திங்கள், 7 மார்ச், 2016

மார்ச் 8 உலக பெண்கள் தினம்.

Leave a Comment
தமிழ்த்திரு நாடு தன்னைப் பெற்ற தாயென்று கும்பிடடி பாப்பா என்று பெண்மையைப் போற்றிய பாரதி நாடும் தாயும் போற்றுதலுக்கு உரியவர்கள் எனத் தம் கவிகளால் முழங்கியவர்.

பாரதி கண்ட புதுமைப் பெண்களென நம் பாரத தேசத்திலும் தமிழகத்திலும் ஏராளமான புதுமைப் பெண்கள் வலம் வந்தாலும், 

நம் நாட்டில் இன்னும் பெண்ணடிமை, பெண்களைக் கேலிப் பொருளாக்குதல், வன்கொடுமைக்கு ஆளாக்குதல், பெண்களை மூடத்தன்மையில் புகுத்திவைத்து சாமியார்கள் கூட்டம் காசு பார்ப்பது, என ஏராளமான பழமையான பிற்போக்குத் தனங்கள் இன்னும் குறையவே இல்லை என்பதுதாம் வேதனைக்குரியது. 

வரதட்சணைக் கொடுமைகள், பெண்களைத் துயரத்தில் ஆழ்த்தி வைக்கும் மதுபோதைக் கலாச்சாரம், நகையும், பணமுமே வாழ்க்கை என்று தவறான கண்ணோட்டத்தில் பெண்கள் வழி நடத்தப்படுதல், பெண் சிசுக் கொலைகள், பெண்களுக்கு இன்றுவரை சரிக்குச் சமமான இட ஒதுக்கீடு இன்மை, என ஏராளமான அடக்குமுறைகளைப் பெண் சமுதாயம் இன்றுவரை சந்தித்து வந்துள்ளது என்பதை விடச் சகித்து வந்துள்ளது எனவே கருதலாம்.

எந்தப் பெண்ணைக் கண்டாலும் தன் பாட்டியாக, தாயாக, சகோதரியாக, தங்கையாக, மகளாக அந்தந்த வயதிற்குரிய மரியாதையினை ஆண்கள் மதித்து வழங்கிடவும், பெண் இல்லாத உலகம் ஒரு உலகமே இல்லை என்பதை நினைந்தும்

தன்னைத் திருமணம் செய்து கொண்டு தங்களைப் போன்று எனக்கு ஒரு குழந்தை தாருங்கள் என வேண்டிய ஒரு பெண்ணிடம் அதற்கு எத்தனை ஆண்டுகள் நீங்கள் ஏன் காத்திருக்க வேண்டும் இதோ இன்று இந்த நிமிடம் முதல் என்னை உங்கள் மகனாக நினைத்துக்கொள்ளுங்கள் தாயே என்று தாய்மையின் சிறப்பை உலகிற்கு இயம்பிய விவேகானந்தரும், 

அண்ணல் காந்தியும், தந்தை பெரியாரும், மகாகவி பாரதியும், இன்னும் பெண்களுக்கெனப் போராடிய இன்னும் போராடி வரும் அனைவருக்கும் எமது மனமார்ந்த நன்றிகளை வழங்கி,

உலகெங்குமுள்ள பெண்கள் அனைவரும், துயரின்றி, ஆணுக்குப் பெண் சரிநிகர்ச் சமானமெனும் பாரதியின் அமுதமொழிக்கேற்ப வாழ்வின் அனைத்து வளங்களும் பெற்று வாழ்வாங்கு வாழப் பிரபஞ்சப் பேராற்றல் துணை நிற்க வேண்டுமென ஐந்தாம் தமிழ்ச்சங்கத்தின் சார்பாக இதயம் நிறைந்து வேண்டுகிறேன். 
Read More...

புதிய துறைகள்!

Leave a Comment
ஆறுகள், குளங்கள், ஏரிகள், வாய்க்கால்கள், கால்வாய்கள், கண்மாய்கள், ஊருணிகள், அனைத்தையும் பராமரிப்பதற்கும், பாதுகாப்பதற்கும், 

கனிம வளங்கள், மணல், தாது மணல், என தமிழகத்திலுள்ள அனைத்து இயற்கை வளங்களும் சூறையாடப்படுவதைத் தடுக்கவும்,

விளை நிலங்கள், அரசின் புறம் போக்கு நிலங்கள், வனப் பகுதிகள், போன்றவை அரசியல் இயக்கங்களால் வளைக்கப்படுவதை தடுக்கவும்,

அரசு நிலங்களும், மக்களிடமிருந்து அரசின் திட்டங்களுக்கெனக் கையகப்படுத்தப்பட்ட நிலங்கள் இனி தனியாருக்கு விற்கப்படுவதைத் தவிர்க்கவும், தனியாரிடமுள்ள அரசு நிலங்கள் மீட்கப்படவும்,

சுற்றுச் சூழல் மாசுபடுவதைத் தவிர்க்கவும், சுற்றுச்சூழலுக்கு எதிரானவர்களைத் திருத்தி நல்வழிப்படுத்தவும், சுற்றுச்சூழல் பாதுகாக்கப்பட தனிமனிதப் பங்கினை மேம்படுத்தவும்,

இது போன்ற ஏராளமான நல்வழித் திட்டங்களுக்கென
புதிதாகத் துறைகள் ஏற்படுத்தப்படும். 

இந்தத் துறைகளில் ஆட்சியாளர்கள், அரசியல்வாதிகள் என எவருமே அங்கம் வகிக்க அனுமதிக்கப்பட மாட்டார்கள். 

முழுக்க முழுக்க அந்தந்தப் பகுதி மக்களின் நேரடிக் கட்டுப்பாட்டில் , வெளிப்படையான நிர்வாகத்துடன், மக்களுக்கெனப் பாடுபடும் உண்மையான சாதிமத பேதமற்ற மக்கள்நலத் தொண்டர்கள் மட்டுமே நிறைந்த ஒரு மகத்தான துறைகளாக இவை இனி திகழும்.

ஊழலுக்கு முடிவு கட்ட வேண்டுமெனில் முதலில் ஊழல் நிர்வாகங்களுக்கு முடிவு கட்ட வேண்டும்.

எனவே இனி ஒரு விதி செய்வோம். அதனை எந்த நாளும் காப்போம்.

Read More...

சனி, 5 மார்ச், 2016

இனி ஒரு விதி செய்வோம். இது சுயேட்சைகளின் வெற்றிக் கொண்டாட்ட காலம்.

Leave a Comment
இந்த சட்டமன்றத் தேர்தலில் நீங்கள் ஊழல் இயக்கங்களுக்கு எதிராக, இதுவரை அவர்களிடம் ஒட்டிக்கொண்டிருந்துவிட்டு இப்பொழுது நல்லவர்களாகத் தங்களை அறிவித்துக் கொள்ளும் பச்சோந்தி குண அரசியல்வாதிகளுக்கு எதிராக வாக்களிக்க உள்ளவரா? 

தேர்தல் நேரத்தில் முளைக்கும் காளான் இயக்கங்களின் பசப்புரைகள் நம்பி உங்கள் வாக்கை இவர்களுக்கும் அளித்து வீணாக்கிவிடாதீர்கள். மக்களின் பலவீன மனநிலையைத் தங்களுக்குச் சாதகமாக மடை திருப்பி அரசியல் ஆதாயம் அடையத் துடிக்கும் புதிய அரசியல் வணிகக்கூட்டங்கள் இவை. ஏனெனில் இவர்கள் தேர்தல் நேரத்தில் இப்பொழுது முளைத்த காளான்கள், தேர்தலுக்குப் பிறகு இவர்கள் காணாமலும் போகக்கூடும். 

தேர்தல் ஆணையம் ஒதுக்கியுள்ள நோடோவிலும் வாக்களிக்காதீர்கள். நான்கூட முன்பு நோடோவில் வாக்களிக்க முடிவு செய்திருந்தேன். ஆனால் நோடோவுக்கு குறைவான வாக்குகளே முந்தைய தேர்தலில் விழுந்திருந்தன. எனவே நாம் நம்முடைய மனநிலையை மாற்றிக்கொள்வோம்.

உங்கள் தொகுதியில் நிற்கும் சுயேட்சைகள் உட்பட அனைத்து இயக்கங்களின் பிரதிநிதிகளின் பணபலம், அவர்களிடம் உள்ள குணநலன்கள், மக்களுக்கு இதுவரை அவர்கள் ஆற்றியுள்ள தொண்டுகள், அரசியலுக்கு வந்து சொத்து சேர்த்தவரா, சாதி மத அரசியல்வாதியா, வாக்களித்தபிறகு மக்களை மதிப்பவரா, அல்லது மிதிப்பவரா, என ஆயிரக்கணக்கான சந்தேகங்களை முன்வைத்து அவர்களை அலசி ஆராயுங்கள்.

நீங்கள் எதிர்பார்க்கும் ஒரு நல்லவரேனும் உங்கள் மனதில் பட்டால் அவர் சுயேட்சையாக இருந்தாலும் அவருக்கே உங்கள் வாக்குகளைச் செழுத்துங்கள்.

வரும் தேர்தல் ஊழலுக்கும், மக்களுக்கும் நடக்கும் நேரடி யுத்தம். 
இந்த யுத்தத்தில் ஊழல் இயக்கங்கள் மட்டுமல்ல இதுவரை ஊழல் இயக்கங்களுடன் கைகோர்த்திருந்த அனைத்து இயக்கங்களும் மண் கவ்வ வேண்டும்.

ஊழல் அரசியல் இயக்கங்கள் தோற்றால் மக்கள் வென்றதாக அர்த்தம். 

ஊழல் அரசியல் இயக்கங்கள் வென்றால் மக்கள் தோற்றதாக அர்த்தம்.

சுயேச்சைகளை இந்தத் தேர்தலில் வெற்றி பெறச் செய்வதன் வாயிலாகத் தமிழகம் தேர்தல் வரலாற்றில் புதிய உலக சாதனையை நிகழ்த்த வேண்டும்.

வேட்பு மனு தாக்கல் துவங்கியதிலிருந்து களத்தில் நிற்கும் வேட்பாளர்களை அலசித் தேர்வு செய்வோம். 

ஊழலுக்கும் ஊழல் இயக்கங்களுக்கும் இந்தத் தேர்தலுடன் முடிவு கட்டுவோம்.

ஊழலில் போட்டு குண்டும் குழியுமான சாலைகளிலும், ஊழல் பாதாளச் சாக்கடை திட்டத்திற்காகப் படு கேவலமாகிப்போன சாலைகளிலும், மந்தமாக நடக்கும் பாலங்களுக்காக குண்டும் குழியுமான மாற்று வழிகளில் ஐந்தாண்டுகள் நம் வாகனங்களோடு சேர்ந்து நம் முதுகொடிந்ததை கடைசிநேர ஊழல் சாலையில் பயணித்து மறந்துவிடக்கூடாது. இந்தச் சாலை அடுத்த மழைக்குக்கூடத் தாங்காது என்பதை மனதில் வைப்போம்.

நடக்கப்போகும் தமிழக சட்டமன்றத் தேர்தல் இலவசங்களுக்கு மயங்கி வல்லவர்களைத் தேர்ந்தெடுக்கும் யுத்த களமல்ல. 

நல்லவர்களைத் தேர்ந்தெடுக்கும் வாய்மைக் களம்.

தமிழக அரசின் முத்திரை வாக்கியம்தாம் வாய்மையே வெல்லும் என்பது.

இந்தத் தேர்தலில் வாய்மைதான் வெல்ல வேண்டும். 

பொய்மை வென்றால் தோற்கடிக்கப்பட்ட வாய்மையை மீண்டும் ஐந்தாண்டுகள் கழித்துத்தான் மீட்டெடுக்க முடியும். 

அதற்குள் நாமெல்லாம் அகதிகளாகத்தான் வேறு நாடுகளில் தஞ்சம் புக வேண்டியிருக்கும்.

நாம் இனி எப்படி வாழ வேண்டும்.  அகதிகளாகவா? அடிமைகளாகவா?

வாக்களிக்கும் முன் முடிவு செய்வோம். வாக்களித்துவிட்டு புலம்புதல் தவிர்ப்போம்.

Read More...

வெள்ளி, 4 மார்ச், 2016

குடிமைப் பொருட்கள் விநியோகம்!

Leave a Comment
நான் எனது 55ஆவது வயதில் தற்பொழுது செய்து கொண்டிருந்த வேலையை விட்டுவிட்டுச் சொந்தமாக வணிகம் செய்யலாம் என முடிவெடுத்து வேலையிலிருந்து விலகிவிட்டேன். வணிகம் துவக்குவதற்குத் தாமதமாவதால் தற்பொழுது வேலையின்றி இருக்கிறேன்.

இதுவரை எனது துணைவியார் குடிமைப் பொருட்கள் (அதாங்க ரேசன் பொருட்கள்) வாங்குவதற்காக விற்பனை அங்காடிக்குச்  சென்று வந்திருந்தார். வேலையின்றி இருப்பதால் குடிமைப் பொருட்கள் வாங்குவதற்காக அங்காடிக்கு நான் செல்லத் துவங்கினேன்.

மாதத்தின் முதல் நாள் துவங்கி அந்த வாரம் முழுவதும் அங்கு ஏராளமாக மக்கள் கூடியிருப்பர். குறிப்பாக அறுபது வயதைத் தாண்டிய முதிய  பெண்கள் அதிக எண்ணிக்கையிலும், வயதான ஆண்கள் குறைந்த எண்ணிக்கையிலும் வரிசையில் நிற்பர்.

வயதானவர்கள் என்பதால் பெரும்பாலானவர்கள் வயது மூப்பின் காரணமாக கடும் வெயிலில் வரிசையில் நிற்க இயலாமல் கடுமையான மன உலைச்சலுடன்தான் காணப்படுவர். 

இடையே காலை ஆறு மணிக்கே வந்ததாகவும், கடை திறக்காததால்  ஒன்பது மணிக்கு வீடு சென்று திரும்பி வந்தால் தன் இடத்தில் வேறு யாரோ நிற்கிறார்கள் என ஒரு 65 வயது பாட்டி அனைவரிடமும் சண்டையிட்டுக் கொண்டு கடை அலுவலரின் முன் சென்று தனக்கு முதலில் பில் போடு என்கிறார்.

இதைச்  சகித்துக் கொள்ளாத மற்ற முதிய பெண்கள் ஏக காலத்தில் கூச்சலிட கடை அலுவலர் கடுப்படைந்து அந்தப் பாட்டியின் குடிமைப் பொருள் அட்டையை ஒரு ஓரமாகப் போட்டுவிட்டு பில் போடத் துவங்கினார்.

பாட்டி விடாமல் பலவாறு திட்டிக் கொண்டே இருக்க பதிலுக்கு வரிசையில் நின்றவர்களும் கூச்சலிட்டவாறு இருந்தனர். ஒருவரை விட்டால் அடுத்தவரும் இதே போலத்தான் முண்டியடித்து முன்னே செல்ல முயற்சிப்பர். நாங்களும் காலையிலிருந்து கால் கடுக்க நிற்பவர்கள்தானே மேலும் இந்த பாட்டியிடம் மாதந்தோறும் இதே பிரச்சினைதான் என்ற அவர்களின் ஆதங்கமும் நியாயமானதாகவே பட்டது. நான் உட்பட அங்கிருந்த அனைவரும் மணிக்கணக்கில் வரிசையில் நின்றுதாம் பொருட்களை வாங்கவே முடிகிறது.

குடிமைப் பொருட்களை விநியோகிக்கும் மாதத் துவக்கத்தின் முதல் வாரத்தில் அடிக்கடி நிகழும் நிகழ்வு இது. இதைவிடக் கொடுமை இது போன்ற கடைகளில் மண் எண்ணை விநியோகமென்றால் காலை 9.30 மணிக்கு மேல் திறக்கப்படும் கடைக்காக அதிகாலை நான்கு மணிக்கே முதியவர்கள், குறிப்பாக பெண்கள் கடும் பனியிலும் முக்காடிட்டவாறு மண் எண்ணெய் கலன்களுடன் வரிசையில் அமர்ந்திருப்பதை பல முறை இந்த நேரத்தில் வீட்டுக்குத் தேவைப்படும் பால் வாங்கச் செல்லும்போது கண்டு அதிர்ச்சியுற்றிருக்கிறேன்.

கணவன் மனைவி வேலைக்குச் செல்லும் குடும்பத்தில் வேலையற்றிருக்கும் வயதானவர்களே பெரும்பாலும் குடிமைப் பொருட்கள் வாங்கி வர வேண்டியதென்ற கட்டாயம் நம் நாட்டில் சர்வ சாதாரணம். மேலும் சிறுவர்களைப் பள்ளிக்கு விடுமுறை அளிக்கச் சொல்லிவிட்டு இந்தக் கடைகளில் வரிசையில் நின்று குடிமைப் பொருட்கள் வாங்கி வரச் சொல்லும் பெற்றோரும் இதில் அடக்கம்.

நாட்டு மக்கள் தங்களின் ஆட்சியில் வளமுற்றிருப்பதாகப் பெருமைப்பட்டுக்கொள்ளும் ஆட்சியாளர்களில் ஒருவரேனும் இது போன்று குடிமைப் பொருட்கள் வாங்குவதற்கு வரிசையில் நின்று பார்த்தால்தான் அவர்களின் சிரமம் என்னவென்று புரியும்.

மேலும் மக்கள் வளமுற்றிருந்தால் குடிமைப் பொருட்கள் வாங்குவதற்கு ஏன் இவ்வாறு முண்டியடித்துக் கொண்டு பரிதாபமாகக் கடும் வெயிலில் மணிக்கணக்காகக் காத்திருக்க வேண்டும் என்ற கேள்வியும் இயல்பாக எவர் மனதிலும் தோன்றாதிருக்காது.

வெளிச்சந்தையைவிட இங்கு மலிவு விலையில் சில பொருட்கள் கிடைப்பதால் அவற்றை இழக்கக்கூடாது என்பது ஒரு காரணம். நமக்குத் தேவையற்ற மண்எண்ணை போன்றவற்றை அதிக விலைக்கு விற்பதால் அவற்றினால் கிடைக்கும் இலாபமும் மறு காரணம். 

வணிக உபயோகத்திற்கென நான் வாங்கிய ஒரு டிஜிட்டல் தராசில் கடந்த இரு மாதங்களாக அங்கு வாங்கிய பொருட்களின் அளவீட்டைச் சரி பார்த்தேன். ஒரு கிலோவிற்கு 100 கிராம் அளவு குறைவாக 900 கிராம்கள்தான் அவை எடை காட்டியது. அந்தக் கடையில் உள்ள டிஜிட்டல் தராசில் எடை போடுபவருக்கு மட்டுமே எடை தெரியுமாறும், மறுமுனையில் என்ன எடை என்பது தெரியாதவாறும் இருந்ததை நான் கடந்த மூன்று மாதங்களாகவே கவனித்துள்ளேன்.

கடை அலுவலர்கள் தவறு செய்கிறார்கள் என்பது நாடறிந்த உண்மை. இதில் ஒரு மகத்தான நெட்ஒர்க் முறையே உள்ளது. இந்த அலுவலர்கள் இவ்வாறு தவறு செய்யத் தூண்டப்பட்டு அவர்களின் மேல் உள்ளவர்களுக்கு மாதந்தோறும் இவ்வளவு கப்பம் கட்டவேண்டும் என்ற நிர்பந்தம். இது சங்கிலித் தொடர்போல மேலிடம் வரை செல்கிறது. மலிவு விலை விற்பனையிலும் மலிவான புத்தியுடன் நடந்து கொள்ளும் இவர்களின் நோக்கம் தவறான வழியில் வரும் செல்வத்தின் மீதுதானே.

ஒரு கடையில் சாதாரணமாக இருநூறு மக்கள் வாங்குகிறார்கள் என வைத்துக் கொள்வோம். ஆறுவிதமான பொருட்கள் விநியோகம் நடக்கிறது. ஓவ்வொன்றிலும் 100 கிராம் எனக் கொண்டால் 120 கிலோ அளவில் அந்தக் கடையில் மக்களுக்குக் குறைவாக விநியோகம் செய்யப்படுகிறது. நாடு முழுவதும் உள்ள கடைகளின் எண்ணிக்கையையும், குறைவு படும் எடை அளவையும் கணக்கிட்டால் தலை சுற்றி மயக்கம்தான் வரும்.

மிகுதியாகும் பொருட்களை இவர்கள் வெளிமார்க்கெட்டில் விற்பதைவிடச் சற்றுக் குறைவாக விற்று மேலுள்ளவர்களுக்குத் தேனெடுத்துப் புறங்கை சுவைத்துக் கப்பம் கட்டுவதாகப் பரவலாக மக்கள் பேசிக்கொள்வதை இந்தக் கடையிலேயே கண்டேன்.

மாதக் கடைசியில் ஓய்வாக வேலை பார்க்கும் ஒரே பணியாளர் வார முதல் நாட்களில் குடிமைப் பொருட்களை பில் செய்து பணம் வசூலித்தபின் எடை போட்டு விநியோகம் செய்வதில் உள்ள சிரமங்களை எழுதுவதற்கும் ஏராளமுண்டு. 

எனினும் குடிமைப் பொருட்களை வாங்கும் முதியோர்களின் சிரமங்களைக் குறைக்கவும் இங்கு நடைபெறும் ஊழல்களைத் தடுக்கவும் கீழ்க்கண்ட வழிகளைப் பின்பற்றினால் பொதுமக்களின் வயிற்றெரிச்சல் குறைவதுடன் பணியாளரின் வேலைச்சுமை குறைந்து இருதரப்பிலும் நிம்மதி பெற இயலும்.

முதலாவதாக எடை போட்டு விற்கப்படும் பொருட்களை இனி பொட்டலமிட்டுத்தான் விற்கும்படி செய்ய வேண்டும். இதனைச் செய்வதற்குப் புதிதாக வேலை வாய்ப்புகளை உருவாக்கினாலும் பரவாயில்லை. மேலும் பொட்டலமிடுவதால் சுற்றுச் சூழலுக்குக் கேடு விளைவிக்கும் பொட்டல முறையை மட்டும் கட்டாயம் தவிர்த்து மாற்று ஏற்பாடு காணவேண்டும். இதனால் எடை அளவுகளில் பணியாளர்கள் தவறு செய்வது அறவே தவிர்க்கப்பட்டு தாங்கள் எதுவும் ஆதாயம் அடைய இயலாததால் மேலுள்ளவர்களுக்குத் தாங்கள் கப்பம் ஏதும் கட்ட முடியாது என அவர்கள் இனி நெஞ்சம் நிமிர்ந்து சொல்லலாம்.

இரண்டாவதாக ஒரு கடையில் இருநூறு மக்கள் பொருட்கள் வாங்குகிறார்கள் என வைத்துக் கொள்வோம். இந்த இருநூறு மக்களையும் முதல் வாரத்தில் இந்த எண்கள் உள்ளவர்கள், இரண்டாவது வாரத்தில் இந்த எண்கள் உடைவர்கள், மூன்றாவது வாரத்தில் இந்த எண்கள் உடையவர்கள்தாம் என்பதாகவோ அல்லது மக்களுக்கென வழங்கப்பட்டுள்ள குடிமைப் பொருட்கள்  அட்டைகளின் தரத்திற்கேற்றவாறு இந்த நாளில் இந்த அட்டைக்குரிய மக்கள் என இனி தங்களின் பொருட்களை காலை முதல் மாலை வரை பெற்றுக் கொள்ளலாம் என நெறிப்படுத்த வேண்டும். 

அதே சமயம் மண்எண்ணை தவிர்த்து அனைத்து பொருட்களும் ஒரே தடவையில் அந்தந்த வாரத்தில் அனைவருக்கும் முழுமையாகக் கிடைக்கும் வகையில் பொருட்களை தருவித்து விநியோகம் செய்யத் தயாரான நிலையில் இருக்குமாறு பார்த்துக்கொள்ள வேண்டியது கடை ஊழியருடன் சம்பந்தப்பட்ட குடிமைப் பொருட்கள் வழங்குதுறையின் பொறுப்பாகவும் இருக்க வேண்டும்.

கணக்கு வழக்குகளை முடித்துவிட்டு அடுத்த மாதத்திற்குத் தேவையான பொருட்களை சேகரிக்கத் தேவைப்படும் கால அவகாசத்தை பணியாளருக்கு மாத இறுதியான நான்காவது வாரத்தில் வழங்கலாம். பெரும்பாலும் விற்பனைக்கே போகும் மண்எண்ணை விநியோகத்தை அரசு மாற்று ஏற்பாடுகள் வாயிலாக விற்பனை செய்யும் வழிகளைக் கண்டறிய வேண்டும். மக்களிடம் எதிர்ப்பிருப்பின் அதனை மாதத்தின் முதல் நாளிலோ அல்லது கடைசி நாளிலோ விநியோகம் செய்வது பற்றி முடிவெடுக்கலாம்.  

தங்களின் உழைப்பிற்கேற்ப அதிகளவு வருமானம் கிடைக்கும் வகையில் மக்கள் வாழ்கிறார்கள் என்றால் அது மக்களின் வாழ்க்கைத் தரத்தில் தன்னிறைவு பெற்ற ஒரு நாடாகத்தான் கருத முடியும். 

தன்னிறைவு பெற்ற ஒரு நாட்டில் இதுபோன்ற குடிமைப் பொருட்களை மலிவு விலையில் அரசிடம் எதிர்பார்க்காமல் தங்களின் மிகு வருமானத்தினால் மக்கள் அனைத்துத் தரப்பினரும் பொது வர்த்தகத்தின் வாயிலாகவே வாங்கும் சக்தி படைத்தவர்களாகத் திகழ்கிறார்கள் என்றுதான் கருதவேண்டும். 

அப்படி ஒரு நிலை உருவானால் வள்ளுவம் சுட்டியது போன்று இயற்கையே ஆட்சியாளர்களுக்குச் சாதகமாக இயல்பான முறையில் இயங்குகின்றது என்று அர்த்தம். 

ஆட்சியாளர்கள் மோசமாக இருந்தால்தான் வழக்கத்திற்கு மாறான வெள்ளம். புயல், வறட்சி, நோய், வறுமை, எனப் பல்வேறு மோசமான நிகழ்வுகள் அந்த நாட்டில் நடைபெறும். 

எந்தவகையான ஆட்சியாளர்கள் தேவை என்பதை மக்கள்தாம் இனிச் சிந்தித்துத் தேர்ந்தெடுக்க வேண்டும். 

நல்லவர்களைத் தேர்ந்தெடுத்தால் குடிமைப் பொருட்களை இலவசமாகவும், விலை மலிவாகவும் இங்கு வாங்க வேண்டிய அவசியமே இன்றி மக்களின் வாழ்க்கைத் தரம் உயர்வதற்குப் பாடுபடுபவர்களாகத்தாம் அவர்கள் திகழ்வார்கள் என்பது கனவானாலும் நனவாகப் போகும் உண்மை.

Read More...

செவ்வாய், 1 மார்ச், 2016

கட்டுமான ஒப்பந்தங்கள் இனி நூறாண்டுகால உத்தரவாதத்துடன் மட்டுமே.

Leave a Comment
கட்டுமான ஒப்பந்தங்கள் இனி நூறாண்டுகால உத்தரவாதத்துடன் மட்டுமே.

ஆயிரம் ஆண்டுகள் கடந்த நிலையிலும் உலகின் முதல் கிரானைட் கோயில் என்ற பெருமை பெரும் தஞ்சை பெரிய அரண்மனை ( இன்றைய பிரகதீசுவரர் கோயில் )

நூறாண்டுகள் கடந்த நிலையிலும் கம்பீரமாக நிற்கும் சென்னை எழும்பூர் இரயில் நிலையம் போன்று தமிழகமெங்கும் இன்றும் காலத்தை வென்ற நிலையில் கம்பீரமாகக் காட்சியளிக்கும் ஏராளமான வட்டாட்சியர் அலுவலக, வாய்மை மன்ற அலுவலக, அணைகள், பாலங்கள், இதர வெள்ளையர் காலக் கட்டுமானங்கள்.

இவையெல்லாம் ஊழலில்லாக் கட்டுமானத்திற்கு இன்றும் வலுவான சாட்சியங்கள்.

தமிழக்தில் இனி எந்தக் கட்டுமானமாயினும், அதன் ஒப்பந்ததாரர் அந்தக் கட்டுமானத்திற்கு எத்தனை ஆண்டுகள் உத்தரவாதம் தருவார் என்ற உறுதிமொழியுடன், 

தற்பொழுதுள்ள விலைகுறைவு ஒப்பந்தப் புள்ளிகளுக்குப் பதில் நீடித்த ஆண்டுகள் உத்தரவாதமுள்ள, அதிகவிலை ஒப்பந்தப் பணிகள் மட்டுமே விலைப்பட்டியல் கோரப்படும்.

கொடுத்த உத்தரவாதத்திலும் தரத்திலும் தவறு இழைக்கும் ஒப்பந்ததாரர்கள் தமிழகத்தில் இனி எவ்விதக் கட்டுமானத் தொழிலும் செய்ய இயலாத வண்ணம் சட்டமும், அவர்தம் கட்டுமான ஒப்பந்தத் தொகையைச் சொத்துக்களை கையகப்படுத்துதல் வாயிலாக மீட்கும் உரிமை அரசுக்கு உண்டென சட்டம் இயற்றுவோம்.

ஊழல் கட்டுமானங்களுக்கும் ஊழல் அரசியலுக்கும் நிரந்தர விடை கொடுப்போம்.
இனி ஒரு விதி செய்வோம். அதை எந்த நாளும் காப்போம்.

Read More...

திங்கள், 29 பிப்ரவரி, 2016

தேவை ஒரு சர்வாதிகாரமற்ற மக்களுக்கான அரசியல் இயக்கம்.

Leave a Comment
சர்வாதிகார தலைமையற்ற சுழற்சி முறை கொண்ட அரசியல் நிர்வாகிகள் நிறைந்த அரசியல் மாண்பு.

வாரிசுகளோ, உறவினர்களோ ஆதிக்கமற்ற அரசியல் கொள்கை,

ஐந்தாண்டுக்கொருமுறை சுழற்சி முறையில் நிர்வாகிகள் சனநாயக முறையில் வாக்களிக்கப்பட்டுத் தேர்ந்தெடுக்கப்பட்டு இயக்கப் பணியாற்றும் வாய்ப்பு.

ஒவ்வொரு கிளை, ஒன்றியம், வட்டம், மாவட்டம், என எங்கும் சாதி, மத பேதமற்ற வேற்று இன நிர்வாகிகள் கொண்ட சமத்துவ அரசியல் பண்பு,

ஆட்சி நிர்வாகத்தில் அணு அளவும் தலையிடாத ஒழுக்கம்,

இயக்கச் செயல்பாடுகளில் வெளிப்படைத் தன்மை,

தேர்தல் நிதி என மக்களிடமோ, மற்றவர்களிடமோ கையேந்தாமல் உறுப்பினர்களின் சொந்த நிதியில் செயல்படல்,

இன்னும் தேவைப்படும் ஏராளமான மாற்றங்களுடன் ஒரு மகத்தான அரசியல் இயக்கம் உருவாக்குவோம்.

பாரத தேசம் மட்டுமல்ல உலகிற்கே இந்த அரசியல் இயக்கம் ஒரு முன்னோடி இயக்கமாகத் திகழ வேண்டும்.

இந்த இயக்கத்தின் அப்பழுக்கற்ற மக்கள் தொண்டெனும் உயரிய தன்மையால்

இன்றுள்ள அரசியல் இயக்கங்கள் ஒன்றுகூட வரும் காலங்களில் மக்களை வஞ்சிக்கும் செயலில் ஈடுபடுவதற்குத் துளியும் வாய்ப்பின்றி மறைந்தோடச் செய்வோம்.

பதவிவெறி, ஆட்சியில் குறுக்கீடு, அதிகார தர்பார், வாரிசு அரசியல், ஆதிக்க மனப்பான்மை என தற்பொழுதுள்ள அரசியல் இயக்கங்களின் ஏராள தீய குணங்கள் ஏதுமற்று

தமிழ்நாட்டில் இனி மக்களுக்கான அரசியல் இயக்கம் ஒன்று மட்டுமே இருக்க வேண்டும்.

இனியொரு விதி செய்வோம். அதை எந்த நாளும் காப்போம்.

Read More...

வெள்ளி, 26 பிப்ரவரி, 2016

இங்கு யாரும் தோற்கவில்லை!

Leave a Comment
இளைஞன் ஒருவன் ஒரு ஸென் மதகுருவிடம் வந்து நான் எல்லாவித தீமைகளையும் செய்து விட்டேன். அதனால் தனக்கு வாழ்வே வெறுத்துவிட்டது. ஞானம் பெற இனி நான் என்ன செய்ய வேண்டும் என வினவினான்.

அந்த குரு உனக்கு வாழ்க்கையில் இன்னும் விடவே முடியாதது எதுவென்று கேட்டார். 
அதற்கு அவன் எனக்கு சதுரங்க விளையாட்டில்தான் தீவிர ஆர்வம் அதை மட்டுமே என்னால் இப்பொழுதும் விடமுடியாது என்றான்.

அப்படியானால் ஒரு உன்னுடன் சதுரங்கம் விளையாட இங்குள்ள எனது சீடர் ஒருவரை அழைக்கிறேன். நீ அவருடன் விளையாட வேண்டும். இந்த விளையாட்டில் நீ வென்றுவிட்டால் அவரது தலையை நான் வெட்டிவிடுவேன்.

அதே சமயம் அவர் வென்றுவிட்டால் நான் உன்னுடைய தலையை வெட்டிவிடுவேன். இதுதான் விதி சம்மதமா என்றார். அந்த இளைஞனோ ஒரு போர்க்குணம் மிக்க சமுராயின் மகன். எனவே தனக்குள் இயல்பாக உள்ள போர்க்குணத்துடன் இந்த விளையாட்டிற்கு ஒப்புக் கொண்டான்.

அவனை எதிர்த்து விளையாட வந்த சீடரோ இந்தக் குருவிடம் சீடராகிப் பனிரெண்டு ஆண்டுகள் தியானம் பழகியவர். ஒளி பொருந்திய முகத்துடன் குருவின் நிபந்தனைக்கு மறுப்பேதும் சொல்லாமல் விளையாட ஒப்புக்கொண்டார்.

விளையாட்டு துவங்கியது. இளைஞன் ஆரம்பத்தில் தான் தோற்றுவிட்டால் தனக்குக் கிடைக்கப் போகும் மரண தண்டனை குறித்து நடுக்கமும், அச்சமும் கொண்டு விளையாடத் துவங்கினான். சீடரோ எப்போதோ தனக்கிருந்து மறந்துபோன சதுரங்க விளையாட்டென்பதால் தவறாகவும், எனினும் மனதில் மரணபயம் ஏதுமின்றி அமைதியான மனதுடனும் விளையாடிக் கொண்டிருந்தார்.

நேரமாக ஆக இளைஞனுக்குள் இருந்த பயம் அகன்று ஒரு தெளிவான ஞானத்துடன் விளையாடத் துவங்கினான். எனவே அவன் வெற்றி பெறுவதற்கான வாய்ப்பு பிரகாசமானது. தான் வெற்றி பெறுவது நிச்சயம் என அவன் உணர்ந்தவுடன் எதிரே எந்தவித சலனமும் இன்றி விளையாடிக் கொண்டிருந்த துறவியைப் பற்றி எண்ணத் துவங்கினான்.

நானோ வாழ்வின் அனைத்து இன்பங்களையும் அனுபவித்து வாழவே தகுதியற்றவன். இதோ என் எதிரில் உள்ள இந்தச் சீடரோ எவ்வளவு சாந்தமானவராக, தோல்வியின் விளிம்பில் இருந்தும் தனது மரணம் பற்றிக் கவலைப்படாதவராக இருக்கிறார். 

எனவே நான் இறந்தாலும் பரவாயில்லை. இவர் வாழ வேண்டும். இவரால்தான் மனித குலத்திற்கு மேலும் நன்மைகள் கிடைக்கும் என்று நினைந்து தான் தோற்க வேண்டும் என்று அதற்கேற்ப தவறாக விளையாடத் துவங்கினான்.

இளைஞனின் மனமாற்றத்தை தனது ஞானத்தால் கண்டறிந்த ஸென் குரு உடனடியாக சதுரங்கப் பலகையையும் அதில் இருந்த காய்களையும் தட்டிவிட்டு போட்டி முடிந்தது. இங்கு யாரும் தோற்கவில்லை. இருவருமே வென்றுவிட்டீர்கள் என உரக்கச் சொல்லி ஆட்டத்தை முடிவுக்குக் கொண்டுவந்தார். 

புரிந்தும் புரியாமலும் அந்த இளைஞன் குருவிடம் ஏன் இப்படிச் செய்தீர்கள் எனக் கேட்டான். அதற்கு அந்த குரு சொன்னார். நான் உனது ஆட்டத்தின் ஆரம்பத்திலிருந்து கவனித்தேன். முதலில் பயத்துடன் ஆடிய நீ அதன் பிறகு ஒரு புத்தருக்குள்ள தன்மையை அடைந்தாய். உன்னிடம் கருணை குடி புகுந்தது. நீ இறந்தாலும் பரவாயில்லை எதிரிலிருக்கும் இந்தத் துறவி இறக்கக்கூடாது என முடிவு செய்தாய். எனவே நீ தோல்வியுறவில்லை. 

பக்குவமான தியானம், மற்றும் கருணை இரண்டையும் நான் உனக்குக் கற்றுத் தந்துவிட்டேன். இனி; நீ எனது சீடனாக இங்கேயே இருக்கலாம் என அவனைத் தனது சீடனாக ஏற்றுக் கொண்டார்.

இதோ இந்த இளைஞனைப் போன்றவர்கள்தாம் இன்றைய அரசியல்வாதிகள். 

எளிமையான அப்பாவியான அந்தச் சீடரைப் போன்றவர்கள்தாம் நம் தமிழக மக்கள். 

தேர்தல் எனும் சதுரங்க விளையாட்டு துவங்கிவிட்டது. எல்லாவித தீமைகளையும் செய்தும் இன்னும் தங்களது தவறுகளைப் புரிந்து கொள்ளாத நிலையில்தான் அரசியல்வாதிகள் தங்களின் விளையாட்டைத் துவங்கியுள்ளனர்.

எதிரே தங்களின் எதிர்காலம் எப்படி இருக்குமோ என்ற எவ்வித அச்சமும் இன்றி இந்த அரசியல்வாதிகள் வழங்கப்போகும், பணம், உடை, இலவசங்கள், தேர்தலுக்கும் பின் கிடைக்கப்போகும் இலவசங்களை நம்பி கத்தி தலைக்கு மேல் காத்திருந்தாலும், அரசியல் சதுரங்க விளையாட்டில் அனுபவமின்றியும்கூட மக்கள் விளையாடத் தயாராகிவிட்டனர்.

முடிவு கதையில் உள்ளது போன்று நல்லதாக நடக்க வேண்டும். 

இங்கு எவரும் தோற்கக்கூடாது. 

போட்டியிட்ட இருவருமே வெற்றி பெற வேண்டும். 

இளைஞனுக்குள் ஏற்பட்ட மனமாற்றம் நம் ஊழல் அரசியல்வாதிகளிடமும் வர வேண்டும் . அப்படி ஒரு மனமாற்றம் வந்து இந்த அரசியல்வாதிகள் தங்களுக்குள் கருணையையும் அன்பையும் மட்டுமே மக்களிடம் வெளிப்படுத்தினால் நாங்கள் அவர்களை மன்னித்து ஏற்றுக் கொள்வோம்.

ஏனெனில் அவர்கள் வேற்றுக் கிரகத்திலிருந்து வந்து எங்களை அடக்கி ஆண்டவர்களல்ல. எங்களுடனே பிறந்து வளர்ந்து எங்களுக்குச் சேவை செய்யும் வாய்ப்பு கிடைத்தும் அதைத் தவறாகப் பயன்படுத்தி கதையிலுள்ள இளைஞனைப் போல வாழ்ந்திருந்தவர்கள். 

இவர்கள் திருந்துவார்கள். இவர்கள் இதுவரை செய்த தவறுகளை மறப்போம். மன்னிப்போம்.

இனியொரு விதி செய்வோம்.

தமிழகம் இனி நல்ல அரசியல்வாதிகளால் புகழ் பெற வேண்டுமென.

Read More...

புதன், 24 பிப்ரவரி, 2016

இன்றைய இளைஞர்கள் கட்டாயம் தட்டச்சு பழக வேண்டும்

Leave a Comment
வணிக உபயோகத்திற்கென முதன் முதலாக நான் 2003 ஆம் ஆண்டில் கணினி வாங்கியபோது எனக்கு அதனை எப்படி இயக்குவது என்பதுகூடத் தெரியாது. எனக்கு அப்பொழுது வயது 41.

எனது 43 வயதில் வணிக வாழ்வில் நான் நட்டமுற்றதன் விளைவாக வேலைக்குச் செல்ல வேண்டிய நிலை ஏற்பட்டது.

இந்த வயதில் ஒரு கணக்காளராக வேலை செய்யக்கூடிய அளவில்தான் நான் இருந்தேன். பல ஆண்டுகள் வணிகத்தில் இருந்ததால் வரவு செலவு கணக்குகளை எழுதுவதில் ஓரளவிற்கு எனக்குப் பயிற்சி இருந்தது.

கணினியில் டேலி பற்றிய அறிவும் ஓரளவு இருந்தது. எனவே நான் டேலியில் எனது கவனத்தை செழுத்தி அதில் ஓரளவு பயிற்சி பெற்றேன். அதை விட முக்கியமாக நான் கணினியின் கீ போர்டில் தட்டச்சு செய்வதை முறைப்படி கற்றுச் செய்ய வேண்டும் என விரும்பினேன்.

தட்டச்சு நிலையம் சென்று பயிலும் அளவிற்கு அப்பொழுது எனது நிதிநிலை கை கொடுக்காததால் நான் ஒரு தட்டச்சு பயிற்சி புத்தகத்தை எனக்கு மகள் முறையுடைய ஒருவரிடமிருந்து பெற்று அதில் வழி காட்டியபடி நானாகவே ஆங்கிலத்தில் தட்டச்சு செய்து பழகத் துவங்கினேன்.

கிட்டத்தட்ட ஒரு மாதம் கடுமையான பயிற்சி மேற்கொண்டேன். அதனால் ஆங்கிலத்தில் நான் ஓரளவு விரைவாகத் தட்டச்சு செய்யும் அளவிற்குத் தேர்ந்தேன்.

அடுத்து வணிகத்தில் நட்டமுற்று வேலைக்குச் செல்லவேண்டிய அந்த நிலையில்கூட எனக்குள் ஏற்பட்ட சமூகச் சிந்தனைகளை தமிழில் எழுதத் துவங்கினேன்.

இதை நோட்டுப் புத்தகத்தில் எழுதுவதை விட தமிழ் தட்டச்சு பயின்று கணினியில் அதைச் சேமிக்கலாமே என்ற எண்ணம் என்னுள் உந்தித் தள்ள அதற்கும் ஒரு கணினித் தட்டச்சு நிலையச் சகோதரி கொடுத்த பாமினி தமிழ் எழுத்துருவை இரவல் வாங்கி எனது கணினியில் பதிவிட்டேன்.

பிறகு எனது கணினி மேசைக்கெதிரில் ஒரு கீ போர்டு மாதிரியை ஆங்கிலத்திலும், பாமினி எழுத்துருவிற்கேற்ப தமிழிலும் வரைந்து கொண்டு அதனைப் பார்த்து தட்டச்சு செய்யத் துவங்கினேன். கற்றுக் கொள்ள வயது ஒரு தடையே இல்லை என்பதற்கேற்ப இதனையும் கடுமையான பயிற்சியாக ஒரு மாதத்திற்கு மேல் செயல்படுத்தினேன்.

இதோ இன்று 55 வயதிலும் ஆங்கிலத்திலும், தமிழிலிலும் விரைவாகத் தட்டச்சு செய்யும் நிலைக்கு உயர்ந்து என்னுடைய மனதில் பட்ட சிந்தனைகளைப் படைப்பாக்கி இணையத்தில் வலைதளம் வாயிலாகவும், வாசகர்களின் நல்ல சிந்தனைகளை வரவேற்று வாய்ப்பளிக்கும் ஆனந்த விகடனுக்கும் அனுப்பி எனது இரண்டு கட்டுரைகளும் வெளியாகி இருப்பதில் எனக்குள் மட்டற்ற மகிழ்ச்சி.

நான் வேலை செய்த சில நிறுவனங்களில் பணியாற்றிய சக இளைஞர்கள், மற்றும் இளைஞிகள் கணினியில் பணியாற்றும்போது தட்டுத் தடுமாறித் தடவித் தடவி கீ போர்டில் வேலை செய்வதைக் கண்ணுற்றால் நான் அடுத்தநாளே என்னிடம் இப்பொழுதும் பத்திரமாக உள்ள முதன்முதலாக நான் தட்டச்சு செய்ய உதவிய புத்தகத்தின் நகல்களை எடுத்து கொடுத்து அவர்களையும் தட்டச்சு செய்து பழக அறிவுறுத்துவேன்.

இன்று ஒவ்வொரு இல்லத்திலும் கணினி இல்லாத நிலை உருவாகிவிட்டது. அரசுகளின் இலவச மடிக்கணினிகளும் ஏராளம் வழங்கப்பட்டுவிட்டது. இளைய தலைமுறை தங்களின் பணிகளை தங்கு தடையின்றி விரைவாகக் கணினியில் செய்யத் தட்டச்சு இயந்திரத்தில் பழக வேண்டியது மிகமிக அவசியம். கணினி அறிவு ஏராளம் இருந்தாலும் நம்மிடம் உள்ள தட்டச்சு செய்ய இயலாத குறை நாம் பணியாற்ற வேண்டிய நிறுவன வேலைகளைத் தாமதப்படுத்தவே செய்யும்.



இதனைத் தவிர்க்கவாவது இன்றைய இளைஞர்கள் கட்டாயம் தட்டச்சு பழக வேண்டும் என்பதே எனது 55 வயதிலும் கற்பதற்கு வயது ஒரு தடையல்ல என்பதான வேண்டுகோள். இன்றைய இளைய சமுதாயம் நிச்சயம் எனது வேண்டுகோளைப் புறக்கணிக்காது.
Read More...

அன்னைத் தமிழால் என்னைச் செதுக்கியவர்கள்

Leave a Comment
உயர்நிலைப்பள்ளியில் நான் ஐந்தாம் வகுப்பு படிக்கத் துவங்கியபோது எனது உறவினரும் தமிழாசிரியருமான சித்தையா அவர்கள் எனது வகுப்பாசிரியராக இருந்தார். பத்து வயதில் முதன் முதலாக விபரம் புரிந்து அவரிடம் தமிழ் கற்க நேர்ந்தது.

அதன் பின்னர் ஏழாம் வகுப்பு துவங்கி பள்ளி இறுதி வரை அடுத்தடுத்த வகுப்புகளில் தமிழாசிரியர்களாகச் சிலர் இருந்தாலும் பெரும்பாலும் எனக்குத் தமிழாசிரியராக இருந்தவர் ஆபெ என பள்ளி வளாகம் முழுவதும் ஆசிரியப் பெருமக்களால் அழைக்கப்பட்ட மதிப்பிற்குரிய திரு ஆ.பெரியசாமி அவர்கள்.

தமிழில் நான் இன்று இலக்கண சுத்தமாக எழுதுகிறேனா என்பது எனக்கே தெரியாது. மேலும் எல்லோரைப் போலவும் இப்பொழுதும் எனது எழுத்துக்களில் அவ்வப்போது எழுத்துப் பிழை என்னை அறியாமலேயே வெளிப்பட்டுவிடுகிறது. இதற்கு நான் எனது படைப்பை மீண்டும் படித்துத் திருத்தாமல் அவசரமாக வெளியிட்டுவிடுவதுதாம்.

எனினும் என்னை தமிழில் எழுதுவதற்கு ஒரு உந்து சக்தியாகத் திகழ்ந்தவர் திரு ஆபெ என்பதில் இன்றளவும் எனக்குள் சந்தேகம் இல்லை.

திரு ஆபெ அவர்கள் மிகுந்த பகுத்தறிவுச் சிந்தனைகள் நிறைந்தவர் தந்தை பெரியாரின் வழியில் நடந்தவர். சேலம் மாவட்ட பகுத்தறிவாளர் சங்கத்தில் தன்னை இணைத்துக் கொண்டு தந்தை பெரியாரின் பகுத்தறிவுச் சுடர் ஏந்தி பவனி வந்தவர்.

அவர் எங்களின் வகுப்பறையில் நுழைந்த கணம் முதல் வகுப்பு முடியும் வரை வகுப்பறையே எங்களின் சிரிப்பலைகளால் அதிரும். இதற்குக் காரணம் அவர் தமிழின் இலக்கண இலக்கியங்களை மிகுந்த நயத்துடன் பாடம் எடுக்கும் கையோடு நம் பக்தி மார்க்கம் பரப்பிய கட்டுக் கதைகளை தனக்கே உரிய நகைச்சுவை பாணியில் நையாண்டி செய்வதுதாம். 

குறிப்பாக முப்பத்து முக்கோடி தேவர்கள், கிங்கிரர்கள் எனத் துவங்கும் (வயது காரணமாக மேலே தொடரும் வரிகள் மறந்துவிட்டன) பக்தி மார்க்க வரிகளை வரிசையாகச் சொல்லி நம் பாமர மக்களை ஏமாற்றும் பக்தி மார்க்கக் கும்பல்களை அவர் நையாண்டி செய்யும் போதெல்லாம் வகுப்பறையே அதிரும். 

மிகத் தீவிரமாகத் தம் பகுத்தறிவுக் கொள்கைகளை எங்களுக்குள் விதைக்க முயன்றாலும் தம்முடைய கடமையிலிருந்து அவர் தவறவே இல்லை. நான் எழுதும் எழுத்து அவர் வழங்கியது. அவரது மாணவனாகப் பல வகுப்புகளில் நான் இருந்ததால் அவர் நடத்திய இலக்கண இலக்கிய விதிகள் அவரது பகுத்தறிவுச் செய்திகளோடு எனது மனதில் பசுமரத்தாணி போலப் பதிந்ததெனலாம்.

அவரால்தான் இன்றுவரை நான் தமிழ் வளர்த்த சித்தர்களின் வழியில் ஓரளவு நடக்க முயன்றாலும் எனது ஒவ்வொரு செய்கையிலும் பகுத்தறிந்து வாழ முற்பட்டிருக்கிறேன். தந்தை பெரியாரைப் பற்றி ஏராளமான மாற்றுக் கருத்துகள் இருந்தாலும் அவரால் நம் தமிழகத்தில் ஏற்பட்ட மகத்தான வரலாற்றுப் புரட்சிகளுக்கு மதிப்பு கொடுத்து தந்தை அவர்களை மதித்து வருகிறேன்.

அடுத்து எனக்குள் உள் உணர்வாகத் தமிழார்வத்தைப் புகுத்தியவர் தமிழினத்தின் சரித்திரத்தில் நிரந்தரமாகப் பதிவு செய்யப்பட்டவர்.

நான் புகுமுக வடிப்பு படித்துவிட்டு மேற்கொண்டு படிக்க விருப்பமின்றி எனது சொந்த ஊரில் கிடைத்த வேலை ஏதேனுமொன்றைச் செய்து கொண்டிருந்தேன். அந்த சமயத்தில் நாமக்கல்லில் இருந்த எனது சிறிய தகப்பனாரிடமிருந்து உடனே அங்கு புறப்பட்டு வரவேண்டுமென்று ஒரு தந்தி வந்தது.

நான் அடுத்த நாளே நாமக்கல் சென்றடைந்தேன். என்னிடம் எனது சிறிய தகப்பனார் தனது நண்பர்கள் சிலர் துவக்கியுள்ள ஒரு இருசக்கர வாகன தானியங்கி உதிரிபாகங்கள் விற்பனை நிலையத்தைக் கவனித்துக் கொள்ள ஒருவர் தேவை. நான் உன்னை அங்கு சேர்த்து விடுகிறேன் சம்மதமா என்றார். ஊரில் சரியான வேலையேதுமின்றி இருந்ததால் நான் உடனடியாக அதற்கு ஒப்புக்கொண்டேன்.

உடனே அவர் என்னை தனது இல்லத்திலிருந்து நாமக்கல் நகரில் ஒரு குறிப்பிட்ட தெருவில் அமைந்திருந்த அவரது நண்பர்களின் உதிரிபாக விற்பனை நிலையத்திற்கு என்னை அழைத்துச் சென்றார்.

நாமக்கல்லில் அதற்கு முன்னர் நான் ஓராண்டுவரை புகுமுக வகுப்பில் படிப்பதற்காகத் தங்கியிருந்தபோது நாமக்கல்லில் பல்வேறு இடங்களில் சுற்றியிருந்தபோதும் ஏனோ இந்த இடத்தை மட்டும் நான் தவற விட்டிருந்தேன்.

எனது பாதங்கள் முதன் முதலாக அந்த நிறுவனம் அமைந்திருந்த என்பதை விட அந்த இல்லத்து மண்ணை மிதித்தது அன்றுதாம். அடுத்தநாள்தான் அந்த நிறுவனம் அமைந்திருந்த இடம் தமிழகத்தின் சரித்திரப் புகழ் பெற்ற இந்தியச் சுதந்திரத்திற்காகப் போராடிய ஒரு மாமனிதர் வசித்த இடமென்பது எனக்குத் தெரிய வந்தது.

நான் பணியாற்றிய நிறுவனத்திற்குப் பின்புறம் அமைந்திருந்த அந்த மாமனிதர் வசித்த இல்லத்தில் அந்த மாமனிதரின் தங்கை வசித்து வந்தார். என்னைப் பற்றி விசாரித்த அவர் தன் மகன் போலிருந்த என்னிடம் அந்த மாமனிதருடன் தான் வாழ்ந்த வாழ்க்கை பற்றியும், அந்த மாமனிதர் வாழ்ந்த முறை பற்றியும் ஏராளம் என்னிடம் பகிர்ந்து கொண்டார்.

நான் அந்த மாமனிதரின் இல்லத்தில் அவரின் சுவாசக் காற்றினை இரண்டாண்டுகள்வரை சுவாசித்திருந்தேன். பல்வேறு வணிகக் காரணங்களால் நான் பின்னர் பத்தாண்டுகள் நாமக்கல்லில் இருந்து விலகி வாழ நேர்ந்தது. 

பத்தாண்டுகள் கழிந்து நான் அந்த இல்லத்துச் சுவாசக் காற்றை மீண்டும் இரண்டாண்டுகள் சுவாசிக்க நேர்ந்தது. அதன் பின்னர் அந்த மாமனிதர் என்ன நினைந்தாரோ தெரியவில்லை. நான் நாமக்கல்லை விட்டு நிரந்தரமாக பல்வேறு இடங்களில் வசித்து இன்று ஈரோட்டு மண்ணில் வசிக்க நேர்ந்துள்ளது.

ஏனோ தெரியவில்லை. எனக்கு பணம் சார்ந்த நோக்கம் என் வாழ்நாளெல்லாம் இருந்ததில்லை. ஆனால் நம் தாய்த்தமிழகம் எப்படியெல்லாம் திகழ வேண்டும் என்பதில் எனக்குள் ஏராளமான கனவுகள் உண்டு. 

இதன் காரணமாகவே நான் அடிக்கடி இன்றைய ஊழல் அரசியல்வாதிகளைப் பற்றி எனது அதிருப்தியை வெளிப்படையாக எனது இல்லத்திலும், நட்பு வட்டத்திலும், இணையத்தில் எனக்கென ஏற்படுத்திய வலை தளத்திலும் விமரிசிக்கிறேன். இதனால் இன்றைய அரசியல்வாதிகளின் மேல் உள்ள அச்சத்தின் காரணமாக எனக்கு ஏராளமான அறிவுரைகள்தான் கிடைத்து வருகிறது. 

எனினும் எனது பேச்சையோ எழுத்தையோ என்னால் மாற்றிக் கொள்ளவே இயலவில்லை. 55 வயதில் உள்ள எனக்குத் தமிழில் உள்ள ஆறிலும் சாவு நூறிலும் சாவு என்ற ஒரு அசாத்திய துணிச்சலும் உண்டு. 

வாய்மை உணர்வுடன் வாழ முற்பட்டு, நம் தமிழகமும் அதே உணர்வுடன் வாய்மையே வெல்லும் என்ற தனது தாரக மந்திரத்திற்கேற்ப செயல்படும் அரசியல்வாதிகள் நிறைந்து திகழ வேண்டும் என்ற என் கனவு நியாயமானதில்லையா?

இதனைப் படிப்பவர்கள்தான் எனக்குச் சரியான துணிச்சல் தரவேண்டும். 

எனினும் நாமக்கல்லில் நான்காண்டுகள் மட்டுமே வாழ்ந்திருந்தாலும் நான் போற்றும் அந்த மாமனிதர் யாரென்பதை நான் இன்னும் எழுதவில்லைதானே.

அவர்தான் 

கத்தியின்றி இரத்தமின்றி யுத்தமொன்று வருகுது என அண்ணல் காந்தியடிகளின் அகிம்சை யுத்தத்தைத் தம் வைர வரிக் கவிதைகளில் விதைத்து நமது தேச விடுதலைக்காகப் பாடுபட்ட மக்களை விரைவுபடுத்தியவர்.

தமிழனென்று சொல்லடா தலை நிமிர்ந்து நில்லடா எனத் தமிழர்களை உலக அரங்கில் தலை நிமிர்ந்து பீடு நடை போட வைத்தவர்.

பாரத தேசம் மட்டுமல்ல உலகமெங்கும் தம் விடுதலை உணர்வாலும், கவிதை, கட்டுரை, தமிழ் இலக்கியம் என ஏராளப் படைப்புகளால் இன்றும் வாழ்ந்து கொண்டிருக்கும் அந்த மாமேதை, மாமனிதர்

நாமக்கல் கவிஞர் திருமிகு இராமலிங்கம் அவர்கள். 

அவரது இல்லச் சுவாசக் காற்றைச் சுவாசித்த எனக்குள் வணிகத்திற்காக ஆங்கிலத்தில் எழுதி வந்திருந்தாலும் தமிழ்மொழி மேலும், நம் தாய்த்தமிழகம் எப்படியெல்லாம் வளர்ந்து உலக அரங்கில் உயர்ந்து உலகிற்கே வழிகாட்டித் திகழ வேண்டும் என்ற ஏராளமான கனவுகள் இருந்தே தீர வேண்டுமென்பது 

இயற்கையாகவும், தமிழனாய்ப் பிறந்து, தமிழ் என்னும் அமுதமொழி பேசி, தமிழ் மண்ணில் வாழ்ந்து மடியவேண்டும் என்ற பிறப்பெடுத்த எனக்குள் இயல்பானதுதானே. 

கோழைகளையும் வீரனாக்கும் அந்த மாமனிதரின் தமிழனென்று சொல்லடா தலை நிமிர்ந்து நில்லடா எனும் வீர வரிகள் என்றும் எனக்குள்  நிறைந்து உத்வேகம் கொடுக்கும்.

Read More...

வெள்ளி, 5 பிப்ரவரி, 2016

கண்ணாடிச் சட்டம் போட்டுக் கதறித் துடிக்கவா படித்துப் பட்டம் வாங்க கல்விக்கூடம் அனுப்பினோம்?

Leave a Comment
சமீபகாலமாக ஊடகங்களில் குறிப்பாக பள்ளி மற்றும் கல்லூரி பயின்ற இளம் பெண்களின் தற்கொலைச் செய்திகள் வரத்துவங்கி இருப்பது தமிழகம் எங்கே போகிறது என்ற கேள்வியை எழுப்பத் துவங்கியுள்ளது.

தற்கொலை செய்துகொண்ட பெண்களின் செய்தியைக் காணும்போதெல்லாம் தங்கள் உறவில் ஒருவரை இழந்துவிட்டது போன்ற வேதனை அலைகள் ஒவ்வொரு நல்ல உள்ளத்திலும் எழாதிருக்காது. 

பள்ளிப் படிப்பு முடிந்தவுடன் தரமிக்க கல்வி கிடைக்கும் இடங்கள் எங்கிருந்தாலும் கடன்பட்டாவது தங்களின் பிள்ளைகளை விடுதியில் தங்கிப் படிக்க வைத்துவிட்டுக் குறிப்பாகப் பெண் குழந்தைகளை அனுப்பிவைக்கும் பெற்றோர்களின் தூக்கமில்லா இரவுகளை ஒரு கட்டத்தில் எங்கள் ஒரே மகளை சென்னையில் கிடைத்த வேலைக்காக விடுதியில் தங்கி வேலை செய்ய சில மாதங்கள் அனுப்பி  நாங்களே அனுபவித்துள்ளோம்.

படிக்காத மேதையின் ஆட்சிக்காலத்தில் கல்விக்கூடங்களில் ஆரம்பக் கல்வியும், உயர் கல்வியும்  பெற தமிழகமெங்கும் பட்டிதொட்டியெங்கும் ஏராளமாகக் கல்விக்கூடங்கள் திறந்திருந்தார். 

அந்த மேதைக்கு நீண்ட ஆயுளை இயற்கை வழங்கியிருந்தால் ஒவ்வொரு வட்டத்திலும் இன்று தரமான பல்கலைக் கல்விக்கூடங்களை ஏராளம் நிறுவியிருப்பார்.

காலையில் கல்விக்கூடம் சென்றுவிட்டு மாலைக்குள் வீடு திரும்பும் நிலையில் நமது பிள்ளைகள் நம்முடனே வாழும் நிலைக்கு ஆளாகியிருப்பர். தங்கள் குழந்தைகள் தங்களுடனே தங்கிக் கொண்டு தரமான கல்வியைப் பெற்று மகத்தான வாழ்வு பெரும் நிலையை நம் தமிழக மக்கள் அடைந்திருப்பர்.

திராவிட இயக்கங்கள் வளர்த்துவிட்ட பினாமிக் கோடீசுவரக் கல்வித்தந்தைகள் துவக்கியுள்ள நிறுவனங்கள் தாங்கள்தாம் தரமான கல்வியை வழங்குவதாக ஒரு மாயையை எழுப்புவதால் 

தொலைதூரமென்றாலும் தங்களின் பிள்ளைகளுக்குத் தரமான கல்வி கிடைத்தால் போதும் என கடன்பட்டாவது இலட்சங்களில் செலவிட்டு விடுதியில் தங்கிப் படிக்க அனுப்பிவிட்டு 

இன்று மடியில் நெருப்பைக் கட்டிக் கொண்டு தவிக்கும் பெற்றோர்களின் கண்ணீர் இரக்கமற்ற அரசியல்வாதிகளுக்கு எங்கே தெரியப்போகிறது?

இருக்கும் இரண்டு ஊழல் திராவிட இயக்கங்களும் தொலைந்து இவர்களை அண்டிப் பிழைத்த பச்சோந்தி சாதிய, மதவாத, தேசியவாத, இயக்கங்கள் அனைத்தும் வரும் சட்டமன்றத் தேர்தலிலாவது மக்களின் மகத்தான எழுச்சியால் படுதோல்வியடையச் செய்து 

ஒவ்வொரு தொகுதியிலும் இலட்சத்தில் ஒரு நல்லவரை மக்கள் அடையாளம் கண்டு இவர்தாம் நமது தொகுதி வேட்பாளர் என ஒருமனதாக இலட்சக்கணக்கான வாக்குகள் பெற்று தேர்ந்தெடுக்கப்பட்டால்

இனி வரும் காலங்களில் பினாமிக் கல்விக்கூடங்கள் தொலைந்து அரசின் தரமான கல்வி நியைங்களில் நமது பிள்ளைகள் அவரவர் இல்லத்தில் இருந்தே படிக்கும் நிலையை உருவாக்க முடியும்.

பெற்றோரின் பாதுகாப்பின்றி படிக்கச் சென்று தற்கொலை செய்து கொண்ட இளம்பெண்களின் குடும்பங்களுக்கு எம்முடைய ஆழ்ந்த இரங்கல்களைப் பதிவு செய்கிறோம். 

மீண்டும் இது போன்ற நிகழ்வுகள் தமிழகத்தில் உருவாகாதிருக்க தமிழ் பேசும் ஒவ்வொருவரும் சபதம் ஏற்போம். 

Read More...

சனி, 23 ஜனவரி, 2016

உன்னை நான் சந்தித்தேன்! நீ ஆயிரத்தில் ஒருவன்!

Leave a Comment
ஐந்து வயதில் முதன் முதலாக நான் துவக்கப்பள்ளியில் சேர்ந்து எழுது பலகையை எனது வலது கையில்  பிடித்துக்கொண்டு இடது கையில் எழுதுகுச்சியால் எழுதத் துவங்கினேன்.

இதைக்கண்ணுற்ற எனது வகுப்பாசிரியை திருமதி புஸ்பா அவர்கள் எனது இடது கையில் தனது கரத்தில் இருந்த பிரம்பால் சில அடிகள் வைத்து என்னை வலது கையால் எழுதும்படி பயிற்றுவித்தார்.

அன்றைக்கிருந்த ஆசிரியர்களின் மனநிலையயும் மக்களிடம் நிலவிய மூடத்தனமான தவறான எண்ணங்களும் இடது கையால் எழுதுவது தவறெனப் பட்டதின் விளைவு நான் எனது எழுதும் பழக்கத்துடன் எனது தலையெழுத்தையும் அவர்கள் மாற்றி எழுதத் துவங்கிவிட்டதாகத்தான் இன்று கருதுகிறேன். 

பொதுவாக இடது கைப் பழக்கம் உள்ளவர்கள் உலகத்தில் சுமார் ஆயிரத்தில் ஒருவராகத்தான் பிறக்கின்றனர். வலது கைப்பழக்கம் உள்ளவர்களைக் கட்டுப்படுத்தும் மூளையின் அமைப்பு எங்களைப்போன்ற இடது கைப்பழக்கம் உள்ளவர்களுக்கு இடம்மாறி இருப்பதால் எங்களின் அனைத்துப் பழக்க வழக்கங்களும் வலதுகைப் பழக்கம் உள்ளவர்களுக்கு நேரெதிராகத்தான் இருக்கும்.

எந்தப் பொருளை எடுப்பதாக இருந்தாலும், மிதிவண்டி மற்றும் இருசக்கர வாகனங்களையும் நாங்கள் இடதுபுறத்தில்தான் எடுப்போம். இளம் வயதில் நான் எனது தந்தையுடன் மிதிவண்டியின் பின்புறத்தில் அமரும்போது இடதுபக்கமாக அமர்ந்தே பயணிப்பேன். இந்தப்பழக்கத்தையும் மற்றவர்கள் திருத்த முயன்று வெற்றி பெற்றனர்.

மகாபாரத வில்லாளி அருச்சுனனும், இன்றைய சாதனை வீரர் சச்சினும் இடது கைப்பழக்கம் உடையவர்கள்தாம். சச்சின் தனது கிரிக்கெட் விளையாட்டின் தொடக்கத்திலேயே இடதுகைப்பழக்கத்திற்கு மாறி பல்வேறு உலக சாதனைகளைப் புரிந்தாலும் முப்பது வயதுக்குமேல் அவரது விளையாட்டுத்திறன் குறைவு பட்டதற்கு காரணமே மாற்றப்பட்ட பழக்கம்தான். 

முப்பது வயதுக்குப்பின் ஒருவேளை சச்சின் தனது ஆட்டத்தை இடது  கைக்கு மாற்றி ஆடத்துவங்கி இருந்தால் இந்தக் கட்டுரையை நான் எழுதும் தருணத்தில்கூட ஓய்வு பெறாமல் இன்னும் ஏராளமான எவரும் தொட இயலாத உலக சாதனைகளைப் படைத்துக் கொண்டிருந்திருப்பார்.

இன்றைய தலைமுறை எங்களைப்போன்ற வலதுகைப் பழக்கம் உடையவர்களைச் சரியாகப் புரிந்துகொண்டு சிறுவர் சிறுமியராக இருக்கும்போதே அவர்கள் பழக்கத்தை மாற்றாமல் ஊக்கப்படுத்தத் துவங்கியுள்ளதை நான் வெகுவாகப் பாராட்டுகின்றேன். 

என் போன்ற இடது கைப்பழக்கம் உடைய சிறுவர் சிறுமியர்களைக் கண்டால் அவர்களைப் பாராட்டி அவர்தம் பெற்றோர்களையும் நான் வாழ்த்துவதை வழக்கப்படுத்தியுள்ளேன். 

எனது 55 வயதில் வலகு கரத்தில் நான் எழுத முற்படும்போது எனது எழுத்துக்கள் சற்றுக் கிறுக்கலாகத்தான் வெளிப்படுகிறது. அதுவே இடது கையில் நான் எழுதத்துவங்கியிருந்தால் எனது எழுத்துக்களும் அழகாக இருந்திருக்கும். இயல்பாகவே எனக்குள் இருக்கும் ஓவியம் வரையும் ஆர்வமும் பிரகாசமாக இருந்திருக்கக்கூடும்.

இரு கை விரல்களையும் பயன்படுத்திக் கணினியின் விசைப்பலகையில் தட்டச்சு செய்வதால் எனது படைப்பாற்றலை விரைவாக என்னால் செய்ய முடிகிறது. 

என் போன்ற ஆயிரத்தில் ஒருவர்களைச் சரியாகப் புரிந்து கொண்டவர்களுக்கும் புரிந்து கொள்ளப் போகிறவர்களுக்கும்  எம்முடைய இதயம் நிறைந்த நன்றிகளைத்தாம் இப்பொழுது எம்மால் வழங்க இயலும்.

Read More...