவங்கும்,

அதுதான் நம் தாய்த்தமிழகத்தை வெகு வேகமாக உலக அரங்கில் முன்னெடுத்துச் செல்ல உதவும்!

இதுவே உங்களின் ஊடக வாய்மையாக வருங்காலத் தமிழ்ச் சந்ததி உங்களை போற்றப் போவதற்கு நீங்கள் செய்ய வேண்டிய கைமாறு!

இதுவே வெகுசன ஊடகங்களிடம் எமது பணிவான வேண்டுகோள்! 


Read More...

புதன், 18 நவம்பர், 2015

காது கேளாதவரிடம் ஊதிய சங்கு!

Leave a Comment
நல்லவர்களுக்கு வாக்களிக்க மறுக்கும் மக்கள்!

குடவோலை எனப்படும் வாய்மைத் தத்துவ முறையில் தங்களின் மக்கள் பிரதிநிதிகளைத் தேர்ந்தெடுத்து பாரபட்சமற்ற நல்லவர்களை சங்ககாலத்தில் தேர்ந்தெடுத்துப் பயனுற்ற நம் தமிழக மக்கள் இன்று படிப்பறிவு பெற்ற நாட்களிலும் ஏனோ தங்களின் சரியான மக்கள் பிரதிநிதிகளைத் தேர்ந்தெடுக்கத் தவறுகின்றனர்.

மக்கள் தாங்கள் சார்ந்துள்ள இயக்கம் அறிவிக்கும் வேட்பாளர்களைத்தான் கவனிக்கிறார்களே தவிர அவர்கள் எளிமையானவர்களா அல்லது வசதி படைத்தவர்களா என்பதை கவனிப்பதே இல்லை. 

இன்றுள்ள இயக்கங்கள் தேர்தலில் ஏராளமாகச் செலவிடக்கூடிய தகுதியுள்ள பெரும் செல்வந்த அரசியல்வாதிகளைத்தாம் தங்களின் தேர்தல் வேட்பாளர்களாகக் களமிறக்குகின்றன.

இந்தச் செல்வந்தர்கள் இந்த அளவிற்கு உயர்ந்துள்ளது அவர்களின் சொந்த உழைப்பிலா அல்லது மக்கள் தொண்டு செய்ய வந்து அதைத் தவறாகப் பயன்படுத்தி செல்வந்தர்களானார்களா என்பதையெல்லாம் மக்கள ஆராய்வதே இல்லை.

எந்தவித நிறுவனமும் நடத்தாத ஒருவர் சாதி வாக்கினை மட்டுமே பெற்று வளர்ந்து ஒரு தேர்தலில் தனது சொத்து மதிப்பினை ஐம்பது இலட்சங்கள் என்கிறார். அதே வேட்பாளர் ஐந்தாண்டுகள் கழிந்த நிலையில் ஒரு வளர்ந்த தலைவராகக் காட்சியளித்து அடுத்த தேர்தலில் தனது சொத்து மதிப்பினை ஐந்து கோடிகள் என அறிவிக்கிறார். 

ஐந்தாண்டுகளில் பெரிய வணிகம் செய்யும் வணிகர்கூட இவ்வளவு தொகையினை வருமானமாக ஈட்ட முடியுமா என்பது எமது அறிவிற்கு விளங்கவில்லை. 

சாமானியர்களின்  ஒரு இலட்சத்திற்குரிய பரிவர்த்தனைகளையும் நாங்கள் கண்காணித்துக் கொண்டுதான் உள்ளோம் என ஊடகங்களில் தொடர்ந்து அறிவிக்கும் வருமான வரித்துறைக்குமா இது விளங்காமல் போனது என்பதுதாம் எம் போன்ற பாமரர்களின் கேள்வியே.

ஒவ்வொரு தொகுதியிலும் மக்கள் தற்போதுள்ள ஆடம்பர அரசியல்வாதிகளைப் புறக்கணித்து எளிமையானவர்களாக, மக்களுக்கு உழைப்பதற்கென்றே தங்களை அர்ப்பணிக்கும் மனமுள்ளவர்களாகத் திகழும் நல்லவர்களை அடையாளம் கண்டு 

அவரிடம் காணப்படும் பொதுத் தொண்டு ஒன்றை மட்டுமே மனதில் கொண்டு அவர்களைத் தங்கள் பிரதிநிதிகளாக்கி வெற்றி பெறச் செய்தால் சுயேச்சைகளாகத் தேர்ந்தெடுக்கப்படும் இவர்கள் ஒன்று சேர்ந்து ஒரு நல்ல அரசாங்க அமைப்பாக உருவாகலாமே என  எவரிடம் உரையாடினாலும் ஒட்டுமொத்தமாக அவர்கள் கூறும் பதில் இதோ இதுதான்.

அட போங்கள் அய்யா! நல்லவர்களைத் தேர்ந்தெடுத்தால் அவர்களைக்கூட இன்றுள்ள அரசியல் சூழல் கெட்டவர்களாக மாற்றிவிடும்!

இதுவா பொறுப்புள்ள ஒரு நல்ல வாக்காளர் தருகின்ற ஆரோக்கியமான பதில்?

ஆக மக்கள் நல்லவர்களைத் தேர்ந்தெடுக்க மனதளவில்கூடத் தயாராவதில்லை எனும்போது 

மோசமான அரசியல்வாதிகளைத்தான் தொடர்ந்து நாங்கள் ஆதரிப்போம். 

அவர்கள் செய்யும் ஊழலையும், அராஜகத்தையும் கண்டு கொள்ளாமல் வாக்களிப்போம். 

தேர்தல் நாளன்றும், தேர்தலுக்குப் பின்னரும் அவர்கள் தரும் பணத்தினையும் இலவசங்களையும் இது நம்முடையதுதானே என்று வெட்கமில்லாமல் கூறி வாங்கிக கொள்வோம்.

பின்னர் வரும் ஐந்தாண்டுகளும் இந்த அரசியல்வாதிகள் எதிரும் புதிருமாக கீரியும் பாம்பும் போலச் சண்டையிட்டுக் கொண்டு உள்ளுக்குள் கூட்டு சேர்ந்து மக்கள் வரிப்பணத்தை ஏப்பமிடுவதைச் சகித்துக் கொண்டு வாழ்ந்து விடுகிறோம் என்ற மனப்பான்மை உள்ள மக்களிடம்

நல்லவர்களைத் தேர்ந்தெடுத்து ஒரு நல்ல அரசியல் அமைப்பு உருவாகத் துணை செய்யுங்கள் என்பது

காது கேளாதவரிடம் ஊதிய சங்குக்கு இணைதானே!

Read More...

செவ்வாய், 17 நவம்பர், 2015

இப்பொழுதிருந்தே விழித்திடுங்கள்!

Leave a Comment
சென்னையை உலுக்கிய புயல் மழையால் சென்னை மற்றும் புற நகர் பகுதிகள் மழை வெள்ளத்தில் தத்தளிக்கும் நிலையை ஊடகங்கள் வாயிலாக அறிவதில் வேதனை கொள்கிறோம்.

இயற்கையை மனிதன் நம்பாததும், சுயநலமிக்கவர்கள் கால்வாய்கள் ஏரிகள், என மழை நீர் செல்லும் வழிகள், சேகரமாகும் இடங்களை ஆக்கிரமித்து மனைகள் விற்க, அந்த இடங்கள் ஏரிகளாக இருந்தததையும் அறியாமல் வீடுகளைக் கட்டியதால் இயற்கை தன் போக்கில் ஏராளமான மழைப் பொழிவினை வாரி வழங்க அவை சேகரமாகும் இடங்கள் பரிதாபமாக வீடுகளாக இருந்த காரணத்தால் வெள்ளக் காட்டில் அங்கு வாழும் மக்கள் இன்று தத்தளிக்கின்ற நிலை உருவாகியுள்ளது.

மழை வரவா போகிறது என்ற அலட்சியம் மக்களுக்கும் அரசுகளுக்கும் ஏற்பட்டுத் தொலைய இயற்கையை நம்பாது ஆற்றின் கரையோரம் துவங்கி ஆற்றுக்குள்ளேயே வீடுகள் கட்டப்பட்டதும், வெள்ள காலங்களின் அபாயம் அறிந்தும் அரசுகள் அந்த வீடுகளை அங்கீகரித்து மின் இணைப்பும் இலவசமாக வாக்கு வங்கிக்கென வழங்கித் தொலைய, இன்று ஆற்றில் ஏற்பட்ட வெள்ளத்தில் வீடுகள் மூழ்கித் தங்களின் உயிரைக் காத்துக் கொண்டு உடமைகளை இழந்து தவிக்கும் மக்களை நினைந்து வேதனையுற மட்டுமே முடிகிறது.

சென்னையை மட:டுமல்ல இயற்கையை ஆக்கிரமித்துள்ள தமிழகத்தின் அனைத்து இடங்களிலும் இதே நிலைதாம். 

இனியாவது இது போன்ற அபாயகரமான இடங்களில் வசிக்கும் மக்களை அப்புறப்படுத்தி அவர்கள் ஒரு குருவிக்கூடு அளவிலானதாக இருந்தாலும் வசதியாக வாழும் வண்ணம் ஊழலில்லாக் குடியிருப்புகளை அடுத்த மழைக் காலம் துவங்குவதற்குள் கட்டிக் கொடுத:து குடியேற்றி தற்போதுள்ள அபாயகர வீடுகளை இடித்துத் தரைமட்டமாக்க வேண்டும்.

தெரிந்தோ தெரியாமலோ ஏரிகள் இருந்த இடங்களில் கட்டப்பட்டுள்ள குடியிருப்பை நோக்கி வரும் வெள்ள நீர் வழித்தடங்களை உடனடியாகக் கண்டறிந்து அவை வேற்றிடம் சென்று ஆக்கிரமிக்கப்படாத ஏரிகளைச் சென்றடைந்து குடிநீராதாரமாக மாற்றும் வாய்க்கால்களை உருவாக்கி சேகரிகக வேண்டும்.

இது மட்டுமன்றி தங்கள் வீடுகளிலிருந்து புறப்படும் சாக்கடைகளில் இனி எந்தப் பொருட்களையும் கொட்டி மழை நீர் வடிவதைத் தடுக்கத் தாங்களும் ஒரு காரணமாக மாட்டோம் என்ற உறுதிமொழியினை ஒவ்வொரு குடும்பமும் கட்டாயம் கைக்கொள்ள வேண்டும்.

2016 சட்டமன்றத் தேர்தலைக் குறி வைத்து ஆளும் எதிரணி இயக்கங்கள் ஆடு நனைகிறதே என ஓநாய் அழுவது போல தத்தம் பங்கிற்கு நிவாரணம் வழங்குவதாக அறிவித்து வந்தாலும் அவை தற்காலிக நிவாரணம்தான் என உணர்ந்து வரும் ஆண்டில் கடுமையான சூறாவழிகள் எத்தனை வந்தாலும் அத்தனையையும் சமாளிக்கும் ஆற்றலை மக்கள் பெற என்னென்ன வசதிகள் மேற்கண்டவாறு தேவையோ அவை அத்தனையையும் கேட்டோ அல்லது போராடியோ அரசிடம் பெற வேண்டியதுதாம் இனி மக்களுக்குள்ள ஒரே வருமுன் காக்கும் வழியாகும்.

எனவே இப்போதே விழித்திடுங்கள். நாளைய பொழுது நல்லதாக விடியும்!

Read More...

வெள்ளி, 13 நவம்பர், 2015

ஆலய சமத்துவம்

Leave a Comment
எனது மகளின் திருமண ஏற்பாடுகளுக்காக திருச்சியில் உள்ள அமைப்பு நடத்தும் மங்கள விழா என்ற பெண் மற்றும் ஆண் வீட்டார்களின் நேரடிச் சந்திப்புக்கு இந்த மாதத் துவக்கத்தில் சென்றிருந்தோம்.

இந்த முறை நாங்கள் முறையாகப் பதிவு செய்யச் சற்று கால தாமதம் ஏற்பட்டதால் அந் நிகழ்வில் எங்களால் கலந்து கொள்ள இயலவில்லை.

எனது துணைவியார் இந்த நிகழ்வில் கலந்து கொள்ள இயலவில்லை என்ற வருத்தத்துடன் உறவினர் இல்லம் திரும்பிக் கொண்டிருந்தபோது  வயலூர் சென்று வரலாமா என என்னிடம் வினவினார்.

நான் சித்தர்களின் தலைவன் முருகனின் பகுத்தறிவு வழி நடப்பவன். எனவே நல்லதாகப் போனது முருகன் தன்னிடம் வரச் சொல்லவே இந்த நிகழ்விலிருந்து அழைக்கிறார். இல்லையென்றால் இன்று மதியம்வரை நிகழ்வில் கலந்து கொண்டு ஊர் திரும்பவே நேரம் சரியாக இருந்திருக்கும் என்று கூறி நாங்கள் சென்ற சாலையிலிருந்து அருகிலேயே இருந்த வயலூருக்கு வாகனத்தைச் செழுத்தினேன்.

அங்கு சென்றபோது முருகன் சந்நிதியில் ஒரு பிராமணக் குடும்பத்துப் பெண்கள் தமிழில் இனிமையாக முருகனை வரச் சொல்லியும் வரம் தரச் சொல்லியும் பாடிக் கொண்டிருந்தனர்.

அவர்களில் ஒரு சகோதரி அர்ச்சகருக்குக் கொடுப்பதற்காக நூறு ரூபாயினைத் தனது பணப்பையிலிருந்து எடுப்பதையும் நான் கவனித்தேன். அவரோடிருந்த மற்றவர்கள் எவ்வளவு காணிக்கையை அர்ச்சகரின் தட்டில் போடக் காத்திருந்தனர் என்பது தீப ஆராதனை முடிந்தவுடன் அவர்களுக்குப் பின்னிருந்த நான் மற்றும் எனது துணைவி உட்பட சுமார் பத்திற்கும் மேற்பட்ட பக்தர்களை அர்ச்சகர் ஒட்டு மொத்தமாக வெளியே அழைத்து பூ மற்றும் விபூதி தீபாராதனை முதலியவற்றை வேறு ஒருவரைக் கொண்டு விநியோகித்ததால் காண இயலவில்லை.

எங்களை ஒதுக்கும்போது முன் வரிசையில் முடி இறக்கிக் கொண்டு அர்ச்சனைக்காகக் காத்திருந்த ஒரு குடும்பத்தை நோக்கி இவாளை அனுப்பிவிட்டு திவ்வியமாக உங்களுக்கு அர்ச்சனை செய்கிறேன் என்றும்,

பாடியவர்கள் கொடுத்த கணிசமான தொகைக்காக முருகனை அலங்கரித்த இரு மாலைகளை (150 ரூபாய் செலவழித்து எவரோ சுவாமிக்கு அணிவிக்கத் தந்தது) எடுத்து அவர்களிடம் வழங்கி சாவகாசமாக உரையாடியதையும் கவனித்த நான்

என்னிடம் சில்லரையாக இருந்த 20 ரூபாய் நோட்டினை எனது துணைவியாரின் வேண்டுதலையும் புறக்கணித்து அந்த அர்ச்சகரின் தட்டில் இட மறுத்து என்னிடமிருந்த 5 ரூபாய் நாணயத்தினை மட்டுமே தட்டில் இட்டுவிட்டு வெளியேறினேன்.

ஆரோக்கியமானவர்கள் உழைப்பதற்கு அஞ்சிப் பிச்சையெடுப்பதை ஆதரிக்க விரும்பாததால் நான் பொதுவாகப் பிச்சையிடுவதில்லை

எனினும் முருகனுக்கு அருகிலிருந்து கொண்டு தினமும் ஆயிரக்கணக்கில் வசூலிக்கும் ஆரோக்கியமான கொழுத்த அர்ச்சகருக்கு தர மறுத்த அந்தத் தொகையை வெளியே நின்ற வயதான உழைக்க இயலாத உடல் வாகு கொண்ட இரு முதியவர்களுக்குக் கொடுத்துவிட்டேன்.

முருகன் தன்னைக் காண என்னை அங்கு வரவழைத்தாலும் கல்லாக நின்று காட்சியளிக்கும் தன் முன்பு தன்னை நாடி வரும் மக்களிடம் தட்டில் இடப்படும் பணத்தின் அளவினைக் கொண்டு காட்டப்படும் பாரபட்சத்தை பார் என என்னுள் உரைப்பது போன்று அவர் முன்பு நிற்கும்போது நான் மனதார உணர்ந்தேன்.

அனைத்து சாதியினரும் அர்ச்சகராகும் தகுதியுள்ளவர்கள் என சட்டமியற்றினாலும் இன்றும் அதிக வருமானம் தரும் ஆலயங்களில் ஆதிக்கம் செழுத்தும் அர்ச்சகர்கள் தட்டில் விழும் வருமானத்தால் கொழிப்பதால்தான் மதவாதிகளின் கைகள் தமிழகத்தில் ஓங்கத் துவங்கியுள்ளன.

காணிக்கைகளை உண்டியலில் போடுங்கள் என ஆங்காங்கே எழுதி வைத்திருந்தாலும் தட்டேந்தும் அர்ச்சகர்ககள் மற்றும் அந்த பரிகாரம் இந்த பரிகாரம் செய்விக்கிறேன் என அப்பாவி மக்களை வளைத்து ஏராளமாகக் காசு பார்க்கும் அர்ச்சகர் கூட்டங்களை அரசு நிர்வாகம் தடுப்பதில்லை.

மேலும் பணம் படைத்தவர்கள் அள்ளி வழங்கும் பணத்திற்காகவே ஆடம்பரமாக நடைபெறும் அர்ச்சனைகள் காரணமாக எளியவர்கள் ஆலயங்களில் அலட்சியப்படுத்தப்படுகின்றனர்.

தன் மக்களிடம் பேதம் பாராட்டும் அர்ச்சகர்களின் செயலை அந்த முருகன் கல்லாக நின்றுதான் எம் போன்றவர்கள் வாயிலாகக் கவலைப்படுகிறான்.

அனைத்து ஆலயங்களிலும் பணியாற்றும் அர்ச்சகர்களுக்கு அந்தந்த கோயிலின் வருமானத்திற்கும் அவர்கள் அங்கு செய்யும் வேலைக்கும் ஏற்ற ஊதியம் மட்டுமே இனி வழங்கப்படும் காலம் உருவாக வேண்டும்.

ஆரத்தித் தட்டு ஏந்தி பணம் வசூலிக்கும் முறை ஒழிக்கப்பட வேண்டும். ஆலயத்தில் அனைவரும் சரிசமமே என்ற நிலை உருவாக வேண்டும். ஏழை பணக்காரர் என்ற பாகுபாடுகள் முற்றிலும் ஆள்பவன் (ஆண்டவா என அழைத்தால் அது இறந்த காலத்தைக் குறிக்கும்) சந்திதியில் அகற்றப்பட வேண்டும்.  

இறைவன் சந்நிதிக்கு முன்பு அமைக்கப்பட்டுள்ள பணவரிசைத் தடுப்புகள் முழுமையாக அகற்றப்பட வேண்டும். தரிசிக்க வரும் மக்களை சந்நிதிக்கு முன் இருக்கும் இட வசதிக்கேற்ப பத்து அல்லது இருபது நபர்களாக இருபுறமும் நிற்கவோ அல்லது அமரவோ வைத்து ஆராதனை முடிந்தவுடன் அடுத்த வரிசை மக்களை அனுமதிக்குமாறு ஒரு ஒழுக்கமான அமைப்பு முறை உருவாக்கப்பட வேண்டும்.

எங்களின் வட மாநிலப் பயணத்தின்போது ஜெய்ப்பூர் என நினைக்கிறேன். அங்குள்ள பிர்லா மந்திரில் நிலவிய சமத்துவமும் சுத்தமும் ஆண்டுகள் இருபது கடந்தும் இன்றும் நினைவிலாடுவதற்குக் காரணம் நம் கோயில்களில் காணப்படும் அசுத்தங்களாலா என்பதை அந்த முருகன்தான் விளக்கவேண்டும்.

ஒருமுறை ஊர் திரும்ப நேரமின்மையைக் கருதி திருச்செந்தூர் முருகன் கோயிலில் எனது நண்பரின் ஏற்பாட்டின்பேரில் காசு கொடுத்து ஒரு புரோகிதரின் துணை கொண்டு குறுக்கு வழியில் சென்று முருகனைத் தரிசித்த குறுகுறுப்பு இன்றுவரை எனது மனதில் தவறாகப் படுவதை நினையும்  வேதனை மனதுடன்

பாரபட்சமற்ற ஆலயத் தரிசன முறை இனியாவது   உருவாக வேண்டுமென்பதை மட்டுமே அந்த பகுத்தறிவுத் தமிழர் தலைவன் முருகனிடம் ஒரே வேண்டுதலாக வைத்துவிட்டுத்தான் அன்றைய தினம் அவரது ஆலயத்திலிருந்து நான் இல்லம் திரும்பினேன்.

இனி சமத்துவம் தருவது அந்த வேலாயுதனின் கரங்களில்தான் உள்ளது.          

Read More...

புதன், 4 நவம்பர், 2015

மக்கள் சேவைகளையும் காசாக்கலாமே!

Leave a Comment
என் போன்று வாடகை வீட்டில் வசிப்பவர்கள் சந்தர்ப்ப சூழல், மற்றும் வீட்டு வாடவை உயர்வு காரணங்களுக்காக குறைந்தது மூன்று ஆண்டுகளுக்கு ஒரு முறையேனும் இடம் மாறும் நிலை ஏற்படுகிறது.

இதன் காரணமாக குடிமைப் பொருள்கள் வழங்கு அட்டை, மற்றும் தேர்தல் அடையாள அட்டையில் அடிக்கடி நாங்கள் இட மாறுதல் செய்ய வேண்டி விண்ணப்பிக்க வேண்டிய நிலை உருவாகிறது. 

இதில் குடிமைப் பொருள் அட்டை மாறுதலுக்கு கையூட்டு இன்றி இடம் மாறுதலைப் பதிவு செய்தல் இயலாததென்பது நாடே அறிந்த ஒன்று.

தேர்தல் கமிசன் வாக்காளர் பெயர்களில் புதிய வாக்காளர்களைச் சேர்த்தல், நீக்குதல், இட மாறுதல்களைப் பதிவு செய்தல் போன்ற வேலைகளை அவ்வப்போது செய்து வந்தாலும், இவை முறையாகச் செயல்படுத்தப்படுவதில்லை என்பதுதாம் கண்கூடான உண்மை. 

ஏனென்றால் இது போன்ற முகாம்களில் அரசியல் இயங்கங்களின் பிரதிநிதிகள்தாம் ஆதிக்கம் செழுத்துகின்றனர்.அதிலும் குறிப்பாக ஆளும் இயக்கம் சார்ந்தவர்களின் ஆதிக்கம்தாம் அதிக அளவில் உள்ளது.

என் போன்று வேலைக்குச் செல்பவர்கள் விடுமுறை நாளான ஞாயிற்றுக்கிழமை அன்றுதான் இது போன்ற முகாமிற்கு சென்று அங்கு விநியோகிக்கப்படும் படிவங்களைப் பூர்த்தி செய்து கொடுக்க இயலும்.

ஞாயிற்றுக் கிழமைகளில் இந்த முகாம்களுக்கு எம் போன்றவர்கள் அதிக அளவு வருவதால் அதிக வரிசையுடன் காட்சியளிக்கும். எனினும் ஒரு முறை காத்திருந்து அங்கு விநியோகிக்கப்பட்ட படிவத்தில் எனது அப்போதய இடம் மாறுதல் விபரங்களைப் பதிவு செய்துவிட்டுத்தான் வந்தேன்.

ஆயினும் கடந்த நாடளுமன்றத் தேர்தலில் வாக்களிக்கச் சென்ற நான் வாக்காளர் பட்டியலில் எனது பெயர் பழைய இடத்திலிருந்து நீக்கப்பட்டும் புதிய இடத்தில் சேர்க்கப்படாமலும் இருப்பது கண்டு அதிர்ந்தேன்.

எனது பதிவிற்குப் பிறகு போதிய கால அவகாசமிருந்தும் பழைய இடத்திலிருந்து எனது பெயர் நீக்கப்பட்டிருந்தது. ஆயின் புதிய இடத்தில் எனது பெயர் வாக்காளர் பட்டியலில் இடம் பெறவில்லை. 

என்னை இறந்தவர்கள் பட்டியலில் சேர்த்து விட்டனர் என்று வேடிக்கையாக அங்கு வாக்களிக்க காத்திருந்தவர்களிடம் கூறிவிட்டு வாக்காளர் அடையாள அட்டை வைத்திருந்தும் வாக்களிக்க இயலாமல் வேதனையுடன் வெளியேறினேன்.

இது ஒன்றும் கதையல்ல உண்மை நிகழ்வுதான். சாட்சியத்திற்கு எனது விலாச மாறுதல் விண்ணப்பத்தினை பதிவு முகாமிலிருந்தவர்க்ள பெற்றுக கொண்டதற்கான அத்தாட்சிக் கடிதம் இன்றும் என்னிடம் பயனற்றுப்போன நிலையிலும் பத்திரமாகத்தான் உள்ளது.

தேர்தல் கமிசனின் இத்தகைய அலட்சியப் போக்கை உண்மையாக அனுபவித்த காரணத்தால் இந்த ஆண்டு நடை பெற்ற முகாமில் மீண்டும் வேறு இடம் மாறியுள்ள நிலையில் நான் எனது விலாச மாற்றத்தை பதிவு செய்யச் செல்ல விரும்பவில்லை. 

இன்றுள்ள அரசியல் இயக்கங்களின் மீது எனக்கு நம்பிக்கை போய்விட்டதால் என்னுடைய ஒரு வாக்கும் நிச்சயமாக நேட்டோவில்தான் பதிவாகும். அந்த வாய்ப்பும் எனக்கு வரும் தேர்தலில் நிச்சயம் கிடைக்கப்போவதிலலை.

வாக்களிக்க விரும்பும் மக்கள் தங்களின் இடமாற்றம், புதிதாகச் சேர்த்தல் போன்றவற்றிற்காக இது போன்ற முகாம்களுக்குச் செல்ல தங்கள் நேரத்துடன் அங்கு செல்வதற்காக வாகனங்கள் முதலானவற்றைச் பயன்படுத்திப் பணத்தையும் செலவிடுகின்றனர்.

எனினும் அவர்களில் அனைவருடைய விண்ணப்பங்களும் நிச்சயம் பரிசீலிக்கப்படுகிறதா என்பதை எவரும் கண்காணிப்பதில்லை. தேர்தல் ஆணையம் இணையம் வாயிலாகக் கண்காணிக்க இயலும் என அறிவித்தாலும் பாமர மக்கள் தங்களின் படிப்பின்மை காரணமாக இணையத்தை நாட இயலாது. 

எனவே தேர்தல் நாளன்றுதான் தாங்கள் ஏமாற்றப்பட்டுள்ளோம் என்பதை எம் போன்று பாதிக்கப்பட்டவர்கள் தேர்தல் ஆணைய நடைமுறைகளைச் சாடும் நிலையினை அடிக்கடி காண முடிகிறது.

இதற்கெல்லாம் முத்தாய்ப்பாக எம் போன்று ஒரு முறை பதிவு செய்து அடையாள அட்டை வைத்துள்ளவர்கள் ஒரு சாதாரண கடிதம் வாயிலாகவோ அல்லது இணையத்தில் அந்தந்த மொழியில் எளிமையாகப் பூர்த்தி செய்து விலாச மாறுதலை தேர்தல் ஆணைத்திற்குத் தெரிவித்துப் பதிவு செய்யும் வழி ஏற்படுத்தலாம்.

இத்தகைய விண்ணப்பங்கள் கிடைத்தவுடன் தேர்தல் கமிசனின் அதிகாரம் பெற்ற நபர் நேரில் வந்து ஆய்வு செய்துவிட்டு அதற்குரிய கட்டணத்தை கேட்டால்கூட உபயோகமற்ற முகாம்களுக்குச் சென்று அலைவதை விட இதுவே மேல் என எம் போன்றவர்கள் கட்டிவிடுவோம்.

தேர்தல் கமிசனும் தான் செய்த சேவைக்கு உரிய கட்டணத்தைப் பெற்றுக் கொண்டது போலாகிவிடும். 

இது நடைமுறைச் சாத்தியமா என்பது ஒரு புறமிருக்க இப்படிச் செய்வதிலும் ஒரு நேர்மையை நாம் இன்றைய அரசியல் அமைப்பு ஆணையங்களிடம் எதிர் பார்ப்பது ஏதேனும் ஒரு வழியிலாவது மத்திய மாநில அரசுகளுக்கு விற்பனை வரி சேவை வரி எனப் பல்வேறு வரிகளைக் கட்டும் எம் போன்ற பாமரர்களின் உரிமை என்பதை இங்கு நிச்சயம் பதிவு செய்துதான் ஆக வேண்டும்.

Read More...

திங்கள், 26 அக்டோபர், 2015

தமிழகத்தில் வரும் சட்டமன்றத் தேர்தலில் தோற்கப்போவது யார்?

Leave a Comment
தமிழகத்தில் வரும் 2016 ஆம் ஆண்டுக்கான தேர்தல் உத்திகளை அனைத்து அரசியல் இயக்கங்களும் துவக்கி விட்டன. 

தமிழகத்தில் 1 முதல் பத்து வரை வாக்கு சதவிகிதம் உள்ளதாகக் கருதக்கூடிய (இந்த சதவிகிதம்கூட அவை தமிழகத்தின் ஏதேனும் பிரதானமான திராவிட இயக்கத்தின் தோள் மீது அமர்ந்து அவர்களுடைய வாக்கு வங்கியையும் சேர்த்துத்தான் என்பது பாமரனுக்குக்கூட மிக நன்றாகத் தெரிந்த கதை)

உதிரி இயக்கங்கள் இப்பொழுதே தாங்கள்தான் அடுத்து தனித்துப் போட்டியிட்டு ஆட்சியைப் பிடிப்போம் என அறிக்கைகள் விட்டுக் கொண்டிருக்கின்றன.

ஆளும் இயக்கம் சரமாரியான இலவசத் திட்டங்களையும் இறுதி நேரத்து அறிவிப்புகள் வாயிலாக புதிய திட்டங்களையும் அறிவித்துக் கொண்டிருக்கின்றது. இந்தத் திட்டங்களுக்கான தொகை உண்மையிலேயே அரசின் கருவூலத்தில் உள்ளதா என்பதை யாமறியோம்.

பிரதான எதிரி  திராவிட இயக்கமோ தங்களின் பழைய தவறுகளை மக்கள் மறந்துவிட்டதாகக் கருதிக் கொண்டு மீண்டும் ஆட்சியைப் பிடிக்க பல்வேறு வியூகங்களை உட்கட்சிப் பூசல்களுக்கிடையே வகுத்து வருகிறது. 

நிதிக் குடும்பமாகத் திகழும் இந்த இயக்கத்தின்  தேர்தல் நிதி வசூல் பல கோடிகளில் உள்ளதாக ஊடகச் செய்திகள் தெரிவிக்கின்றன.

தனித்துக் களம் இறங்குவதாக அறிவித்துள்ள சில்லறை இயக்கங்கள் தேர்தல் நெருங்கும் வேளையில் நிச்சயம் ஏதேனும் ஒரு திராவிட இயக்கத்தின் தோள் மீது ஏறுவது திண்ணம். 

தேர்தல் அறிக்கைகளில் இலவசத் திட்டங்களை அறிவிக்கும் இயக்கங்களின் போக்கினை தேர்தல் ஆணையம் கட்.டுப்படுத்தாத காரணத்தால் இருக்கின்ற அனைத்து இயக்கங்களும் ஏராளமான இலவசத் திட்டங்களை அறிவித்து ஓட்டு வங்கியை வளைக்க வரிந்து கட்டிக் கொண்டிருக்கின்றன.

தேர்தல் திருவிழா துவங்கியதும் ஏராளமான ஆடம்பரச் சொகுசு வாகனங்களின் அணி வரிசைகள் சூழ  அரசியல் தலைவர்கள் பவனி வந்து வாக்குச் சேகரிக்கத் துவங்குவர். தங்களின் பயணத்திற்கு இவர்கள் செய்யும் இடையூறுகளை மக்கள் சகித்துக் கொள்ளப்போவது கண்கூடாக இப்பொழுதே தெரிகிறது.

சமீபத்தில் சேலம் மாவட்டம் தாரமங்கலம் வழியாக ஓமலூர் செல்லும் பேருந்தில் அருகில் பயணித்த ஒரு முதியவர் உரையாடியது இன்றும் காதுகளில் ஒலிக்கிறது. 

உரையாடலின் சாரம் இதுதாம். 

பெருந்தலைவர் முதல்வராக இருந்தபோதுதான் திராவிட இயக்கம் தலையெடுத்தது. முதல் நாள் சேலத்தில் அமைக்கப்பட்ட எளிமையான மேடையில் அண்ணா அவர்கள் காங்கிரசு ஆட்சியை நாகரீகமாகக் குறை கூறிப் பேசினார்.

அடுத்த நாள் அதே மேடையில் பெருந்தலைவர் அவருக்கே உரிய பாணியில் அண்ணா அவர்களின் கேள்விகளுக்கு உரிய பதிலை நாகரீகமான வார்த்தைகளில் பதிலுரைத்தார். 

முதல் நாள் போட்டு அடுத்த நாளும் அதே எளிமையான மேடையைக்கூட அந்நாளில் பங்கிட்டுக் கொண்ட இயக்கங்களை நான் கண்டிருக்கிறேன். 

அதே போல பெருந்தலைவர் ஒரு முறை காரில் சேலம் வந்தார். அவருடைய வாகனத்திற்கு முன்பு ஒரே ஒரு காவல் வாகனம் மட்டுமே வந்தது. 

தேநீர்க்கடையில் தேனீர் அருந்திக் கொண்டிருந்தவர்கள் அதோ காமராசர் செல்கிறார் என்றபோதுதாம் ஒரு முதல்வரின் வாகனம் அந்த வழியாகச் செல்வதையே என்னால் காண முடிந்தது. 

அவ்வளவு எளிமை. எந்தக் காலத்திலும் அத்தகைய எளிமையை இனி வரும் தலைமுறை இப்போதுள்ள அரசியல்வாதிகளிடம் காணவே இயலாது என்று அந்த முதியவர் வேதனையுற்றார்.

தந்தை பெரியார் அவர்கள் அரசியலுக்கு வந்து சொத்து சேர்த்தவர்கள் தாங்கள் இந்த சமுதாயத்திற்காகக் கடுமையாகப் பாடுபட்டேன் எனச் சொன்னாலும் ஏற்றுக் கொள்ள முடியாது என ஆணித்தரமாக பேசியும் எழுதியும் பதிவு செய்துள்ளார்.

இன்று அவரால் வளர்ந்தவர்கள் ஆடம்பரமான மேடைகள் அமைத்து பிரம்மாண்டமான கார் அணிவரிசைகள் பின்தொடரப் பயணித்து தேர்தல் வாக்கு கேட்கப் போகின்றனர்.

அதற்கு முன்னோட்டமாக மக்களைச் சந்திக்கிறேன் என்று ஒவ்வொரு இயக்கத் தலைவரும் தொகுதி வலம் வரத் துவங்கிவிட்டனர்.

இதற்கு இவர்கள் மக்களை எளிமையாகச் சந்திப்பதாக கையாளும் உத்திதான் இப்பொழுது பரவலாக நாடு முழுவதும் காணப்படுகிறது.

மகளிர் சுய உதவிக்குழு, மாணவர் அணி, விவசாய அணி என இரகம் வாரியாக இவர்கள் பட்டியலிட்டுச் சந்திப்பது அவரவர் இயக்கம் சார்ந்த அணிகள்தாம் என்பது பாவம் பாமர மக்களுக்கு வேண்டுமானால் புரியாமல் போகலாம். 
படித்தவர்கள் மத்தியில் இது எடுபடாதென்பது உள்ளங்கை நெல்லிக்கனி! 

இந்தத் தேர்தல் முன்னோட்ட உலாவிலும் ஏராளமான ஆடம்பர சொகுசு வாகனங்களின் அணிவகுப்பு நிச்சயம் தென்படுகிறது.

மக்கள் இவர்களின் ஆடம்பர அணிவகுப்பிற்கும் இந்த உலாக்களுக்கும் செலவிடும் தொகை இவர்கள் உண்மையாக வியர்வை சிந்தி உழைத்த பணத்தில் செலவிடப்படுவதா என்பதை எண்ணிப் பார்க்க வேண்டும்.

மோசமான சாலைகள், அதிகக் கட்டணத்தில் பயணிக்கும் புளி மூட்டைப் பேருந்துப்பயணம், ஊழல் நிறைந்த மக்கள் நலத் திட்டங்கள், கட்டுப்படுத்த இயலாத விலைவாசி உயர்வு, அரசியல் மற்றும் களவுக்கென நடத்தப்படும் கொலைகள் என நாள்தோறும் நாட்டில் நடக்கும் ஏராளமான சமூகச் சீரழிவுகளை மறந்துவிட்டு 

இலவசங்களுக்கும், தேர்தல் நாளுக்கு முதல் நாள் அரசியல் இயக்கங்கள் வழங்கும் பணத்திற்காக வரும் சட்டமன்றத் தேர்தலிலும் ஆசைப்பட்டு மக்கள் வாக்களித்தால் 

தமிழகத்தில் ஏதேனும் ஒரு வலிமையான ஊழல் இயக்கம் நிச்சயம் ஆட்சி பீடம் ஏறும், மற்ற இயக்கங்கள் தோல்வியைத் தழுவியதாக ஊடகங்கள் செய்திகளை வெளியிட்டாலும்

தோற்கப்போவதும் தோற்றுவிட்டு அடுத்த ஐந்தாண்டுகளுக்கு ஊழல் அரசியல்வாதிகளின் போக்கினைச் சகித்துக் கொண்டு வாழப் பழகிக் கொள்ளப்போவது 

நிச்சயமாக நம் தமிழக ஏமாளி வாக்காளர்கள்தாம் என்பதை இப்போதைக்கு எம்மால் வேதனையாகத்தாம் இங்கு பதிவு செய்ய இயலும்.

Read More...

திங்கள், 5 அக்டோபர், 2015

வள்ளலார் அவர்களின் பிறந்த தினம் இன்று.

Leave a Comment
வாடிய பயிரைக் கண்டபோதெல்லாம் வாடினேன் என மனம் கசிந்துருகி கொல்லாமையை வலியுறுத்தி உயிர்களையும் பயிர்களையும் நேசிக்கக் கற்றுத்தந்து சாதி பேதம் மறுத்து சமரச சன்மார்க்க சங்கம் அமைத்து பிரபஞ்சத்தில் நிலை பெற்று வாழும் தவச்சித்தர் வள்ளலார் அவர்களின் பிறந்த தினம் இன்று.

பக்தி மார்க்கத்தில் இருந்தபோது வள்ளலாரைப் புரிந்து கொள்ள இயலாது போனாலும் 

சித்த மார்க்கத்தில் அறிவு தெளிந்து அசைவ உணவு தவிர்த்து ஓரளவேனும் அவர் வழியில் வாழ முற்பட்டாலும் 

நம் தமிழக மக்கள் அனைவரும் வள்ளலார் அவர்களின் கருணை குணம் நினைந்து வாழ வேண்டும் என விரும்பி 

வள்ளலார் வகுத்த சமரச சன்மார்க்க தத்துவம் உலகெங்கும் தழைக்க வேண்டும் என்ற விருப்பங்களுடன் அவர்தம்  நினைவினை ஐந்தாம் தமிழ்ச்சங்கத்தின் சார்பாகப் போற்றுகிறோம்.

Read More...

வெள்ளி, 2 அக்டோபர், 2015

வாய்மையே வெல்லும்!

Leave a Comment
வாய்மையே வெல்லும்! இது தேசத் தந்தை நம் மக்களுக்கு விட்டுச் சென்ற முழக்கம்!

இதுவே நம் பாரத இலட்சினையில் சத்யமேவ ஜெயதே எனவும் தமிழகத்தின் இலட்சினையில் வாய்மையே வெல்லும் எனவும் பொறிக்கப்பட்டுள்ள வாசகங்களாகும்.

இவை வெறும் வாசகங்கள் மட்டுமல்ல. இந்த வாசகங்கள் எழுதப்பட்டுள்ள வாகனங்கள் சுமந்து செல்லும் அரசு அலுவலர்கள்

தங்களின் நெஞ்சில் இந்த வாசகங்களைச் சுமந்தால்

இந்த நாட்டில் வாய்மை தழைக்கும்! ஊழல் ஒழியும்!

தீமைகளின் இருள் தொலைந்து நன்மைகளின் விடியல் தோன்றும்!

விடியலைக் காண இருளில் தவிக்கும் மக்களில் ஒருவனாக

அகிம்சை ஆயுதம் கொண்டு கத்தியின்றி இரத்தமின்றிச் சுதந்திரம் வாங்கித் தந்த

அண்ணல் மகாத்மாவிற்கு  எமது கோடி கோடி வணக்கங்கள்!

Read More...

குழந்தையும் தெய்வமும் குணத்தால் ஒன்று

Leave a Comment
நாங்கள் தற்பொழுது புதிதாகக் குடியிருக்கும் இல்லம் வீட்டு உரிமையாளர் இல்லத்துடன் முதல் தளத்தில் உள்ளது. இங்கு நாங்கள் குடியேறிய முதல் நாள் துவங்கியே வீட்டு உரிமையாளரின் ஒன்றரை வயதுச் சிறுமி எங்களைச் சொந்தம் கொண்டாடத் துவங்கிவிட்டாள். 

குறிப்பாக அவள் (ப்ரனிதா அவளது பெயர்) அப்புச்சி என முகம் நிறைந்த மகிழ்வுடன்தான் என்னைக் காணும்போதெல்லாம் அழைப்பாள். 

காலை எழுந்தது முதல் இரவு பத்து மணி வரை அவளின் பொழுது போக்கிடம் எங்கள் இல்லம்தாம். 

மழலைகளுக்கே உரிய குறும்புகள் ஏராளம் அவளுக்கும் உண்டு. அதன் பொருட்டு அவள் செய்யும் குறும்புகள் எல்லை மீறும் போது எனது மகள் கோபப்படுவது போல சற்று மிரட்டுவார். 

உடனே அவள் முகம் வாட்டமடைந்து எங்கள் இல்லத்திலிருந்து அவளது வீட்டிற்குச் சென்று அவளது தாய் தந்தையர் மற்றும் பாட்டியிடம் மழலையில் முறையிடுவாள். 

அவள் என்ன சொல்கிறாள் என்பது புரியாவிட்டாலும் அவளை அவர்கள் சமாதானப்படுத்துவர். கோபித்துச் சென்ற ஒரு நிமிடத்தில் மீண்டும் அவள் எங்கள் இல்லத்துக் கதவோரம் அத்தா என (என் மகளை அவள் அவ்வாறுதான் அழைப்பாள்) முகம் நிறைந்த சிரிப்புடன் எட்டிப் பார்த்து பின்னர் என் மகளிடம் வந்து ஒட்டிக் கொள்வாள். 

இந்த நிகழ்வுகள் தினசரி எங்கள் இல்லத்தில் நடைபெறும். என் மகள் போலியாகக் கோபப்படுவதை அறியாமல் அச்சிறுமி கோபித்துக் கொண்டு சென்றாலும் அடுத்த நிமிடமே அதனை மறந்துவிடுவதை அடிக்கடி காணும்போதெல்லாம் என் மனதில் ஓடுவது கீழ்க்கண்ட பாடல் வரிகள்தாம். 

குழந்தையும் தெய்வமும் குணத்தால் ஒன்று
குற்றங்களை மறந்து விடும் மனத்தால் ஒன்று

நடந்ததையே நினைப்பதுதான் துயரம் என்று 
ஞானிகளும் மேதைகளும் சொன்னார் அன்று

உச்சி வேளைச் சூரியனை மேகம் மூடுது
நம் உள்ளமெனும் சூரியனைக் கோபம் மூடுது

காற்று வந்தால் மேகம் அங்கு விலகி ஓடுது
பேசிக் கலந்துவிட்டால் கோபம் மாறி நேசமாகுது

பிள்ளைகளாய் இருந்தவர்தாம் பெரியவரானோம்
அந்தப் பெரியவர்தாம் கோபத்தினால் சிறியவரானோம்

எவ்வளவு உன்னதமான வைர வரிகளைக் கவிஞர் கையாண்டிருக்கிறார் பாருங்கள்.   

குழந்தைகளுக்கு ஏற்படும் கோபத்தினை அவர்கள் அந்த நிமிடமே தங்களின் மனதிலிருந்து அழித்துவிட்டு எதுவும் நிகழாதது போல மீண்டும் தங்களை உற்சாகப்படுத்திக் கொள்கின்றனர். 

ஆனால் வளர்ந்து ஆண்டுகள் கடந்த நாம்தாம் எதையும் மறந்து தொலையாமல் நினைந்து வதைகிறோம்.

இந்தப் பாடலில் தொடரும் வரிகளை ஒருவர் அது ஆணோ அல்லது பெண்ணோ எவராக இருந்தாலும் பின்பற்றி வாழத் துவங்கி விட்டால் இந்தப் பூவுலகில் அன்பும் சமாதானமும் மட்டுமே தழைத்தோங்கும் என்பதில் எவருக்கும் எவ்விதச் சந்தேகமும் கிடையாது.  

எனினும் போக்குவரத்தில் நாம் செல்லும்போது ஒருவர் தவறாக நம் வாகனத்தில் இடித்துவிட்டால் நீயா நானாவெனச் சண்டையிடுதல். 

இந்தச் சண்டையினை அப்பொழுதே மறந்து தொலையாமல் வீட்டுக்கும் கொண்டு சென்று அகப்படுபவரிடம் வெளிப்படுத்துவது. 

பேருந்தில் சில்லறைக்காகவே நிகழ்ந்த ஒரு சாலை மறியல் போராட்டம், வாக்கு வாதங்கள் அடிதடிகள்,  

அலுவலகத்தில் சக ஊழியர்களிடம் நிகழும் சின்னச் சின்ன பிரச்சினைகளைப் பெரிதாக்கிக் கொண்டு ஒருவரை ஒருவர் பகைத்துப் பணியாற்றுவது. 

இல்லத்தில் ஒரு சிறிய நிகழ்விற்காகச் சண்டையிட்டுக் கொண்டு நாள் கணக்கில் வாரக் கணக்கில், வருடக்கணக்கில் சிலர் வாழ்நாள் முழுவதும் உறவினை வெறுத்து வாழ்வது. 

கணவன் மனைவி, அண்ணன் தம்பி, அக்கா தங்கை, அண்ணன் தங்கை, தந்தை மகன், தந்தை மகள்  எனப் பல்வேறு உறவுகளிடமும் நண்பர்களுக்குக்குள்ளும் சிறிய நிகழ்வுகள் பெரிதாகி உறவு விட்டுப் போவது 

எழுத ஏராளம் இருந்தாலும் சின்னச் சின்ன உதாரணங்கள்தாம் இவை!

இவையெல்லாம் விட்டுக் கொடுப்பவர் கெட்டுப்போவதில்லை!
கெட்டுப் போபவர் விட்டுக் கொடுப்பதில்லை  

என்ற பழமொழிக்கேற்ற உண்மைகள்!

நம்முள் பெரும்பாலானவர்கள் நமது வாழ்வு துவங்கும் காலை முதல் இரவு வரை சந்திக்கும் ஒவ்வொரு நிகழ்வுகளுக்கும் விட்டுக் கொடுக்கவும் சகித்து வாழவும் பழகிவிட்டால் வாழ்க்கையே இன்பமயம்தாம்.  

இந்தப் பாடல் வரிகளில் வருவதைப் போலவே நானும் வாழ்ந்து வந்துள்ளேன் என்பதை நினையும்போது வெட்கமும் வேதனையும்தாம் மனம் முழுக்க வந்து தொலைகிறது.

வாழ்க்கை நமக்கு வைக்கும் சத்திய சோதனைகள்தாம் இவை என்று தெளிந்து பாடல் வரிகளுக்கேற்ப குற்றங்களை மறந்து பிள்ளைகளாக நாம் வாழத் துவங்கிவிட்டால் நாம் ஒன்றும் தெய்வங்கள் அளவிற்கு உயரப் போவதில்லை! குறைந்தது நல்ல மனிதர்களாகவாவது வாழ முயற்சிப்போமே.   

Read More...

புதன், 5 ஆகஸ்ட், 2015

தமிழகத்தில் மது ஆலைகளையும் மதுக்கடைகளையும் மூட வேண்டிய அவசியமே இல்லை!!!

Leave a Comment
தமிழகத்தில் முழுமையான மதுவிலக்கினை அமல்படுத்த அரசினை வலியுறுத்திப் போராடி வந்த திரு சசிபெருமாள் அவர்கள், உணர்ச்சி வசப்பட்ட நிலையில் செல்பேசி மின் கோபுரததில் ஏறிப் போராடத் துவங்கியிருக்கிறார்.

அவரது கோரிக்கையை அரசு அலுவலர்கள் உடனடியாகச் செவி சாய்க்காமல் காலம் தாழ்த்திய பின்னர் அவர் வலுக்கட்டாயமாகக் கீழே இறக்கப்படும் நிலை உருவாகி 

அதன் காரணமாக அவர் உடல்நிலை மோசமடைந்து மரணமேற்படக் காரணமானதென ஊடகங்கள் வாயிலாக அறிய நேரிட்டது கண்டு ஐந்தாம் தமிழ்ச் சங்கத்தின் சார்பாக எமது ஆழ்ந்த வருத்தங்களைப் பதிவு செய்கிறோம்.

காந்தியவாதியாகத் தம் வாழ்க்கை முறையினை அமைத்துக் கொண்ட திரு சசிபெருமாள் அவர்கள் இது போன்ற மாற்று வழிப் போராட்டத்தைத் தேர்ந்தெடுத்ததுதாம் அவரது மரணத்திற்கென எழுதப்பட்ட விதியோ என்னவோ 

சட்டவிதிகள் இது போன்ற போராட்டங்களைத் தற்கொலை முயற்சியாகத்தாம் பதிவு செய்யும் என்பதை ஏனோ அவர் மனதில் கொள்ளத் தவறித் தன் இன்னுயிரையும் ஈந்து விட்டார்.

காந்தியவாதிகளுக்கு அடக்குமுறையாளர்களால் ஏற்படும் கதியினை நாம் சுதந்திரத்திற்கு முன்னரே வெள்ளையர் ஏகாதிபத்தியத்தில் ஏராளம் கண்டுள்ளோம். 

மக்களின் நலனுக்காகப் போராடிய ஒருவரை தமிழ்நாடு இழந்துள்ள நிலையில் ஏராளமான காந்தியவாதிகள் இனி இந்த நாட்டில் தோன்றத்தான் போகின்றனர்.

சசி பெருமாள் அவர்களின் மரணத்தைத் தங்களின் அரசியல் விளையாட்டுக்குப் பயன்படுத்திக் கொள்ளும் தமிழகத்தின் கேவலமான அரசியலுக்குச் சான்றாக இன்று மதுவிலக்கிற்கு எதிராகப் போராடும் அனைத்து மத்திய மாநில இயக்கங்களும் 

தமிழகத்தில் மதுவிலக்கை இரத்து செய்து மக்களின் இரத்தத்தை உறிஞ்சிக் கொண்டிருக்கும் இரு பெரும் திராவிட இயக்கங்களின் தயவால்தான் இன்றுவரை ந்டந்துள்ள தேர்தல் களங்களை வானர சேனைப் பச்சோந்திகளாக நிமிடத்திற்கு நிமிடம் அணி மாறிச் சந்தித்துத் தங்கள் தொகுதிப் பிரதிநிதித்துவப் பங்கினை அடைந்து வந்துள்ளன என்பது உலகறிநத உண்மை.

அப்பொழுதெல்லாம் தமிழதத்தில் பட்டி தொட்டியெங்கும் காட்சியளித்த மதுக்கடைகள் இவர்களின் கண்களில் மட்டும் ஏன் படவே இல்லை என்பது பாமர மக்களில் ஒருவனாக எனக்குக்கூட இன்றும் விளங்கவில்லை.

வாக்கு வங்கியை வளைப்பதற்காக இவர்கள் போடுகின்ற மதுவிலக்கு நாடகங்கள் வரும் தேர்தலுக்குள் இவர்கள் அமைக்கப்போகும் வியூகத்தில் இதே இரு பெரும் திராவிட இயக்கங்களில் ஏதேனும் ஒன்றில்; தொகுதிப் பிரதிநிதித்துவத்திற்காகக் காற்றில் பறக்கவிடவும் நேரலாம். இதனை எதிர்காலம்தான் தோலுரித்துக் காட்டும்.

மதுக்கடைகளின் வருமானம் தற்பொழுது முப்பதாயிரம் கோடிகள் எனப் புள்ளி விபரங்கள் தெரிவிக்கின்றன.  அரசின் மொத்த வருவாயில் கிட்டத்தட்ட முப்பது சதவீதத்தை வருமானமாகத் தரும் மதுக்கடைகளை அறவே மூடுவதென்பது இயலாத காரணமெனப் படித்தவர்களே உரத்த குரலில் ஒலிக்கின்றனர்.

தமிழகத்தில் ஏழு கோடி மக்களைக் கொண்ட சுமார் 1.5 கோடி குடும்பங்கள் உள்ளன. ஒவ்வொரு குடும்பத்திலும் ஒருவராவது மது அரக்கனின் பிடியில் ஆட்பட்ட காரணத்தால் நிம்மதியிழந்து தவிக்கும் குடும்பங்கள் ஏராளம்.

படித்தவர்கள் ஆட்சி செய்யும் அரசியல்வாதிகளைக் கொண்ட நிர்வாகமோ பாமரர்களை வளைக்க மதுவினை ஒரு தூண்டில் புழுவாகவே பாவித்து ஓட்டு வங்கியை வாரிக் குவிக்கின்றனர். 

எது எப்படியோ தமிழகத்தில் முழுமையான மதுவிலக்கினைக் கொண்டுவந்தால் ஒரு நயா பைசாகூட அரசிற்கு இழப்பேதும் ஏற்படப் போவதில்லை என்பதை என் அறிவிற்கு எட்டியவரை இங்கு பகிர்ந்துள்ளேன்.

தமிழகத்திலுள்ள அனைத்து மது ஆலைகளையும் அரவே மூடத் தேவையில்லை! அவை வழக்கம் போல இயங்கலாம்! ஆனால் அவை  இனி மது வகைகளுக்குப் பதிலாக எரி சாராயம் மட்டும் வாகனங்களை இயக்குவதற்குத் தகுந்தவாறு மாற்றம் செய்யப்பட்ட எரிபொருளாகத் தயாரிக்கப்படும் உற்பத்தி ஆலைகளாக மாற்றம் செய்ய வேண்டும். 

இங்கு தயாரிக்கப்படும் எரி சாராயம் எரிபொருள் விற்பனை நிலையங்களைச் சென்றடைந்து வாகனங்களை இயக்குவதற்கு விற்பனை செய்யலாம். 

இதனால் மத்திய அரசிற்கு ஏராளமான அளவிற்கு அன்னியச் செலாவணி பெட்ரோலியம் பொருட்களை தமிழக அளவில் இறக்குமதி செய்யப்படுவது குறைவதன் வாயிலாக மிச்சப்படுத்த முடியும்.

அதே போன்று தமிழத்திலுள்ள அனைத்து மதுபான விற்பனை நிலையங்களையும் மூடத் தேவையில்லை! அவையும் வழக்கம் போலத் தொடரலாம்! 

இனி இங்கு மது விற்பனைக்குப் பதிலாக உயர்தர பழரச பானங்கள் விற்பனை நிலையமாகத்தான் இவை செயல்பட வேண்டும். 

இதனால் இங்கு பணி புரியும் ஊழியர்களுக்கு எக்காரணம் கொண்டும் பணி இழப்பு ஏற்படும் நிலையும் உருவாகாது.

தமிழகத்தில் மதுக்கடைகளுக்கு மாற்றாக கள்ளுக் கடைகளைத் திறக்க வேண்டும் எனச் சில விவசாயச் சங்க அமைப்புகளும் ஒரு மத்திய அரசியல் இயக்கமும் வலுவாகப் போராடி வருகின்றன. 

மேல்தட்டு மக்கள் அங்கம் வகிக்கும் இது போன்ற இயக்கங்கள் அடித்தட்டு மக்கள் பெற்ற படிப்பறிவு காரணமாக அவர்தம் குடும்ப இளைஞர்கள் தரமான வேலை வாய்ப்புகளை நாடிச் செல்வதால் தங்களின் ஆண்டாண்டு கால அடிமை முறை வேலையாட்களை இழந்ததின் விளைவாக எழுப்பும் கூக்குரல் இதுவென்றே எம்மால் உணர முடிகிறது.

சுமை தூக்கும் தொழிலாளியின் மக்கள்கூட இன்று படித்துப் பட்டதாரியாக பல்வேறு தரப்பட்ட வேலை வாய்ப்புகளைப் பெற்று வருகின்றனர். இந்த நிலை இன்னும் வேகமாகத் தொடர வேண்டும். வேலைக்கு ஆட்கள் குறைந்தால் இன்றுள்ள காலகட்டத்தில் இயந்திரங்களின் துணை கொண்டு ஈடு செய்ய முடியும். 

இதற்கு மாறாக கள்ளுக்கடைகளைத் திறந்தால் மீண்டும் ஒரு படிப்பறிவற்ற சமுதாயம் உருவாகும். அதன் பின்னர் அவர்தம் சந்ததியினர் காலம் முழுக்க விவசாயக்கூலி அடிமைகளாகத்தான் இந்த நாட்டில் தொடர முடியும். இதன் காரணமாக பண்ணையார் அடிமை முறை காலம் காலமாகத் தொடரும் நிலை ஏற்பட்டு நாடு ஒரு மோசமான சுயநலக்கூட்டங்களின் அடிமையாகவே மாறிட நேரிடும்.

தமிழ்ச்சமுதாயம் ஒரு உயர் நாகரீகச் சமுதாயமாகத் திகழ்ந்த சங்க கால முறைதான் இன்றைய தேவையே தவிர ஆண்டான் அடிமைச் சமுதாயம் நிறைந்த மோசமான நாகரீகமற்ற பின்னோக்கிய சமுதாயம் இந்ந விஞ்ஞான காலத்திற்கு மட்டுமல்ல என்றைக்குமே அவசியமில்லை.

எனவே கள் எனும் மது உடலுக்குத் தீங்கற்றதென அறியப்பட்டாலும் அது அடித்தட்டு மக்களை வாக்கு வங்கிக்கென வளைக்கும் மற்றுமொரு தூண்டில் புழுவாகவே நாம் கருதுகிறோம்.

எனினும் நாட்டிலுள்ள பயன்பாடின்றி வீணாகும் ஏராளமான பனை மரங்களிலிருந்தும், தென்னை மரங்களிலிருந்தும் நவீன மரம் ஏறும் கருவிகள் துணை கொண்டு மரம் ஏறி கள்ளிற்குப் பதிலாக உடல் நலத்திற்கு உகந்த பதநீர் தயாரிக்கலாம். 

குறிப்பாக சரியான இடைவெளி விட்டுச் சுழற்சி முறையில் பதநீர் இறக்குவதால் தென்னை மரங்களின் தற்போதைய தேங்காய் மற்றும் இளநீரின் மகசூலும் இரண்டு மடங்காக அதிகரிக்கும் என்பதும் ஒரு முக்கியமான செய்தியாகும்.

இப்பொழுது நடைமுறையில் உள்ள பால் கொள்முதல் நிலையங்கள் போன்று பதநீர் கொள்முதல் நிலையங்களை அமைத்து அங்கிருந்து பெறப்படும் பதநீரைச் சர்க்கரை தயாரிப்பு ஆலைகளுக்குச் கொண்டு சென்று இரசாயனம் கலவாது உடலுக்குத் தீங்கற்ற சர்க்கரை, கருப்பட்டி, கற்கண்டு, மற்றும் பதப்படுத்தப்பட்டு பேக்கிங் செய்யப்படும் பதநீர் தயாரிக்கலாம்!

அதன் பின்னர் வெளியாகும் கழிவுப் பாகினை எரிசாராய ஆலைகளுக்குக் கொண்டு சென்று எத்தனாலாக மாற்றம் செய்து அதையும் எரிபொருள் விற்பனை நிலையங்கள் கொண்டு சென்று விற்பனைப் பொருளாக்கலாம்!

இதோ இந்த இரண்டு வழியில் பெறப்படும் எரிசாராயம் எரிபொருளாக மாற்றம் பெற்றாலே அரசுக்கு எரிபொருள் விற்பனை வாயிலாகக் கிடைக்கும் கிட்டத்தட்ட 35 சதவிகித விற்பனை வரி முழுவதுமாகக் கிடைத்துவிடும். 

அரசின் தேவையான 30 ஆயிரம் கோடிகளில் இது எத்தனை சதவிகிதம் ஈடு செய்யும் என்பதை பாமரனான எம்மால் இப்போது கணிக்க இயலாது.

மேலும் இதனை நடைமுறைச் சாத்தியமாக்கினால் ஏராளமானவர்களுக்குப் புதிதாக வேலை வாய்ப்புகள் உருவாகும் என்பதையும் எம்மால் உறுதியாக உரைக்க முடியும்.

ஒரு தனி நபர் தனது வருமானத்தில் குறைந்த அளவு வைத்துக் கொண்டால்கூட தினசரி 100 ரூபாய்களை மதுவிற்கெனச் செலவிடுகிறார். 

இனி இந்த வருமானம் முழுவதும் அவரது இல்லத்தைச் சென்றடைவதாக வைத்துக் கொள்வோம். இதன் மதிப்பு ஒரு மாதத்தில் சுமார் மூவாயிரமாகும்.

இதனைக் கொண்டு அந்தக் குடும்பம் தங்களின் குடும்பத் தேவைகளுக்கென பொருட்கள் வாங்கினால் அதன் வாயிலாக மத்திய மாநில அரசுகள் இரண்டுமே கிட்டத்தட்ட ஆயிரம் ரூபாய்களை வரியாகப் பெற இயலும். 

இந்த வகையில் குடியிலிருந்து விடுபடும் பல்லாயிரம் குடும்பங்கள் தரப்போகும் வரி வருமானத்தை படித்த மேதைகள்தாம் இனிக் கணக்கிட்டு எம் போன்ற பாமரர்களுக்குத் தெளிவு படுதத வேண்டும்.

மது குடித்துவிட்டு எற்படும் விபத்துகளை விசாரிக்கவாவது அரசு இயந்திரம் செயல்பட்டே ஆக வேண்டும். அதற்கெனச் செய்யப்படும் செலவினங்கள் முழுமையாக இனி குறைய வாய்ப்பு உருவாகும். அதன் மதிப்பும் எம்மால் கணிக்க இயலாது. 

இதோ மதுக்கடைகளுக்கு எதிராகப் போராடும் மக்களை அடக்குவதற்காக ஏவப்படும் காவல்துறைக்கென ஏற்படும் செலவினங்கள் கூட அறவே தொலைந்துவிடும்.

தமிழகத்தில் ஏராளமாக நடக்கும் விபத்துகளுக்குக் காரணமே குடித்துவிட்டு வாகனங்கள் ஓட்டுவதும், குடித்துவிட்டுத் தெருவில் அலங்கோலமாக விழுந்து வாகனங்களில் அடிபடுவதும்தாம். 

இதனால் அவரவர் குடும்ப நபர்களுக்கு ஏற்படும் ஏராளமான செலவினங்கள், மன நிம்மதியற்ற அலைச்சல்கள் அடியோடு தொலையும் நிலை உருவாகும்.

குடித்துவிட்டு வரும் ஆண்களால் பெண்கள் படும் கடுமையான அடி உதைகள், சித்திரவதைகள், பொருள் இழப்புகள், பாலியல் கொடுமைகள், குடித்துவிட்டு நிதானமிழந்து ஏற்படுத்தும் படுகொலைகள் போன்ற எண்ணற்ற சமூகச் சீரழிவுகள் அடியோடு தொலையும் நிலை நாட்டில் உருவாகும்.

மதுவிலக்கு கொண்டு வந்தால் கள்ளச் சாராய விற்பனை பெருகும் என்பதையும் எம்மால் ஏற்கவே இயலவில்லை

உதாரணத்திற்கு நம் நாட்டு இராணுவம் எல்லையிலிருந்து புற்றீசல் போல் புறப்பட்டுவரும் எதிரி நாட்டு இராணுவ வீரர்களையும், தீவிரவாதிகளையும் சர்வ சாதாரணமாக அவர்கள் ஊடுருவ அனுமதித்தால் நம் நாட்டில் எத்தகைய கொடிய விளைவுகள் ஏற்படும் என யோசியுங்கள்.

ஆக எதிரி வெளியிலிருந்து ஊடுருவ இயலாதவண்ணம் நாட்டிற்கு எந்தளவிற்குப் பாதுகாப்பு தேவைப்படுகிறதோ அதே அளவு பாதுகாப்பு போதைப் பொருட்கள் வெளி மாநிலங்களில் இருந்து கடத்தி வரப்படச் சாத்தியமுள்ள வாய்ப்புகளை முற்றிலுமாக அடைக்கும் வழிகள் தேடுவதுதாம் ஒரு அரசின் முதற் கடமையாகும். 

அதைச் செய்யத் தவறும் ஒரு அரசு எதிரிகளை ஊடுருவவிட்டுத் தவிக்கும் கையாலாகாத ஒரு அரசாகத்தாம் எம் போன்ற பாமரர்களால் கணிக்க இயலும்.

எனவே முதற்கண் வெளிமாநிலங்களில் இருந்து கடத்தி வர வாய்ப்புள்ள கள்ள மது வரவினைத் தடுக்கும் ஆற்றல் பெற்றதாக அரசு விளங்க வேண்டும. 

அடுத்து உள் நாட்டிலேயே உருவாகும் கள்ளச் சாராயப் பேர்வழிகளை அவர்கள் உருவாகாமலே தடுக்க பின்வருமாறு கடுமையான ஒரு ஏற்பாட்டினைச் செய்ய வேண்டியதும் அவசியமாகும்.

முதற்கண் மதுவின் பிடியில் இருந்து விடுபடுபவர்களை தக்க வழி காட்டுதல்கள் வாயிலாகத் திருந்துவதற்காக வட்டத்திற்கு ஒன்றும் மாவட்டத்திற்கு ஒன்றுமென ஏழை பணக்காரன் என்ற பாகுபாடு பாராமல் செயல்படக்கூடிய மருத்துவ மையங்களை மதுவால் சீரழிந்தவர்களுக்காகவே சிறப்பு மையங்களாகத் துவக்கி 

மனநல மருத்துவர்கள், மற்றும் உரிய மருத்துவர்கள் துணையோடு அவர்களை நல்வழிப்படுத்தும் வாய்ப்புகiளை ஏராளமாக உருவாக்க வேண்டும்.

அடுத்து வெளி மாநிலங்களில் இருந்து மதுவினைக் கடத்துபவர்கள், மாநிலத்திற்கு உள்ளேயே கள்ளச் சாராயம் காய்ச்சுபவர்கள், இவர்களுக்கு உடந்தையாகச் செயல்படும் சாதாரண மற்றும் அரசியல் செல்வாக்குடையவர்கள், சாதாரண மற்றும் உயர் அரசு அலுவலர்களைக்கூட எவ்விதச் சலுகையும் காட்டாமல் உடனடியாகக் கைது செயய வேண்டும்.

இவர்கள் வெள்ளையர்கள் காலத்தில் அடக்குமுறைக்கென ஏற்படுத்தப்பட்ட அந்தமான் சிறை போலச் செயல்படப் போகும் தமிழகத்தின் ஏதேனும் ஒரு மைய மாவட்டத்தில் புதிதாக அமையப்போகும் ஒரு சிறைச்சாலைக்கு வாய்மை மன்ற உத்தரவின்படி அனுப்பி வைக்க வேண்டும்.

அந்தச் சிறை வளாகம் முழுக்க முழுக்க நேர்மையான அரசு அலுவலர்களால் மட்டுமே நிறைந்திருக்க வேண்டும். தேவைப்பட்டால் வாய்மை மன்ற நடுவர்கள் சார்பில் இந்தச் சிறையில் வாய்மை குணம் மிக்க ஐம்பது கண்காணிப்பாளர்களைக்கூட நியமிக்கலாம்.

காவல் துறை அலுவலர்கள் என்றால் கடுமையானவர்களாக அதே சமயம் சமுதாய நோக்கம் கொண்ட மென்மை குணம் கொண்டவர்களாக மட்டுமே தேர்ந்தெடுக்கப்பட்டு இங்கு அமர்த்தப்பட வேண்டும்.

அடுத்து எந்த நேரமும் சிகிச்சை அளிப்பதற்கெனவே ஒரு அதி நவீன மருததுவமனையும் சிறை வளாகத்தில் அமைக்கப்பட்டு கைதிகளுக்கு எந்த நேரமும் அவர்களின் உடல் நிலையைச் சீராக்கத் தயார் நிலையில் இருக்கும்படி செய்ய வேண்டும்.

அடுத்து இங்கு தேவையான எண்ணிக்கையில் மனநல ஆலோசகர்களும் நியமிக்கப்பட்டு திருந்தத் தயாராகும் கைதிகளுக்கு ஆலோசனைகள் வழங்குமாறு செய்ய வேண்டும்.

மனித உரிமை மீறல் என்றே சட்டம் சொன்னாலும் அதைக் காற்றில் பறக்க விட்டு இந்த ஒரு சிறையில் மட்டும் கீழ்க்கண்ட நடைமுறைகள் கடுமையாகப் பின்பற்றப்பட வேண்டும்.

இங்கு எவரையும் அடித்து உதைத்துத் துன்புறுத்தப்போவதில்லை. ஆனால் அதே சமயம் இந்தச் சிறைக்கு எவர் செல்ல நேரிட்டாலும் அது கொடுமையான தண்டனைக்கூடமாகக் காட்சியளிப்பதாகத்தான் நாடு முழுவதும் உள்ள குற்றவாளிகள் அறியுமாறு செய்யப்பட வேண்டும்.

கள்ளச் சாராயம் காய்ச்சியவரா? அவருக்கு இங்குள்ள சிறையில் தினசரி உணவு அவர் காய்ச்சிய சாராயம்தாம். அதைத் தவிர எந்த உணவும், ஏன் தண்ணீர்கூட இங்கு தரப்படக்கூடாது. 

உணவாக எதுவும் கிடைக்க வழியின்றி எப்படிப்பட்ட வைராக்கியமுள்ள நபராயினும் தாங்கள் காய்ச்சிய மதுவை மட்டுமே எத்தனை நாள்தான் உணவாகக் கொள்ள முடியும்? 

வேறு வழியின்றித் தான் இனி இந்தத் தவறைச் செய்யப் போவதில்லை என அவர்கள் மாற்று உணவு கேட்டுக் கதறும்வரை இதே தண்டனை நீடிக்க வேண்டும்.

ஒரு நாள் அல்லது இரண்டு நாள் அல்லது எத்தனை நாளானாலும் ஒன்று அவர்கள் தங்களின் தயாரிப்பை உணவாகக் கொள்ள வேண்டும். அல்லது உண்ணாவிரதம் இருந்தாக வேண்டும்.

இது போன்ற தண்டனையால் அவர்களின் உடல்நிலை மோசமடைந்தால் தயாராக இருக்கும் மருத்துவக்குழு அவர்களின் உயிருக்கு ஊறு நேரா வண்ணம் சிகிச்சையளித்துக் காப்பாற்றி அவர்களின் உடல்நிலை தேறியபின்னர் மீண்டும் ஒருமுறை இதே உணவுமுறை அதிர்ச்சி வைத்தியம் தொடர வேண்டும்.

மது மட்டுமல்ல, தமிழகத்தில் தடை செய்யப்பட்ட கஞ்சா, பான்பராக் போன்றவற்றைக் கடத்தி விற்பவர்களுக்கும், அதை வாங்கி விற்பவர்களுக்கும், அதற்கு உடந்தையாக இருந்தவர்களுக்கும் அவர்கள் எந்த உயர் பதவி வகித்தாலும் இதேவித தண்டனை முறைதாம் கடுமையாக அமல்படுத்தப்பட வேண்டும்.

இந்தச் சிறைச்சாலையின் பெயரை உச்சரிக்கவே தீங்கு செய்பவர்கள் அஞ்சுகின்ற நிலை உருவாக்கப்பட வேண்டும்.

இது சித்திரவதைக்கூடமாகத் திகழ்ந்தாலும் குற்றவாளிகளைத் திருத்தும் இடமாகத்தான் திகழ வேண்டும். இங்கு வந்து மனமாற்றம் பெற்றதாக ஏமாற்றிவிட்டு மீண்டும் இதே குற்றத்தை ஒரு நபர் செய்ய முற்பட்டால் அவருக்கு முன்பு கொடுக்கப்பட்ட தண்டனை நாள் கணக்கை முன்பை விட அதிகரித்துவிட வேண்டும்.

இதனினும் மேலாக இந்தச் சிறைச்சாலை வளாகம் முழுவதும் கண்காணிப்புக் கேமராக்கள் பொருத்தப்பட்டு இங்கு நடக்கும் நிகழ்வுகள் அனைத்தும் படம் பிடிக்கப்பட்டு அருகிலுள்ள வாய்மை மன்றங்களின் நடுவர்கள் கானொளிக் காட்சி வாயிலாகத் தெரிந்து கொண்டு அதற்கேற்ப உத்தரவுகளைப் பிறப்பிக்க ஏதுவாக்க வேண்டும்.

பணத்திற்கு ஆசைப்பட்டுத்தாம் குறுக்கு வழியில் சம்பாதிக்க இதுபோன்ற குற்றவாளிகள் உருவாகின்றனர். அவர்களை வளர்த்துவிடுவதும் பணத்திற்கு ஆசைப்படும் அரசியல்வாதிகளும், சில அரசு அலுவலர்களும்தான்.

இவர்கள் திருந்தாதவரை இந்த நாடு திருந்தப் போவதில்லை. ஒரு ஆரோக்கியமான சமுதாயம் உருவாக வேண்டுமென்றால் இது போன்ற கடுமையான நிலைப்பாடுகள் எடுத்தாக வேண்டியது காலத்தின் கடடாயம்.

இந்தச் சிறைச்சாலை ஒரு சித்திரவதைக்கூடமல்ல! சமூகத்தைச் செயல்படவிடாமல் தடுக்கும் ஒருவரைக் கடும் தண்டனைகள் வாயிலாகத் திருத்தி நல்வழிப்படுத்தி அவரையும் ஒரு நல்ல மனிதராக உருவாக்க வேண்டும் என்பதுதான் இந்தச் சிறைச்சாலையின் பிரதான நோக்கமாகத் திகழ வேண்டும்.

இதுதாம் மதுவிலக்கை அமல்படுத்த இயலாமல் தடுமாறும் அரசுகளுக்கு நாம் தெரிவிக்கும் ஒரு உண்மையான வழிமுறை. 

எனவே இந்த முறையில் செயல்பட்டால் நாட்டில் மதுக்கடைகள் ஒழிந்த கையோடு புறப்படும் கள்ளச்சாராயச் சாவுகளும், கடத்தல்களும் அடியோடு தடுக்கப்பட்டு நாடு ஒரு உன்னதமான பாதையில் நடைபோட வழியேற்படும்.

எனவே முதல் நடவடிக்கையாகத் தமிழகத்தில் உள்ள சாராய ஆலைகள் தங்களின் தயாரிப்பை உடனடியாக நிறுத்த உத்தரவிடவேண்டும். அதற்கு உடன்படாத ஆலைகளை அரசே தனது கட்டுப்பாட்டுக்குள் கொண்டுவந்து எரிபொருள் உற்பத்தி ஆலைகளாக மாற்றம் செய்ய வேண்டும். 

மேற்கண்ட வழிமுறைகள் அனைத்தும் செயல்படுத்த கால அவகாசம சிறிதுகூடத் தேவையில்லை. ஒரு நல்ல அரசாங்கமென்றால் இன்றிலிருந்துகூட இதைச் செயல்படுத்த முடியும்.

அரசியல் களத்தில் நீயா நானா எனப் பணம் படைத்த மாபெரும் அரசியல் இயக்கங்களும் இவர்களை அண்டிப் பிழைக்கும் சில்லறை இயக்கங்களும் இன்று நடத்துகின்ற தேவையற்ற போராட்டங்களில் ஈடுபடுமாறு மாணவச் செல்வங்கள் தூண்டி விடப்படுகின்றனர்.

மாணவச் செல்வங்கள் ஒன்றை மட்டும் நன்கு புரிந்து கொள்ள வேண்டும். குளிரூட்டப்பட்ட கார்களில் வலம் வந்து, குளிரூட்டப்பட்ட இயக்க அலுவலகங்களில் அமர்ந்து கொண்டு, குளிரூட்டப்பட்ட இல்லங்களில் குடியிருந்து கொண்டு உங்களைத் தூண்டி விடுபவர்கள்தான் இன்றைய சுயநல அரசியல்வாதிகள்.

இவர்களில் எவரும் உங்களுடன் தோளோடு தோள் நின்று சரிக்குச் சமமாகத் தெருவில் இறங்கிப் போராடப் போவதில்லை. 

கார்களில் வந்து உங்களைத் தூண்டிவிட்டு காவல்துறையிடம் சிக்கி நீங்கள் அடிபடும்போது காணாமல் மறைந்து, பின்னர் உங்களைச் சிறைச்சாலைகளில் வந்து அனுதாபம் காட்டுவதாக முதலைக்கண்ணீர் வடிக்க மட்டுமே இவர்களுக்குத் தெரியும். 

இவர்களின் ஒரே குறிக்கோள் வரும் தேர்தலில் யார் வெல்லப் போவது என்பதுதாம். இவர்களின் ஆடு புலி ஆட்டத்தில் பலியாகப்போகும் ஆடுகள் நீங்கள்தான் என்பதை உணர்நது 

அவர்களையும் இன்றைய இளைய சமுதாயம்தாம் தம்முடைய வலிமையான வாக்கு வங்கியின் துணை கொண்டு நல்வழிப்படுத்த வேண்டும் என்ற உயரிய நோக்கம் உடைய ஐந்தாம் தமிழ்ச்சங்கம் 

போதைக் கலாச்சாரத்திலிருந்து மீண்டு ஒரு மகத்தான தமிழ்ச்சமுதாயம் உருவாக மேற்கண்ட வழிமுறைகளைப் பணிவுடன் உங்கள் முன் சமர்ப்பிக்கிறது.

எமது கருத்துக்கள் பிடித்தவர்கள் இந்த வழிமுறைகள் தமிழகமெங்கும் பரவி அகிம்சை வழியில் அவரவர் கல்விக்கூடங்கள் முன்பு அமைதியாக முழக்கமிட்டு அரசை நிர்பந்தித்து தமிழகத்தில் முழுமையான மதுவிலக்கினை உடனடியாக நடைமுறைப்படுத்த 

இணையத்தில் இதனைப் படிப்பவர்கள் மற்றவர்களிடம் பகிர்ந்து உங்களின் உதவிக்கரங்களை நீட்டுங்கள். 

இதனைப் புரிந்து கொள்ளாமல் வழக்கம்போல அரசியல்வாதிகள் ஒருவேளை மதுக்கடைகளை மூடி அதன் வாயிலாக வரும் ரூபாய் முப்பதாயிரம் கோடி வருமானத்தை இழக்க மாட்டோம் என ஒரேயடியாகப் பிடிவாதம் செய்தால் 

இந்த நாட்டிலுள்ள வசதியற்ற இருபது இலட்சம் குடும்பங்கள் ஒவ்வொரு குடும்பமும் சுமார் இரண்டாயிரத்து நானூறு ரூபாய்கள் வீதம் வருடத்திற்கு ஒரு முறை (மாதத்திற்கு இரு நூறு ரூபாய்கள்தான்) 

நடுத்தர வசதியுள்ள எண்பது இலட்சம் குடும்பங்கள் வருடத்திற்கு பனிரெண்டாயிரம் வீதமும் ,

உயர் வசதி படைத்த ஐம்பது இலட்சம் குடும்பங்கள் வருடத்திற்கு இருபத்து நான்காயிரம் வீதம் பிச்சையாகக் கொடுத்தாலே ஒன்றரை கோடி குடும்பங்களின் தியாகம் காரணமாக அரசிற்கு இருபத்திரண்டாயிரம் கோடிகள் முழுமையாகக் கிடைத்து விடும். இதுவும் இந்தப் பாமரன் கணக்கிட்ட எளிமையான கணக்குதான்.

குடிக்கு அடிமையான ஒரு சராசரி மனிதரை குடும்ப நபராகக் கொண்ட ஒரு வசதியற்ற குடும்பம் அவரது வருமானத்தில் ஒரு நாளைக்கு நூறு ரூபாய்கள் வீதம் மாதத்திற்கு மூவாயிரம் இழப்பதால் அந்தக் குடும்பத்திற்கு ஏற்படும் இழப்பினைக் காட்டிலும் 

அந்தச் சாதாரண குடும்பம் மதுவின் பிடியிலிருந்து விடுபட கையாலாகாத ஒரு அரசிற்கு மாதம் இரு நூறு ரூபாய்களைப் பிச்சையளிப்பதில் தவறேதுமில்லைதானே.

இதை வாங்கிக் கொண்டு இன்றுள்ள அரசு இல்லையேனும் ஒரு வேளை இளைய சமுதாயத்தின் எழுச்சியால் ஒரு உண்மையான வாய்மையான ஒரு நல்லாட்சி எதிர்காலத்தில் உருவாகி அவர்களாவது மதுக்கடைகளை ஒரேயடியாக நாட்டில் ஒழித்துக் கட்டும் நிலை உருவாக வேண்டும்.

நாளைய பொழுது நமக்கு நல்லதாகவே விடியும்! அது நிச்சயம் மது போதையற்ற ஒரு உயர் நாகரீகத் தமிழகமாகத் திகழப்போவதாக எம்மைத் தூங்கவிடாமல் துரத்தும் இலட்சியக் கனவாகத்தாம் இப்போது எம்முள் விரிகிறது.






Read More...

திங்கள், 3 ஆகஸ்ட், 2015

எந்தையே! எம் தந்தையே! கலாமே!

Leave a Comment
எந்தையே! எம் தந்தையே! கலாமே!

கண்டம் விட்டுக் கண்டம் பறக்குமாம் வேடந்தாங்கல் பறவைகள்! 
இராணுவ வரிசையென முன்பின் அணி அணியாய்ப் பறக்கும் பயணம்!

முன்வரிசைப் பறவைகளின் சிறகசைவில் 
ஓய்வெடுத்துப் பறந்து செல்லும் பின் வரிசை அணியும்

தம் களைப்பு நீங்கி முன் வரிசை வந்து பறக்க 
முன் வரிசை அணி பின் வந்துதம் களைப்பு நீங்கும் சுழற்சிமுறை! 

எங்கும் தங்கவியலா இடைநில்லா நெடுங்கடல் பயணம்தனை 
முடிப்பதன் இரகசியம்தாம் மாந்தர்க்கு வியப்புமிகு செய்தி போன்றே

கண்டம் விட்டுக் கண்டம் பாயும் இடைநில்லாப் பயணம் செய்யும் 
நெருப்பு ஏவுகணை தந்த எம் தந்தையே! கலாமே!

எம்மை முன்வரிசைக்கனுப்பிவிட்டுச் சற்று ஓய்வெடுக்க நினையாது 
உடல் மூப்பும் கருதாமல்  ஓயாதுழைத்திட்ட காரணத்தால் 

அந்தோ மரணப் பெருங்கடலில் வீழ்ந்த உம்மைக் காணாது தவித்து
எம் இமைநீர் கடல்போல் பெருக எங்கும் தேடிக் களைத்திட்டோம்!

வெந்தழலில் வீழ்ந்தாலும் உயிர்த்தெழும் ஃபீனிக்சு பறவைபோல் 
இராமேசுவரப் பேய்க்கரும்பிலிருந்து மீண்டும் புது உடலெடுத்து வாருங்கள்!

எம்மைத் தூங்காது துரத்தும் இலட்சியக் கனவுகள் சுமந்து நாங்கள்
உங்கள் அக்கினிச் சிறகசைவில் சற்று ஓய்வெடுத்துப் பறக்க வேண்டும்!

தாயன்போடு பறக்கும் தங்கள் அக்கினிச் சிறகசைவில் 
நாங்கள் அக்கினிக் குஞ்சுகள் போல என்றும் பறந்து தொடர வேண்டும்

ஓயாது உழைத்துத்தந்த தாங்கள் எண்ணங்கள் துணை கொண்டே
கண்டம் விட்டுக் கண்டம் தாண்டிப் புதுயுக உலகம் காண்போம் நாங்கள்!

என்றென்றும் உங்கள் எண்ணங்கள் தாங்கி நீண்டாலும் 
அடைந்தே தீரும்   நம் இலட்சியப் பயணம் 

ஒரு போதும் முடிவதில்லை! அதுவரை நாம் ஓய்வதில்லை!
என்ற நம்பிக்கைகளுடன் ஈரோட்டிலிருந்து தெ.குமாரராஜா.

Read More...

புதன், 29 ஜூலை, 2015

இது ஒரு நல்ல துவக்கம்!!

Leave a Comment
பிறந்தாலும் மறைந்தாலும் பேர் சொல்ல வேண்டும்! 
இவர் போல யாரென்று ஊர் சொல்ல வேண்டும்! 

என்ற கவிஞரின் வைர வரிகளுக்கேற்ப மறைந்தாலும் என்றென்றும் மக்கள் நினைவுகளில் வாழும் கலாம் அவர்களின் மறைவுகூட ஒரு நல்ல தொடக்கத்திற்கு வித்திட்டுள்ளது.

திரு கலாம் அவர்கள் மறைவுச் செய்தியினை உலகம் கேட்டது 27.07.15 அன்று இரவு 8.30 மணி வாக்கில்தாம்.

இதைக் கேள்விப்பட்ட நேரம் முதல் நாடெங்கும் உள்ள மக்கள் மனதில் சோக இருள் சூழ்ந்தது.

எனினும் அவரின் மறைவைக் கேட்டவுடன் நள்ளிரவு வரையில்கூட ஆங்காங்கே மக்கள் குறிப்பாக இளைய சமுதாயத்தினர் மெழுகுவர்த்திகள் ஏந்தி அஞ்சலி செழுத்தி வருவதாக ஊடகங்கள் வாயிலாகச் செய்திகள் வரத்துவங்கின.

மறு நாள் காலை கலாம் அவர்கள் வாழ்ந்த இராமேசுவரத்தில் மட்டும் வணிக நிறுவனங்கள் அனைத்தும் அடைக்கப்பட்டுள்ளதாகவும், (கவனியுங்கள் அதுகூட அவர் மீது அந்தத் தீவு மக்கள் கொண்டிருந்த அபரிமிதமான பாசத்தின் காரணமாகத்தானே தவிர கட்டாயத்தின் காரணமாக அல்லவே அல்ல) அந்தத் தீவில் வாழும் மீனவர்கள் கலாம் அவர்களின் மறைவு காரணமாக மூன்று நாட்கள் கடலுக்குச் சென்று மீன் பிடிக்கப் போவதில்லை என முடிவெடுத்திருப்பதாகவும் செய்திகள் வந்தன.

தமிழகத்தில் பள்ளி கல்லூரிகளுக்கு அன்றைய தினம் விடுமுறை அளிக்கப்படவில்லை. என்பதை ஒரு குறையாகச் சில அரசியல் தலைவர்கள் அறிக்கை வெளியிட்டிருந்தனர். இதற்கான காரணம் என்னவென்பதற்கு அரசு அளித்த பதிலும் இப்பொழுது விவாதத்திற்கு உரியதல்ல.

ஆனால் நாட்டின் முன்னேற்றத்திற்காகவே அல்லும் பகலும் தனது எண்ணங்களை மாணவ சக்தியிடம் வெளியிட்டுப் பாடுபட்ட திரு கலாம் அவர்கள் விண்ணுலகு சென்ற நிலையிலும் தனது மறைவு காரணமாக விடுமுறை விடப்பட்டு அதனால் மாணவர்களின் கல்வித்திறன் பாதிக்கப்படுவதை நிச்சயமாக விரும்பவே மாட்டார்.

அன்றைய தினம் கல்வி நிலையங்களுக்குச் சென்றதால்தான் கனவு காணுங்கள் எனத் தங்களைத் தட்டி எழுப்பி வழி நடத்தி வந்த திரு கலாம் அவர்களுக்குக் கோடிக்கணக்கான மாணவச் செல்வங்கள் தங்களின் இதயம் நிறைந்த அஞ்சலியினைச் செழுத்த முடிந்தது.

இன்னும் சொல்லப்போனால் கலாம் அவர்களின் மறைவுச் செய்திகளை இப்பொழுது வரை வெளியிட்டுவரும் செய்தி ஊடகங்கள் தவிர அவர் உடல் நல்லடக்கம் செய்யப்பட உள்ள 30.07.15 அன்று வரை மூன்று நாட்களுக்குக்கூட மூட்டை கட்டிக் காத்திருக்க இயலாத வணிக நோக்கத் தொலைக்காட்சி ஊடகங்கள் வழக்கம்போலக் குத்தாட்டப் பாடல்களையும், மக்களைத் தவறாக வழி நடத்தும் தொலைக்காட்சித் தொடர்களையும் நடத்தி வருகின்றன.

எனினும் திரு கலாம் அவர்களின் மறைவுச் செய்தி கேட்டபின்பு குறிப்பாகத் தமிழகத்தில் எங்குமே இதுவரை கடையடைப்போ வன்முறைகளோ நடைபெற்றதாக ஒரு சிறு செய்திகூட வரவில்லை.

அவர் சர்வ வல்லமை படைத்த ஒரு அரசியல் தலைவராக இல்லாதிருக்கலாம். 

ஆனால் அவர் ஒரு மாபெரும் எளிமை மிக்க தலைவராக, குறிப்பாக இளைய சமுதாயத்தால் அடையாளம் காணப்பட்டு கோடிக்கணக்கான மாணவ சமுதாயம் தன்னுடைய கருத்துக்களை ஏற்றுப் பின் தொடருமாறு ஒரு சமூகப் போராளியாக திகழ்ந்திருந்தார்.

அவர் பின்னே அணிவகுத்து நின்றது அகிம்சைப் படை. 

அதனால்தான் அவரது மறைவுக்குப் பின்னர் இந்த நிமிடம் வரை இளைய சமுதாயமும் மக்களும் அமைதியாக மெழுகு வர்த்திகள் ஏந்தியும், ஆங்காங்கே இரங்கல் பொதுக்கூட்டங்கள் நடத்தியும், அவரின் நல் எண்ணங்களைப் புரிந்து கொண்டு அவர் மீது பாசம் வைத்திருந்தவர்கள் கட்அவுட்டுகள் வைத்து மாலை அணிவித்து மரியாதை செழுத்தி மௌனப் பேரணி நடத்தியும் அஞ்சலி செழுத்தி வருகின்றனர்.

30.07.15 அன்று கல்வி நிறுவனங்கள், அரசு நிறுவனங்கள், தனியார் நிறுவனங்கள் அனைத்திற்கும் விடுமுறை என அரசு அறிவிப்பு செய்திருந்தாலும், திரு கலாம் அவர்களின் மறைவுக்கு அன்றைய தினம் தாங்களாகவே முன்வந்து கடைகளை அடைப்பதாகவும், தொழிலாளர் இயக்கங்கள் அன்றைய தினம் தாங்கள் வேலை செய்வதில்லையெனவும் முடிவெடுத்திருப்பதாகச் செய்திகள் வருகின்றன.

அரசியல் தலைவர்களுக்கு இயற்கையாக வரும் உடல் நலக்குறைவினைக் கேள்வியுற்றால்கூட வன்முறை வெறியாட்டங்கள் தாண்டவமாடும் ஒரு மோசமான அரசியல் அநாகரீகத்தைப் பண்பாடாகக் கொண்ட தமிழக அரசியல் சக்திகள் 

ஆற்றல் மிக்க தலைவராகக் கருதப்பட்ட திரு கலாம் அவர்களின் மறைவுக்குப் பின்னர் தமிழகத்தில் நிலவும் உண்மைத் தன்மையைக் கண்டு கொண்டு இனியாவது தங்களின் இயக்கம் சார்ந்தவர்கள் நல்வழி நடக்கத் தலைப்படுமாறு அவர்களை வழி நடத்த வேண்டும்.

யார் உயர்ந்த தலைவர் என்பதைத் தன் மறைவின் வாயிலாகக்கூட ஒரு மகத்தான செய்தியாக வெளியிட்ட திரு கலாம் அவர்களின் மறைவுக்குப் பின்னர் தமிழகத்தில் தற்பொழுது நடைபெற்று வரும் நிகழ்வுகள்கூட ஒரு நல்ல துவக்கம்தான்.

தம் மறைவிற்குப் பின்னரும் தமிழகத்தை அமைதியாக வழி நடத்தும் திரு கலாம் அவர்களின் பெயர் உலகம் உள்ளவரை சரித்திரத்தில் வைர எழுத்துக்களால் பொறிக்கப்பட்டு நீங்காத இடம் பெற்றிருக்கும் என்பதுதாம் கண்கூடான உண்மை.

Read More...

செவ்வாய், 28 ஜூலை, 2015

கலாம் அவர்களின் கனவுகள் விதைக்கப்படப் போகின்றன.

Leave a Comment
எனக்குள் ஏற்பட்ட ஒரு உந்துதல் காரணமாக திரு அப்துல் கலாம் அவர்களின் மின்னஞ்சல் முகவரிக்கு முதன்முறையாகக் கடந்த 22.07.15 அன்று ஒரு கடிதத்தை எழுதினேன். 

அந்தக் கடிதம் எழுதிய கணம் முதல் நேற்று 27.07.15 வரை  எனது இடது கண் புருவம் தொடர்ந்து பலமாகத் துடித்தவண்ணம் இருந்தது.

ஏதோ நிகழப் போவதாக என்னுள் ஒரு உள்ளுணர்வு. 

எனினும் அது நல்லதாகவே இருக்க வேண்டும் என்றே எனது ஆழ்மனதுக்குச் சொல்லி வந்தேன்.

எனினும் நாம் விரும்பாதது நடந்தே விட்டது. அந்த மாமனிதரை இன்று ஒட்டுமொத்த தமிழ்ச்சமுதாயமும், பாரத மக்களும், உலகெங்கும் வாழும் மக்களும் இழந்து தவிக்கிறோம்.

அலைகள் தாலாட்டும் இராமேசுவரம் மண்ணில் இந்த மாமனிதரின் உடல் நாளை புதைக்கப்பட்டாலும், பாரத இளைஞர்களைக் கனவு காணுங்கள் என உறக்கம் தட்டி எழுப்பிய அவர்தம் கனவுகள் புதைக்கப்படப் போவதில்லை.

அவை விதைக்கப்படப் போகின்றன. அந்தக் கனவுகள் முளைத்து ஆல்போல் உயரும்போது இந்த உலகம் முழுமையும் அவர் விரும்பிய கனவுகள்படியே காட்சியளிக்கும்!

நல்லோர்களின் மரணங்கள் அவர்கள் வாழ்ந்த காலத்தில் நாம் வாழ்ந்ததற்காகப் பெருமிதம் கொள்ள வேண்டும் என்று இசுலாத்தில்கூட வாழ்ந்தவர்களின் மறைவைத் துக்கமாக அனுசரிப்பதில்லை!

மாமனிதர் கலாம் அவர்கள் பாரதி கனவு கண்ட அக்கினிக் குஞ்சு! வயது காரமாக இந்த அக்கினிக் குஞ்சு தன் உடலெனும் சிறகுகள் உதிர்த்து விண்ணில் பறந்து பிரபஞ்சப் பேராற்றலில் கலந்துவிட்டாலும் 

நம் பாரத இளைஞர்கள் குறிப்பாகத் தமிழ் இளைஞர்கள்  அவரின் இலட்சியத் தீயைத் தம் நெஞ்சில் சுமந்து பெருந்தீயெனப் பற்றிப் பரவி இந்த தேசம் முழுவதும் வெந்து தணிந்து புதுயுகம் மலரப் பாடுபட வேண்டும்.

அவர் நம் தமிழகம் எவ்வாறெல்லாம் வரும் காலத்தில் திகழ வேண்டும் என ஒரு நூலைப் படைக்கத் துவங்கி அது முடிவு பெறாத நிலையில் வெளிவந்தாலும் அதை முழுமையாக முடித்து வைக்கும் ஆற்றல் பெற்றவர்களாக நம் தமிழக இளைய சமுதாயம் திகழ வேண்டும்.

கலாம் அவர்கள் கண்ட கனவுகள் அனைத்தும் அவர் இலக்காகத் தீர்மானித்த வரும்  2020 ஆம் ஆண்டுக்குள் மெய்ப்படும் காலம் உருவாக்கப்பட வேண்டும்

கலாம் அவர்களின் மறைவு கேட்டு வாடும் உள்ளங்கள் அனைவருக்கும் எமது ஆழ்ந்த வருத்தங்களைப் பதிவு செய்கிறோம்!

கலாம் அவர்கள் காட்டிய வழியில் வழி நடப்போம் எனச் சூளுரைப்பதே நாம் அவருக்குச் செழுத்தும் மகத்தான அஞ்சலி என உறுதியேற்போம்!

மாமனிதர் கலாம் அவர்களின் புகழ் உலகம் உள்ளவரை வாழ்வாங்கு வாழும்!

புவிப்பந்தில் தமிழகம் உள்ளவரை என்றென்றும் வாழ்வாங்கு வாழும் கலாம் அவர்களின் நீடித்த புகழ்!

Read More...