புதன், 29 ஜூலை, 2015

இது ஒரு நல்ல துவக்கம்!!

Leave a Comment
பிறந்தாலும் மறைந்தாலும் பேர் சொல்ல வேண்டும்! 
இவர் போல யாரென்று ஊர் சொல்ல வேண்டும்! 

என்ற கவிஞரின் வைர வரிகளுக்கேற்ப மறைந்தாலும் என்றென்றும் மக்கள் நினைவுகளில் வாழும் கலாம் அவர்களின் மறைவுகூட ஒரு நல்ல தொடக்கத்திற்கு வித்திட்டுள்ளது.

திரு கலாம் அவர்கள் மறைவுச் செய்தியினை உலகம் கேட்டது 27.07.15 அன்று இரவு 8.30 மணி வாக்கில்தாம்.

இதைக் கேள்விப்பட்ட நேரம் முதல் நாடெங்கும் உள்ள மக்கள் மனதில் சோக இருள் சூழ்ந்தது.

எனினும் அவரின் மறைவைக் கேட்டவுடன் நள்ளிரவு வரையில்கூட ஆங்காங்கே மக்கள் குறிப்பாக இளைய சமுதாயத்தினர் மெழுகுவர்த்திகள் ஏந்தி அஞ்சலி செழுத்தி வருவதாக ஊடகங்கள் வாயிலாகச் செய்திகள் வரத்துவங்கின.

மறு நாள் காலை கலாம் அவர்கள் வாழ்ந்த இராமேசுவரத்தில் மட்டும் வணிக நிறுவனங்கள் அனைத்தும் அடைக்கப்பட்டுள்ளதாகவும், (கவனியுங்கள் அதுகூட அவர் மீது அந்தத் தீவு மக்கள் கொண்டிருந்த அபரிமிதமான பாசத்தின் காரணமாகத்தானே தவிர கட்டாயத்தின் காரணமாக அல்லவே அல்ல) அந்தத் தீவில் வாழும் மீனவர்கள் கலாம் அவர்களின் மறைவு காரணமாக மூன்று நாட்கள் கடலுக்குச் சென்று மீன் பிடிக்கப் போவதில்லை என முடிவெடுத்திருப்பதாகவும் செய்திகள் வந்தன.

தமிழகத்தில் பள்ளி கல்லூரிகளுக்கு அன்றைய தினம் விடுமுறை அளிக்கப்படவில்லை. என்பதை ஒரு குறையாகச் சில அரசியல் தலைவர்கள் அறிக்கை வெளியிட்டிருந்தனர். இதற்கான காரணம் என்னவென்பதற்கு அரசு அளித்த பதிலும் இப்பொழுது விவாதத்திற்கு உரியதல்ல.

ஆனால் நாட்டின் முன்னேற்றத்திற்காகவே அல்லும் பகலும் தனது எண்ணங்களை மாணவ சக்தியிடம் வெளியிட்டுப் பாடுபட்ட திரு கலாம் அவர்கள் விண்ணுலகு சென்ற நிலையிலும் தனது மறைவு காரணமாக விடுமுறை விடப்பட்டு அதனால் மாணவர்களின் கல்வித்திறன் பாதிக்கப்படுவதை நிச்சயமாக விரும்பவே மாட்டார்.

அன்றைய தினம் கல்வி நிலையங்களுக்குச் சென்றதால்தான் கனவு காணுங்கள் எனத் தங்களைத் தட்டி எழுப்பி வழி நடத்தி வந்த திரு கலாம் அவர்களுக்குக் கோடிக்கணக்கான மாணவச் செல்வங்கள் தங்களின் இதயம் நிறைந்த அஞ்சலியினைச் செழுத்த முடிந்தது.

இன்னும் சொல்லப்போனால் கலாம் அவர்களின் மறைவுச் செய்திகளை இப்பொழுது வரை வெளியிட்டுவரும் செய்தி ஊடகங்கள் தவிர அவர் உடல் நல்லடக்கம் செய்யப்பட உள்ள 30.07.15 அன்று வரை மூன்று நாட்களுக்குக்கூட மூட்டை கட்டிக் காத்திருக்க இயலாத வணிக நோக்கத் தொலைக்காட்சி ஊடகங்கள் வழக்கம்போலக் குத்தாட்டப் பாடல்களையும், மக்களைத் தவறாக வழி நடத்தும் தொலைக்காட்சித் தொடர்களையும் நடத்தி வருகின்றன.

எனினும் திரு கலாம் அவர்களின் மறைவுச் செய்தி கேட்டபின்பு குறிப்பாகத் தமிழகத்தில் எங்குமே இதுவரை கடையடைப்போ வன்முறைகளோ நடைபெற்றதாக ஒரு சிறு செய்திகூட வரவில்லை.

அவர் சர்வ வல்லமை படைத்த ஒரு அரசியல் தலைவராக இல்லாதிருக்கலாம். 

ஆனால் அவர் ஒரு மாபெரும் எளிமை மிக்க தலைவராக, குறிப்பாக இளைய சமுதாயத்தால் அடையாளம் காணப்பட்டு கோடிக்கணக்கான மாணவ சமுதாயம் தன்னுடைய கருத்துக்களை ஏற்றுப் பின் தொடருமாறு ஒரு சமூகப் போராளியாக திகழ்ந்திருந்தார்.

அவர் பின்னே அணிவகுத்து நின்றது அகிம்சைப் படை. 

அதனால்தான் அவரது மறைவுக்குப் பின்னர் இந்த நிமிடம் வரை இளைய சமுதாயமும் மக்களும் அமைதியாக மெழுகு வர்த்திகள் ஏந்தியும், ஆங்காங்கே இரங்கல் பொதுக்கூட்டங்கள் நடத்தியும், அவரின் நல் எண்ணங்களைப் புரிந்து கொண்டு அவர் மீது பாசம் வைத்திருந்தவர்கள் கட்அவுட்டுகள் வைத்து மாலை அணிவித்து மரியாதை செழுத்தி மௌனப் பேரணி நடத்தியும் அஞ்சலி செழுத்தி வருகின்றனர்.

30.07.15 அன்று கல்வி நிறுவனங்கள், அரசு நிறுவனங்கள், தனியார் நிறுவனங்கள் அனைத்திற்கும் விடுமுறை என அரசு அறிவிப்பு செய்திருந்தாலும், திரு கலாம் அவர்களின் மறைவுக்கு அன்றைய தினம் தாங்களாகவே முன்வந்து கடைகளை அடைப்பதாகவும், தொழிலாளர் இயக்கங்கள் அன்றைய தினம் தாங்கள் வேலை செய்வதில்லையெனவும் முடிவெடுத்திருப்பதாகச் செய்திகள் வருகின்றன.

அரசியல் தலைவர்களுக்கு இயற்கையாக வரும் உடல் நலக்குறைவினைக் கேள்வியுற்றால்கூட வன்முறை வெறியாட்டங்கள் தாண்டவமாடும் ஒரு மோசமான அரசியல் அநாகரீகத்தைப் பண்பாடாகக் கொண்ட தமிழக அரசியல் சக்திகள் 

ஆற்றல் மிக்க தலைவராகக் கருதப்பட்ட திரு கலாம் அவர்களின் மறைவுக்குப் பின்னர் தமிழகத்தில் நிலவும் உண்மைத் தன்மையைக் கண்டு கொண்டு இனியாவது தங்களின் இயக்கம் சார்ந்தவர்கள் நல்வழி நடக்கத் தலைப்படுமாறு அவர்களை வழி நடத்த வேண்டும்.

யார் உயர்ந்த தலைவர் என்பதைத் தன் மறைவின் வாயிலாகக்கூட ஒரு மகத்தான செய்தியாக வெளியிட்ட திரு கலாம் அவர்களின் மறைவுக்குப் பின்னர் தமிழகத்தில் தற்பொழுது நடைபெற்று வரும் நிகழ்வுகள்கூட ஒரு நல்ல துவக்கம்தான்.

தம் மறைவிற்குப் பின்னரும் தமிழகத்தை அமைதியாக வழி நடத்தும் திரு கலாம் அவர்களின் பெயர் உலகம் உள்ளவரை சரித்திரத்தில் வைர எழுத்துக்களால் பொறிக்கப்பட்டு நீங்காத இடம் பெற்றிருக்கும் என்பதுதாம் கண்கூடான உண்மை.

Read More...

செவ்வாய், 28 ஜூலை, 2015

கலாம் அவர்களின் கனவுகள் விதைக்கப்படப் போகின்றன.

Leave a Comment
எனக்குள் ஏற்பட்ட ஒரு உந்துதல் காரணமாக திரு அப்துல் கலாம் அவர்களின் மின்னஞ்சல் முகவரிக்கு முதன்முறையாகக் கடந்த 22.07.15 அன்று ஒரு கடிதத்தை எழுதினேன். 

அந்தக் கடிதம் எழுதிய கணம் முதல் நேற்று 27.07.15 வரை  எனது இடது கண் புருவம் தொடர்ந்து பலமாகத் துடித்தவண்ணம் இருந்தது.

ஏதோ நிகழப் போவதாக என்னுள் ஒரு உள்ளுணர்வு. 

எனினும் அது நல்லதாகவே இருக்க வேண்டும் என்றே எனது ஆழ்மனதுக்குச் சொல்லி வந்தேன்.

எனினும் நாம் விரும்பாதது நடந்தே விட்டது. அந்த மாமனிதரை இன்று ஒட்டுமொத்த தமிழ்ச்சமுதாயமும், பாரத மக்களும், உலகெங்கும் வாழும் மக்களும் இழந்து தவிக்கிறோம்.

அலைகள் தாலாட்டும் இராமேசுவரம் மண்ணில் இந்த மாமனிதரின் உடல் நாளை புதைக்கப்பட்டாலும், பாரத இளைஞர்களைக் கனவு காணுங்கள் என உறக்கம் தட்டி எழுப்பிய அவர்தம் கனவுகள் புதைக்கப்படப் போவதில்லை.

அவை விதைக்கப்படப் போகின்றன. அந்தக் கனவுகள் முளைத்து ஆல்போல் உயரும்போது இந்த உலகம் முழுமையும் அவர் விரும்பிய கனவுகள்படியே காட்சியளிக்கும்!

நல்லோர்களின் மரணங்கள் அவர்கள் வாழ்ந்த காலத்தில் நாம் வாழ்ந்ததற்காகப் பெருமிதம் கொள்ள வேண்டும் என்று இசுலாத்தில்கூட வாழ்ந்தவர்களின் மறைவைத் துக்கமாக அனுசரிப்பதில்லை!

மாமனிதர் கலாம் அவர்கள் பாரதி கனவு கண்ட அக்கினிக் குஞ்சு! வயது காரமாக இந்த அக்கினிக் குஞ்சு தன் உடலெனும் சிறகுகள் உதிர்த்து விண்ணில் பறந்து பிரபஞ்சப் பேராற்றலில் கலந்துவிட்டாலும் 

நம் பாரத இளைஞர்கள் குறிப்பாகத் தமிழ் இளைஞர்கள்  அவரின் இலட்சியத் தீயைத் தம் நெஞ்சில் சுமந்து பெருந்தீயெனப் பற்றிப் பரவி இந்த தேசம் முழுவதும் வெந்து தணிந்து புதுயுகம் மலரப் பாடுபட வேண்டும்.

அவர் நம் தமிழகம் எவ்வாறெல்லாம் வரும் காலத்தில் திகழ வேண்டும் என ஒரு நூலைப் படைக்கத் துவங்கி அது முடிவு பெறாத நிலையில் வெளிவந்தாலும் அதை முழுமையாக முடித்து வைக்கும் ஆற்றல் பெற்றவர்களாக நம் தமிழக இளைய சமுதாயம் திகழ வேண்டும்.

கலாம் அவர்கள் கண்ட கனவுகள் அனைத்தும் அவர் இலக்காகத் தீர்மானித்த வரும்  2020 ஆம் ஆண்டுக்குள் மெய்ப்படும் காலம் உருவாக்கப்பட வேண்டும்

கலாம் அவர்களின் மறைவு கேட்டு வாடும் உள்ளங்கள் அனைவருக்கும் எமது ஆழ்ந்த வருத்தங்களைப் பதிவு செய்கிறோம்!

கலாம் அவர்கள் காட்டிய வழியில் வழி நடப்போம் எனச் சூளுரைப்பதே நாம் அவருக்குச் செழுத்தும் மகத்தான அஞ்சலி என உறுதியேற்போம்!

மாமனிதர் கலாம் அவர்களின் புகழ் உலகம் உள்ளவரை வாழ்வாங்கு வாழும்!

புவிப்பந்தில் தமிழகம் உள்ளவரை என்றென்றும் வாழ்வாங்கு வாழும் கலாம் அவர்களின் நீடித்த புகழ்!

Read More...

புதன், 15 ஜூலை, 2015

பெருந்தலைவர் காமராசரின் பிறந்த நாள் வேண்டுகோள்!

Leave a Comment
ஏழைப் பங்காளர் என அழைக்கப்பட்ட,

தமிழத்தில் பாமர மக்களின் கல்விக் கண் திறந்த பெருந்தலைவர் காமராசரின் பிறந்த நாள் இன்று!

மாற்று இயக்கத்தவர்களும் போற்றிய இன்றும் போற்றுகின்ற ஒரே உத்தமத் தலைவர்!

பெருந்தலைவரை எமது மானசீகத் தலைவராக ஏற்ற வயது முதல் எளிமையான வாழ்க்கை முறையை அமைத்துக்கொண்டு இன்றுவரை வாழ முற்படுவதில் எனக்குள் ஏராளப் பெருமிதம் உண்டு!

ஏராளமான அதிகாரம் படைத்திருந்தும் மக்களோடு மக்களாகப் பழகி மக்களின் நலனுக்காகவே பாடுபட்ட அந்தத் தலைவரின் வழியில் நடப்பதாகச் சொல்லிக் கொள்ள வேண்டுமென்றால்

அவர் காட்டிய வழியில் மனசாட்சிக்குப் பயந்து உண்மையாக வாழ்பவருக்கே அந்தப் பெருமை உரித்தாகும்!

காமராசரின் வழி நடப்பதற்கே ஒரு தகுதி வேண்டும்!

அந்தளவிற்குத் தமிழத்தில் எளிமையாக வாழ்ந்து மறைந்தாலும் சரித்திரமாக என்றும் வாழும் தகுதிக்கு உரியவர் கருப்பு காந்தி காமராசர் மட:டுமே!

தமிழக இளைய சமுதாயம் இன்றைய கால கட்டத்தில் திரை நட்சத்திரங்கள், அரசியல் தலைவர்கள் என மக்களின் வியர்வையில் உருவான ஏராளமான செல்வத்தில் உல்லாசமாகத் திலைக்கும் பல்வேறு நபர்களைக் கண் மூடித்தனமாகத் தலைவர்களாக ஏற்று வாழ முற்படுகின்றனர்!

உல்லாசத் தலைவர்கள் அவர்தம் சொந்த நலன் தவிர்த்துத் தமிழக நலனுக்கு என்றுமே உறுதுணையாக இருக்கப்போவதில்லை!

இதை உணர்ந்து மாற்றம் விரும்பும் தமிழக இளைய சமுதாயத்திற்கு ஐந்தாம் தமிழ்ச்சங்கத்தின் சார்பாக வைக்கும் ஒரே வேண்டுகோள் இதுதாம்!

தமிழகத்தை உலகளவில் மதிக்கத்தக்க ஒரு நாடாகச் செய்ய ஏராளமான கனவுகளுடன் செயல்பட்ட காமராசரைக் காலம் ஏனோ நீண்ட வருடங்கள் வாழ அனுமதிக்கவே இல்லை!

காமராசரைத் தமிழகம் இழந்ததுகூட

வாய்மை தோற்றுப் போனால் பொய்மை எவ்வாறெல்லாம் தலையெடுத்து ஆடும் என்பதை

தமிழக மக்கள் அனுபவித்துத் தெளிந்து

நல்லவர்கள் மீண்டும் ஆளும் நிலை உருவாகாதா என ஏங்கும் நிலையை அடைய நேரிடும் என எச்சரிக்கவேதாம்!

எனவே தமிழக இளைய சமுதாயம் தாங்கள் தற்பொழுது பின்பற்றி வரும் தலைவர்களைச் ஒரேயடியாக வரும் ஆடிப்பதினெட்டுடன் தலை முழுகி மறந்துவிட்டு

கண்காணாத தெய்வமாக வானுலகில் உறைந்து வாழும் காமராசரைத் தமிழகத்தை வாழ்விக்க வந்த கடவுளாகக் கருதி

அவரையே மானசீகத் தலைவராகக் கொண்டு அவர் வழியில் எளிமையாக வாழத் துவங்கி

காமராசரைத் தமிழகம் உள்ளவரை மறவாத தமிழ் நெஞ்சங்கள் எடுக்க வேண்டிய சபதமாக


வரும் இரண்டாயிரத்துப் பதினாராம் ஆண்டில்
போலியான அரசியல்வாதிகளைப் புறமுதுகிட்டோடச் செய்து

கர்ம வீரர் காமராசர் கனவு கண்ட உலகை ஆளும் தமிழகம் உருவாக

தமிழகத்தில் பாமரர்களும் ஆட்சிக்கு வந்து நன்மைகள் செய்வதற்கு வசதியாக

பணம் படைத்த அரசியல்வாதிகளை தேர்தல் களத்தில் மண் கவ்வச் செய்து

செல்வாக்கற்ற வசதியற்ற எளிமையான பாமரர்களும் ஆட்சிக்கு வரும் நிலையை ஏற்படுத்த

காசுக்கு வேசியாகி விலை போகாத தன்மானமிக்க ஓட்டு வங்கி படைத்த ஏராளமான காமராசர்கள் நிறைந்த தமிழகமாக மாறி,

கர்மவீரர் கனவு கண்ட உன்னதத் தமிழகம் உருவாக இளைய சமுதாயம் முன்வர வேண்டுமென்பதே

கர்மவீரரின் பாதம் பணிந்து அவர்தம் இந்த இனிய பிறந்த நாளில் ஐந்தாம் தமிழ்ச்சங்கத்தின் சார்பாக விடுக்கும் வேண்டுகோள்!

Read More...

செவ்வாய், 14 ஜூலை, 2015

தமிழ்த் திரையுலகிற்கு ஏற்பட்டுள்ள மகத்தான இழப்பு

Leave a Comment
தமிழ்த்திரையுலகில் ஆதிக்கம் செழுத்திய பாரம்பரிய கருநாடக இசையைப் பின்னுக்குத் தள்ளி

மேற்கத்திய இசைக் கருவிகள் துணை கொண்டு மெல்லிசையைத் தமிழ்த் திரையுலகிற்கு அறிமுகம் செய்வித்து

இசை சாம்ராஜ்ஜியம் நடத்தி வந்த திருமிகு எம் எஸ் விசுவநாதன் அவர்களின் இழப்பு தமிழ்த் திரையுலகிற்கு ஏற்பட்டுள்ள மகத்தான இழப்பேயானாலும்

அன்னார் வயோதிகம் காரணமாகத் தம் இன்னுயிர் நீத்து அவர்தம் உடல் இந்த மண்ணில் புதைக்கப்பட்டாலும்

அவர் உயிர் விதையாக முளைத்து மீண்டும் பிறப்பெடுத்து தமிழிசையை உலகெங்கும் பரவச் செய்வார் என்ற நம்பிக்கைகளுடன்

அவர்தம் உறவினர்களுக்கும் மெல்லிசை மன்னரின் இசை அபிமானிகளுக்கும் ஐந்தாம் தமிழ்ச்சங்கத்தின் சார்பாக ஆழ்ந்த இரங்கல்களைத் தெரிவித்துக் கொள்கிறோம்.
Read More...

புதன், 8 ஜூலை, 2015

தமிழகத்தில் மின்சார இலாகாவில் இலட்சம் கோடிகளில் ஊழல்!

Leave a Comment
தமிழகத்தில் மின்சார இலாகாவில் இலட்சம் கோடிகளில் ஊழல் நடைபெற்றுள்ளதாக எதிர்க்கட்சியும், முன்பே இவர்கள் ஆட்சியில் பெரும் கொள்ளை நடந்திருப்பதாக ஆளும் கட்சியினரும் மாறி மாறிக் குற்றச்சாட்டுகளை அள்ளி வீசுகின்றனர்.

குடிசை வீடுகளுக்கு இலவசம் என அறிவித்து நடுத்தர மக்களின் பயன்பாட்டில் உபயோகத்திற்கு ஏற்பக் கட்டணம் எனப் பகற்கொள்ளை அடித்தும், சததமின்றித் தங்களின் இயக்கப் பொதுக்கூட்டங்களுக்குத் தேவைப்படும் மின்சாரத்தைக் கொக்கி போட்டுத் திருடும் சுயநல அரசியல்வாதிகள் இன்றுவரை ஒன்றை மட்டும் ஏன் புரிந்துகொள்ள மறுக்கின்றனர் என்பதுதாம் எம்போன்ற பாமரர்களுக்கு இன்னும் விளங்கவே இல்லை!

கோடி கோடியாகக் கொள்ளையிட்டு வாழ்ந்தாலும் ஒரு நாள் அந்த கொள்ளையிட்ட மனிதன் மரணத்தைத் தழுவ வேண்டிய நிலை வரும். 

அப்போது அந்த மனிதனின் உடலில் போர்த்தப்படுவது பிறந்த வீடு புகுந்த வீடு என்ற இரண்டு இடத்துத் துணிக் கோடி மட்டும்தாம்! 

இதுதான் தமிழினம் ஒரு மனிதனின் வாழ்க்கையை மிக எளிதாக விளங்க வைக்கச் செய்த தத்துவ விளக்கம்.

சுடுகாடு போகின்ற உடம்பு இந்த இரு கோடிகளுடன் போகிறது! அதுவரை அந்த உடம்பு கொள்ளையிட்ட கோடிகளை அவர்தம் வாரிசுகள் அனுபவிக்கலாம்! 

அவர்களும் ஒரு நாள் சுடுகாடு போகவேண்டிய நிலை வரும்! அவர்களுக்கும் இரண்டே இரண்டு கோடி எனப்படும் கோடித்துணிதான்!

ஒரு மனிதன் வாழும்போது அவனது வசதி கண்டு முகத்தின் முன்பு வாழ்த்திப் பேசுவதும், முதுகிற்குப் பின்னர் ஏசிப் பேசுவதும்தான் பொது வாழ்க்கைக்கு அழகென்றால் அப்படி ஒரு கேவலமான பொது வாழ்க்கை வாழ்ந்து என்ன பயன்?

வாழ்ந்தால் தன் இறப்பிற்குப் பிறகும் பெயர் சொல்லும்படி வாழும் காமராசரைப்போல வாழ வேண்டும்! 

அவர் போல எம் போன்றவர்களுக்கு பொது வாழ்க்கையில் வாழ வக்கில்லையென்றாலும் இயல்பு வாழ்க்கையிலாவது கடைப் பிடித்து வாழ முயல்கிறோம்!

அடுத்தவர் வியர்வையில் கோடிகளில் வாழ்ந்து சாவதை விடச் சொந்த வியர்வையில் வாழ்ந்து சுடுகாடு போகும்போது போடப்படும் இரண்டு கோடிகளே எமக்குப் போதும் என்ற மன நிறைவுடன் 

கோடிகளில் புரளும் ஏமாற்றுப் பேர்வழிகளின் பரிதாபகரமான கடைசிக் கால வாழ்க்கை எப்படி இருக்கும் என்பதைத் தீர்க்க தரிசியாக வருங்காலம் கணித்துக் கவியரசர் கண்ணதாசன் அவர்கள்  

(காசுக்காக எழுதியகாகச் சொல்லப்பட்டாலும் ஒரு பகுத்தறிவுவாதியாக அர்த்தமற்ற இந்து மதம் இரண்டு பாகங்களையும் நான் வாங்கிப் படித்துப் பாதுகாத்து வருகிறேன்) 

நிகழ்காலத்திலும் எழுத்துச் சாட்சியமாக விளங்கும் அவர்தம்  அர்த்தமுள்ள இந்துமதம் பத்தாம் பாகத்தின் கடைசிப் பக்கங்களை மீண்டும் ஒருமுறை படித்துப் பார்க்கத்தான் இப்போதைக்கு எம்மால் இயலும்!

Read More...

மரங்களைக் காப்போம்! வெப்பக் கொடுமையிலிருந்து மீள்வோம்!

Leave a Comment
ஈரோட்டில் சத்தி சாலை மற்றும் இரயில் நிலையச் சாலை இரண்டிலும் இரண்டு எடை மேடை நிலையங்கள் செயல்படுகின்றன

இந்த இரு எடை நிலையங்களிலும் அதிகாலையில் சுமார் முப்பதிற்கும் மேற்பட்ட கனரக வாகனங்களில் ஈரோட்டில் அமைந்துள்ள பல்வேறு ஆலைகளுக்கு எரிபொருள் தேவைக்கென இரண்டு ஆட்கள் கட்டிப்பிடிக்க இயலாத அளவிற்கு தடித்த அடிப்பகுதி உடைய மரங்கள் உட்பட ஏராளமான மரங்கள் அடியோடு வெட்டி வரப்படுகின்றன!

நாள்தோறும் தவறாமல் இவ்வாறு வெட்டி வரப்படும் மரங்கள் பெரும்பாலும் மழை வளம் குன்றிய மணப்பாறை போன்ற ஊர்களிலிருந்துதாம் வருகின்றன.

தினமும் ஏராளமான அளவில் ஒரு நகருக்கே இவ்வளவு வாகனங்களில் விறகுகளுக்கென வெட்டி வரப்படும் மரங்களின் சராசரி அளவினை தமிழக அளவில் கணக்கிட்டால் தலை சுற்றி மயக்கமேற்படும் நிலை உருவாகிறது.

இது போன்று வெட்டி வரப்படும் மரங்கள் வனத்துறையின் கண்காணிப்பில் உள்ளதா என்பதும் தெரியவில்லை.

ஏராளமான அளவில் தமிழகமெங்கும் இவ்வாறு வெ;ட்டப்படும் மரங்களை நாம் இழப்பதால் ஓரு பக்கம் ஆக்சிஜன் இழப்பும், மழை வள இழப்பும், மனிதர்கள் மற்றும் கால்நடைகளுக்குத் தினசரி அவசியமான நிழல் இழப்பு என ஏராளமும், மறு பக்கம் இவைகளை எரிப்பதால் ஏற்படும் சுற்றுச் சூழல் மாசுபாடும் கவலை தருவதாக உள்ளது.

இவ்வாறு வரும் வாகனங்களில் தமிழகமெங்கும் நிலத்தடி நீரை சத்தமின்றி எடுத்துப் பயனின்றி வளரும் விவசாய முள் மரம் எனவும் வேலி மரம் எனவும் அழைக்கப்படும் மரங்கள் ஏதேனும் ஒன்றிரண்டு வாகனங்களில் மட்டுமே அரிதாக வெட்டி வரப்படுவது மட்டுமே எம் போன்று வன ஆர்வலர்களுக்கு ஆறுதல் தருவதாக உள்ளது.

வனத்துறையினரும் சுற்றுச்சூழல் அலுவலர்களும் இது போன்று வெட்டி வரப்படும் மரங்களின் எண்ணிக்கையை மட்டுப்படுத்த பின்வரும் வழி முறைகளைக் கடுமையாகப் பின்பற்றினால் மட்டுமே தமிழகம் பாலை நிலமாக மாறுவதிலிருந்து தப்பிக்க இயலும்

முதலாவதாக இது போன்று எரிபொருள் தேவை உள்ள ஆலைகளை சூரிய ஆற்றலைப் பயன்படுத்தி அவர்களுக்குத் தேவைப்படும் வெப்ப ஆற்றலைப் பெறத் தேவையான நடவடிக்கைகளை மேற்கொள்ள வேண்டும்.

குறிப்பாக ஈரோட்டில் சாய ஆலைகள், மற்றும் நூல் தொழில் தொடர்பான ஆலைகளின் தண்ணீர்க் கொதிகலன்களை எரிப்பதற்காகத்தான் இங்கு வெட்டி வரப்படும் மரங்கள் எரி பொருளாகின்றன.

இரண்டாவதாக இது போன்று கனரக வாகனங்களில் வெட்டப்பட்டு கொண்டுவரப்படும் பயனள்ள மரங்களை வெட்டுவதை சட்ட விரோதமென அறிவித்து அந்த வாகனங்களின் உரிமங்கள் இரத்து செய்யப்படும் என அறிவிக்கலாம்.

விவசாய முள் மரம் போன்ற தமிழகத்திற்கு அவசியமற்ற மரங்களையும் பட்டுப்போய் பயனற்றுப்போன மரங்களை மட்டுமே வெட்டுவதற்கும் எரிபொருள் தேவைக்கும் கமிழகம் எங்கும் உள்ள ஆலைகளுக்கு அனுமதிக்க முடியும் எனச் சட்டமியற்றி கடுமையாக்கினால்

தமிழக நிலங்களை வெகுவாக ஆக்கிரமித்து நீர் சுரண்டும் இது போன்ற விச மரங்கள் ஒரேயடியாகத் தொலைந்து தமிழகம் பாலைவனமாவதிலிருந்து மீண்டு சோலை வனமாவதற்குச் சற்றேனும் வழி பிறக்கும்.

மேலும் காற்று மழை காரணமாகவோ வேறு வகையிலோ ஒரு மரம் சாய்ந்து விட்டால் அதை அப்புறப்படுத்துகிறோம் என்ற போர்வையில் துண்டு துண்டாக வெட்டி விறகாக்குவதை இனி அனுமதிக்காமல் அவற்றை வெளி நாடுகளில் உள்ளது போன்று வேறோடு மீட்டு மீண்டும் நட்டு அதன் ஆயுள் காலம் நீள்வதற்கான வழிமுறைகளை ஏற்படுத்த வேண்டும்.

மீறி வெட்டி விறகாக்கும் நபர்களுக்கு ஆயிரக்கணக்கான ரூபாய்கள் அபராதம் விதித்தால் வீட்டு அழகைத் தடுப்பதாகக் கருதி அவற்றை வெட்டும் சுயநலவாதிகள் பயப்படும் நிலை உருவாகும்.

சிக்னலில் பாதசாரிகள் கடப்பதற்கென அமைக்கப்பட்டுள்ள இடத்திலும் தங்களின் வாகனங்களை நிறுத்தி சாலைவிதிகளை காற்றில் பறக்கவிடும் இருசக்கர வாகன ஓட்டிகள் ஈரோடு மாவட்ட ஆட்சியர் அலுவலகம் அருகே அமைந்துள்ள சிக்னலில் மட்டும் குறிப்பாகப் பெருந்துறை நோக்கிப் பயணிப்பவர்கள் பத்தடி முன்பாகவே இடது புறம் தள்ளி ஓரமாகத்தான் நின்று செல்வர்.

இதற்குக் காரணம் அந்த இடத்தில் கடும் வெயிலின் தாக்கத்தைத் தவிர்க்க ஒரே ஒரு உயர்ந்த மரம் நிழல் பரப்பி நிற்பதுதாம். நிழலின் அருமை வெய்யிலில் தெரியும் என்ற பழமொழிக்குரிய உண்மையான விளக்கத்தை நான் இந்த இடத்தில்தான் உண்மையாகப் புரிந்து கொண்டேன்.

ஆண்டுக்கு ஆண்டு அதிகரித்து வரும் வெப்பத்திற்குக் காரணம் தமிழகத்தில் இது போன்று வெட்டப்படும் மரங்களால் வன அடர்த்தி குறைவதால்தான்.

ஒரு மரம் வளர்ந்து ஆளாகி மக்களுக்குப் பயனளித்துக் கொண்டிருப்பது வருடக்கணக்கில். ஆனால் ஒரே நாளில் அதனை வெட்டி வீழ்த்தி விறகாக்குவது இனியும் தொடர வேண்டுமா?

சுற்றுச் சூழல் பாதிக்கப்படுவதை விரும்பாதவர்கள் இதனை மற்றவர்களுக்கும் பகிர்ந்து கொள்வார்கள் என்ற நம்பிக்கையுடனும் வனத்துறையும் சுற்றுச்சூழல் துறையும் இனியாவது தமிழகம் வளமுறத் தங்களின் பங்களிப்பினை நல்குவார்கள் என்ற நம்பிக்கையுடனும் மரங்களைக் காப்போம் வெப்பக் கொடுமையிலிருந்து மீள்வோம்!

Read More...

செவ்வாய், 7 ஜூலை, 2015

அழைத்தவர் குரலுக்கு வருவோம்!

Leave a Comment

அழைத்தவர் குரலுக்கு வருவேன் என்றார் கீதையிலே கண்ணன். வைணவனாகப் பிறந்ததாலே என்னவோ அவரின் வரிகளை இன்று வரை எங்கள் குடும்பம் பின்பற்றி வருகிறது.

நாங்கள் வணிகத்திற்கென சொந்த ஊரை விட்டு வேற்றூர் சென்று நிரந்தரமாகக் குடியேற வேண்டிய நிலையேற்பட்டது.

எங்கள் சொந்த ஊரிலிருந்து நாங்கள் குடியேறிய ஊர் சுமார் 70 கல் தொலைவில் இருந்தது. தொலைபேசி வசதிகள் துவங்கியிருந்த காலம் அது.

எங்கள் உறவினர்கள் தங்களின் குடும்பத் திருமணம் போன்றவற்றிற்கு எங்களை அழைக்க வேண்டுமென்றால் எங்கள் ஒரு குடும்பத்திற்காகவே இவ்வளவு தொலைவு வர வேண்டும். 

இரத்த உறவு சம்பந்தப்பட்டவர்கள் தவிர மற்றவர்களையும் குறிப்பாக வசதி குறைந்த குடும்பத்தவர்களை எனது தந்தை முடிந்தவரை ஒரு தொலைபேசி அழைப்பில் தெரிவித்தாலே நாங்கள் உங்கள் குடும்ப நிகழ்வுகளில் கலந்து கொள்வோம் எனத் தெரிவித்து அவர்களின் சிரமத்தைக் குறைப்பார். 

துக்க காரியமென்றால் தொலைபேசியில் தகவல் தெரிவித்தாலே உடனடியாக எங்கள் குடும்பத்தில் உள்ள அனைவருமே சென்றுவிடுவோம்.

எனது தந்தையிடமிருந்து பிரிந்து நான் மேலும் இருபது கல் தொலைவிலிருந்த வேறு நகருக்கு வணிகம் செய்யச் சென்றபின் எனது தந்தையை அழைக்க வருபவர்கள் அங்கிருந்து எனது தந்தையின் தொலைபேசியில் என்னைத் தொடர்பு கொண்டு என்னையும் அழைக்க நான் குடியிருக்கும் நகருக்கு வரவா என்பார்கள். 

நான் உடனே நீங்கள் சிரமப்பட்டு என் ஒருவனுக்காக இங்கு வர வேண்டாம். தொலைபேசியில் அழைத்ததே போதும். திருணம் உட்பட எதற்கும் அழைப்பிதழ் கொடுத்து என்னை அழைக்க வேண்டிய கட்டாயம் ஏதுமில்லை. நாங்கள் கட்டாயம் உங்கள் குடும்ப நிகழ்ச்சியில் கலந்து கொள்வோம் என உறுதியளித்து அவர்களின் குடும்ப நிகழ்ச்சிகளில் எனது குடும்பத்துடன் சென்று கலந்து கொள்வேன்.

எனது மனைவி வழி உறவுகள் என் மனைவியை மட்டும் தொலைபேசியில் தொடர்பு கொண்டு அழைத்தாலும், எனது உறவுகள் என்னை மட்டும் தொலைபேசியில் தொடர்பு கொண்டு அழைத்தாலும் தவிர்க்க இயலாத காரணங்கள் தவிர நாங்கள் கட்டாயம் அழைத்தவர்களின் நிகழ்ச்சிகளில் கலந்து கொள்வோம்.

திருமணம் உள்ளிட்ட பல நிகழ்ச்சிகளில் நாங்கள் அழைப்பிதழ் பெறாமல் வெறும் தொலைபேசி அழைப்பை மட்டுமே ஏற்றுக் கலந்து கொண்டவைதாம் ஏராளம். 

எனது சொந்த ஊர் உறவினர்களின் துக்க நிகழ்வுகளில் மட்டும் எனக்கு எதற்கு வீண் சிரமம் எனக் கருதி எனக்குத் தகவல் தராமல் எனது குடும்ப உறவுகள் மட்டுமே கலந்து கொண்டு எனக்கு பல மாதங்கள் கழிந்து அந்தத் தகவல் தெரிய வருவதால் இதற்கென எனது உறவுகளிடம் நாள் கடந்து துக்கம் விசாரிக்க இயலாத நிலை  ஏற்படுவதைத்தாம் எங்களால் இதுவரை தவிர்க்க இயலவில்லை.

தொலை தொடர்பு வசதிகள் ஏராளம் பெருகிவிட்ட காலகட்டம் இது. திருமண அழைப்பிதழைக்கூட இன்று ஒரு செல்பேசியில் அனுப்பிப் பார்க்க முடிகின்ற அதி நவீன வசதிகள் கொண்ட விஞ்ஞான காலம் இது.

உறவை விட்டுத் தனித்தனியே பிரிந்து வாழும் எல்லோரையும் அவரவர் இருப்பிடம் சென்றே அழைக்க வேண்டும் என்ற கட்டாயத்தால் ஏற்படும் சிரமங்களை நன்கு புரிந்தவர்கள் நாங்கள். 

நேரில் வந்து அழைக்க வேண்டும், என்னை அழைப்பவர்கள் எனது துணைவியையும் அழைக்க வேண்டும் என்ற அற்பமான எதிர்பார்ப்புகளைப் புறம் தள்ளி அழைப்பவர்களின் சிரமங்களை உணர்ந்து இப்பொழுதும்கூட எங்கள் ஒருவருக்காக மட்டும் அழைக்க நேரில் வருபவர்களை சிரமப்பட வேண்டாம் என அறிவுறுத்தி இன்றுவரை ஒரு தொலைபேசி அழைப்பினை மட்டுமே ஏற்று உறவுகள் சிறக்க வாழ்ந்து வருகிறோம். இனியும் இப்படியே வாழ்வோம்.

இன்னும் சொல்லப்போனால் எனது தந்தையுடன் ஏற்பட்ட வணிகக் கருத்து வேறுபாடுகள் காரணமாக ஒருசில உறவுகள் எங்கள் குடும்பத்தை அவர்தம் குடும்ப நிகழ்வுகளுக்கு அழைப்பதில்லை. 

எனது தந்தை மனம் வேதனைப்படுமே என்பதற்காகவே நான் அந்த நிகழ்வுகளைத் தவிர்த்தேனே தவிர என் தந்தை உயிரோடிருந்தபோது அனுமதித்திருந்தால் அழையா விருந்தாளியாகக்கூட அந்த நிகழ்வுகளில் கலந்து கொள்ள முற்பட்டிருப்பேன். 

இது போன்ற நிகழ்வுகளில் கலந்து கொண்டு அழையா விருந்தாளியாகி அவமானப்பட நேர்ந்தாலும் பிறப்பெடுத்தபோது இருந்து வணிகக் காரணங்களால் தொடர்பற்றுப் பிரிந்துபோன உறவுகளையும் வாழ்வாங்கு வாழவேண்டுமென வாழ்த்துவதுதான் எனது உன்னதமான நோக்கமே தவிர விருந்துண்டு வருவதல்ல என்பதையும் இங்கு குறிப்பிட்டே தீரவேண்டும்!


Read More...